Djehovha Akabambisa Eriya

Djezabheri paakaziya zvakaitika no aphorofita a Bhaari, iyena aazi kuzvipfarira. Hino, iyena wakabhuya kuti waizouraya Eriya hinga mushobo waakauraya aphorofita a Bhaari. Eriya wakathya maningi uye wakatizira kurenje. Iyena wakanamata eciti: ‘Djehovha, inini andicazvikwanisi izvi. Ndapota, ndisiyei ndife.’ Eriya wainga akaremba maningi, zvekuti wakagara uye wakawata pasi pe muti. Pedzepo Djehovha akatuma ngirozi.

Ngiroziyo yakamutsa Eriya uye yakamubvunza kuti: ‘Ndino ciro cekuti urhye, muka.’ Eriya wakaona pau yainga yakaita bhororindo yecipisa uye jaro ye mvura. Iyena wakatanga kurhya, wakamwa uye wakahwirira koowata. Hino ngirozi yakamutsazve Eriya yeciti: ‘Irhyazve padoko. Iwewe unodikana kugara no simba kuti uite rhwendo.’ Mumasure mekurhya, Eriya wakaita rhwendo re mazuwa anokwana 40, dakara aguma ku Dunhu re Horebhi. Kweneyo, Eriya wakapinda mu bako kuti awate. Asi Djehovha ainetseka ngezva Eriya uye akamubvunzisa kuti: ‘Ngei wakatsukwara uye ngei watiza?’ Eriya wakadaira kuti: ‘Tenzi Djehovha, Aisraeri ainga akamupikirai kumunamatai. Asi awona aaripi kuita izvona. Awona akauraya aphorofita enyu uye zvino anoda kundiurayawo.’

Djehovha akakumbira Eriya kuti abude mu bako uye aende kooima pa dunhu. Ipona, Djehovha akamupangidzira simba rake. Kutanga, iyena akaita kuti mhepo ino simba ipinde no pa bako. Pedzepo akatuma cigidhi-gidhi uye muriro. Pakupedzesera, Eriya wakazwa izwi riri pasi-pasi uye rakaterama. Iyena wakafukidza hope yake uye wakabuda mu bako. Djehovha akabvunzisa Eriya kuti: Ngei watiza? Eriya wakadaira kuti: ‘Inini ndatiza ngekuti akuna umweni uri kumunamatai. Ndini basi.’ Djehovha akadaira eciti: ‘Haiwa, iwewe auripi wega. Kucino 7000 anhu ku Israeri ari kundinamata. Hino Djehovha akabvunza Eriya kuti adainze Erizeu kuti agare pa mbuto yake hinga muphorofita.’ Ciriporipoco, Eriya wakaita zviya zvaainga abvunzwa na Djehovha. Tingafundei pa zvese zvakaitika na Eriya? Kana tikarumbwa teciita zvese zvatinokumbirhwa na Djehovha, iyena acaticengeta. Zvino ngatimbohwirirei padoko sure kuti tione zvakamboizwa na Eriya.