Kugurhwa ke Umambo

Mu nguwa yekuti Soromoni waizwira Djehovha, umabo we Israeri wakagara mu runyararo. Asi Soromoni wakawaka anakadzi ekuti ainga asiripi Aisraeri uye ainga asikanamati Djehovha. Padoko no padoko, Soromoni wakatanga kucinja uye wakanamata madzimwari ainamathwa no akadzi ake. Djehovha akanyangadzwa maningi uye akabvunza Soromoni kuti: ‘Ndicabvisa Israeri mu nyara dzako uye ku mhuri yako, umambo ucagurhwa mu matii mairi. Dii rakakura ndicapasa museenzi wako uye dii ridoko ndirona ricagara no mhuri yako.’

Umwe we museenzi wa Soromoni unodainzwa kuti Djerobhoamu, waiita rhwendo uye wakasongana no muphorofita Ahija mu gwanza. Ahija wakatora hanzu yake uye wakaimwesa mu zvimatimbu 12, pedzepo wakabvunza Djerobhoamu kuti: ‘Djehovha acabvisa umambo we Israeri mu mhuri ya Soromoni uye acaugura wogara matii mairi. Tora matimbu gumi e hanzu ngekuti iwewe ucagara mambo we madzinza gumi.’ Soromoni paakazwa izvona, wakada kuuraya Djerobhoamu! Hino Djerobhoamu wakatiza oenda ku Edjipitu. Mumasure me makore manganani, Soromoni wakafa uye mwana wake unodainzwa kuti Robhoamu wakagara mambo. Pedzepo, Djerobhoamu wakaona kuti yainga yaguma nguwa yo kuhwirira ku Israeri.

Anarume akura eku Israeri akabvunza Robhoamu kuti: ‘Kana iwewe ukarumbwa wecibata zvakanaka Aisraeri, awona acarumbwa ari ku dii rako.’ Asi shamwari dzo cidjaha dza Robhoamu dzakamubvunza kuti: ‘Usabate zvakanaka anhu aya! Ita kuti Aisraeri aseenze maningi!’ Robhoamu wakaita zviya zvaainga abvunzwa no shamwari dzake dzo cidjaha. Izvona zvakaita kuti Aisraeri amupandukire. Hino, madzinza gumi e Aisraeri akasanangura Djerobhoamu kuti agare mambo wawo. Uye dii rimweni ro madzinza mairi akasanangura kugara ku dii ra Robhoamu. Madzinza gumi no mairi e Israeri, akagurhwa kuti agare umambo uiri. Madzinza gumi aidainzwa umambo we Aisraeri uye madzinza mairi aidainzwa umambo we Djudha.

Djorobhoamu wainga asikadi kuti anhu ake aende koonamata Djehovha ku Djerusarema kainga kuno umambo wa Robhoamu. Unozviziya kuti ngei? Ngekuti iyena waithya kuti anhu aizomupandukira uye osanangura kugara ku dii ra mambo Robhoamu. Hino Djerobhoamu wakaita zvin’ombe zviiri zve oro uye wakabvunza anhu kuti: ‘Ku Djerusarema kure maningi. Hino namatai Mwari muri kuno.’ Pedzepo, anhu akatanga kunamata zvin’ombe zve oro uye akatangazve kukanganwa Djehovha.