Mwana we Mufirhwakadzi Unohwirirazve Kurarama

Mu nguwa yekuti kainga kusikanayi, Djehovha akabvunza Eriya kuti: Enda ku Zarefati. Mufirhwakadzi ari ikona ucakupasa zvekurhya.’ Paakagumeyo, Eriya wakaona mwanakadzi murombo ecinonga huni. Wainga ari mufirhwakadzi uya wainga wakabhuiwa ndi Djehovha. Eriya wakamukumbira pau uye no mvura padoko, mufirhwakadzi uu wakati: ‘Inini andina pau, ndinozviufu padoko no mafuta. Izvona zvinokwana basi kuna inini no mwana wangu.’ Eriya wakamubvunza kuti: ‘Djehovha akagondesa kuti, kana iwewe ukandibikira pau, iwewe ucagara no ufu ne mafuta dakara mvura yanaya.’

Hino, mufirhwakadzi wakaenda kumba uye wakabikira pau Eriya. Hinga zvaainga agondeswa ndi Djehovha, mufirhwakadzi uu no mwana wake akagara no zvekurhya pa makore ese e nzara. Hari yake yo ufu uye jaro yake ye mafuta azvizi kugara zvisina ciro.

Asi kakazoitika ciro cakashata. Mwana we mufirhwakadzi uu, wakarhwara maningi uye wakazofa. Mufirhwakadzi uu wakadeketera kuna Eriya kuti aite ciito. Eriya wakatora mwana mu nyara dza mai ake oenda naye mu kwartu yo mudenga. Iyena wakatora mwanewo omukanda pakama, uye wakanamata eciti: ‘Ndapota Djehovha, itai kuti mwana uu araramezve.’ Zvakakumbirhwa na Eriya zvaiita hingana kuti azviitiki. Hingana zvatinoziya, izvona zvainga zvisati zvakamboitika. Mufirhwakadzi no mwana wake, ainga asiripi e dzinza re anhu a Djehovha.

Asi mwanewo wakazohwirirazve kurarama. Eriya wakazoti ku mufirhwakadzi: ‘Ona! Mwana wako waa mupenyu.’ Mufirhwakadzi wakapfara maningi uye wakati kuna Eriya: ‘Pari zvino ndaa kuziya kuti imwimwi muri munhu wa Mwari, masoko amunoreketa anobva kuna Djehovha uye ngee zvirokwazvo.’