Djehovha Akatuma Djeremiya Kooparidzira

Djehovha akasanangura Djeremiya kuti agare muphorofita ku Djudha. Djeremiya waidikana kuparidzira uye kubvunza anhu kuti asiye kuita zviro zvakashata. Asi Djeremiya wakati: ‘Djehovha, inini ndiciri mudjaha. Andizii kuti ndinobhuya kudini no anhu.’ Djehovha akadaira kuti: ‘Usathye hako Djeremiya. Inini ndinokubvunza zvaunodikana kureketa. Inini ndicakubetsera.’

Zuwa rimweni, Djehovha akatuma Djeremiya kuti aunganidze anhu anokosha e Djudha uye kuphwanya jaro ye dongo pamberi pawo. Pedzepo, Djeremiya waidikana kupanganidza kuti zvainga zvaitika no jaro ndizvoo zvaizoitikawo no Djerusarema. Iyena wakaita izvona uye anarume e ku Djudha akanyangadzwa maningi. Mupristi umweni waizwi Pasuri wakaponda Djeremiya uye osunga nyara uye no mirenje dzake pa mutanda. Djeremiya wakapedza usiku wese asikakwanisi kutsukunuka. Pa zuwa rakazoteera, iyena wakasudzunurhwa. Djeremiya wainga akatsukwara maningi zvekuti wakabhuya kuti wainga asikacadizve kuparidzira. Kodi Djeremiya wakasiyadi kuparidzira kamare? Haiwa. Iyena wakanyasa kurangarira uye wakati: ‘Soko ra Djehovha rakaita hinga muriro mu mwoyo mangu. Andikwanisi kuima kuparidzira.’ Djeremiya wakarumbwa ecingwadza anhu.

Padarika makore, mu Djudha makagara na mambo mupsva. Apristi uye aphorofita e kunyepa aizonda zvaibhuya Djeremiya. Hino awona akabvunza macinda e ku Djudha kuti auraye Djeremiya. Asi Djeremiya wakati: ‘Kana imwimwi mukandiuraya, muri kuuraya mwanarume usina ndaa. Zviro zvandinoreketa azvibvi kandiri, zvinobva kuna Djehovha.’ Macinda e ku Djudha paakazwa izvi, awona akati: ‘Mwanarume uu aasisiri kufa.’

Djeremiya wakarumbwa eciparidzira. Asi nokuhamba ke nguwa, macinda akatangawo kugara no shungu naye. Pedzepo, awona akakumbira mambo kuti auraye Djeremiya. Mambo wakaabvunza kuti awona aite zvese zvaaida naye. Hino macinda akasanangura kuuraya Djeremiya. Awona akamubata uye omukhandira mu rindi rainga rakadzika uye rakadzara no matope, imona Djeremiya wakatanga kundondomera.

Mwanarume umweni unozwi Ebhedhi-mereki paakaziya izvona, iyena wakaenda kooreketa na mambo kuti: ‘Macinda akhandira Djeremiya mu rindi! Kana iyena akasama kubuda imona, ucafa.’ Ebhedhi-mereki wakatuma anhu anokwana 30 kuti aponese Djeremiya. Kunyazi no matambudziko aainga abatana nawo, Djeremiya wakagara no ushingi uye aazi kuima kuparidzira. Uye kuzotiwo iwewe, unodawo kuita hinga iyena here?