Kutsakatiswa ke Djerusarema

Anhu e ku Djudha ainga asiya Djehovha uye ainamata anamwari e kunyepa. Ke makore akawanda, Djehovha akatuma aphorofita akawanda kuti abetsere anhu e ku Djudha. Asi anhu ainga asikadi kuzwa zvaibhuiwa no aphorofita, awona aiseka zviya zvaaibhuya. Cinyi caizoizwa na Djehovha kuti apedze kunamata ke kunyepa uku?

Pa nguwa iyona, mambo we ku Bhabhironi Nabhukodhonozori wainga ecikunda nyika dzakawanda. Iyena wakakunda Djerusarema otora Mambo Djeoyakimu, macinda, masurudado no anarume amweni akawanda ku Djudha oenda nawo ku Bhabhironi. Nabhukodhonozori wakatorawo upfumi wese wainga uri mu tempro ya Djehovha. Hino iyena wakaita kuti Zedhekiya agare mambo we Djudha pa mbuto ya Djeoyakimu.

Pakutanga, Zedhekiya waizwira mambo we Bhabhironi. Asi aphorofita e kunyepa no anhu amweni akabvunza Zedhekiya kuti asazwire mambo we Bhabhironi. Hino, Djeremiya wakaapasa ngwadzo yekuti: ‘Kana imwimwi mukasama kuzwira mambo we Bhabhironi, zviro zvakashata zvicaitika ku Djudha, anhu akawanda acafa, acagara no nzara uye acarhwara.’

Mumasure me makore 8, Zedhekiya wakasanangura kusama kuzwira mambo we Bhabhironi uye wakakumbira rubetso ku anyahondo e ku Edjipitu. Hino, Nabhukodhonozori wakatuma anyahondo ake kuti arhwise Djerusarema. Djeremiya wakabvunza Zedhekiya kuti: ‘Dzipereke ku Abhabhironi, Djehovha abhuya kuti kana ukaita kudaro, iwewe pamwepo no thaundi mucaponeswa. Asi kana iwewe ukasama kudzipereka, Abhabhironi acapisa Djerusarema uye acakusunga.’ Asi Zedhekiya wakabhuya kuti: ‘Kudzipereka, nariini!’

Mumasure me kudarika gore rimwe no hafu, Abhabhironi akakwanisa kupinda mu Djerusarema uye akapisa thaundi. Awona akapisa tempro, akauraya anhu akawanda uye akatora mamiriyonji e anhu akasungwa oaendesa ku Bhabhironi.

Zedhekiya wakatiza ku Djerusarema, asi Abhabhironi akakwanisa kumusunga uye omutora kuenda naye kuna mambo Nabhukodhonozori. Hino, mambo akaita kuti ana a Zedhekiya auraiwe pamberi pake. Pedzepo, wakaita kuti Zedhekiya agare bofu uye akamukanda mu kadheya. Zedhekiya wakagara ikona dakara afa. Asi Djehovha akapikira a Djudha kuti: ‘Kana pakadarika makore 70, inini ndicamuhwirinzai ku Djerusarema.’

Asi unozviziya here kuti madjaha manganani aida Djehovha akatorhwawo oendeswa ku Bhabhironi? Cinyi caizoitika nawo? Kodi awona aizorumbwa akatendeka kuna Djehovha here?