Madjaha Marongomuna Anozwira Djehovha

Mambo Nabhukodhonozori waida kuti macinda manganani e Djudha amuseenzere. Hino, iyena wakatuma mwanarume umweni waizwi Aspenaji kuti asanangure macinda ano uthongo wakanaka uye akangwara. Madjaha aya aizorowedzwa ke makore anokwana matatu. Macinda aidikana kufundira kuerenga, kutara uye kureketa mureketero we Bhabhironi. Uyewo aizorhya zvairhyiwa na mambo uye no ese aigara pa nyumba pa mambo. Madjaha aya marongomuna akasanangurhwa aidainzwa kuti Dhanyeri, Ananiya, Mizaeri, uye Azariya. Aspenaji wakapasa mazina mapsva ku umwe na umwe wawo. Awona akazondainzwa kuti Bheritesazari, Shadreki, Misheki, uye Abhidhinego. Kodi kurowedza kaizoizwa madjaha aya ku Bhabhironi kaizoparadzanisa ushamwari wawo na Djehovha here?

Madjaha marongomuna aya ainga akashinga kuzwira Djehovha. Awona aiziya kuti Abhabhironi airhya zvekurhya zvinorambidzwa no Mutemo wa Djehovha. Ndiyo ndaa, awona akaenda kooreketa na Aspenaji uye akamubvunza kuti: ‘Tapota, musatibambidzire kurhya zvekurhya zvinorhyiwa ndi mambo.’ Aspenaji wakaadaira kuti: ‘Asi kana imwimwi mukatama kurhya zvekurhya zvinorhyiwa na mambo uye iyena orangarira kuti pamweni muri kurhwara, inini ndinouraiwa!’

Ipona, Dhanyeri wakaenda kooreketa no mwanarume waicengeta madjaha. Iyena wakamubvunza kuti: ‘Tapota, pa mazuwa gumi basi tipasei zvekurhya zve masakani uye mvura. Mumasure me kudarika mazuwa gumi tiezanisei no madjaha amweni ari kurhya zvekurhya zvinorhyiwa ndi mambo.’ Mwanarumewo wakatenda.

Mumasure me kudarika mazuwa gumi, Dhanyeri no shamwari dzake ainga ano uthongo wakanaka kupinda madjaha amweni ese. Djehovha akapfara maningi paakaona kuzwira ke madjaha aya. Djehovha akatopasawo Dhanyeri uzii kuti azwisise zvinoreya hope dzairothwa na Nabhukodhonozori.

Awona paakapedza kurowedzwa, Aspenaji wakatora madjaha ese kuti aende pamberi pa mambo Nabhukodhonozori. Mambo paakareketa nawo, wakazwisisa kuti Dhanyeri, Ananiya, Mizaeri, uye Azariya ainga ano uzii kupinda amweni uye ainga akadjenga. Ndiyo ndaa, wakasanangura madjaha marongomuna aya kuti aende koseenza mu nyumba ya mambo. Kakawanda kakhona, mambo waikumbira maonero awo kuti agadzirise nyaya dzinokosha. Djehovha akabetsera Dhanyeri no shamwari dzake kuti agare no uzii wakakura kudarika anarume ano uzii a mambo uye no aya anoita zvemasarapita.

Dhanyeri, Ananiya, Mizaeri, uye Azariya aigara kure no abereki awo. Kunyazi zvakadaro, awona aazi kukanganwa Djehovha. Kodi iwewe ucarumbwa weciedzurira Djehovha, kunyazi abereki ako asiripi dhuze newe?