Kubarhwa ka Djesu

Mambo we Roma, Sezari Agustu, wakatuma Adjudha ese kuti aende koodzitaririsa ku thaundi raainga akabarirhwa. Ndiyo ndaa, Zuzee na Mariya akaita rhwendo re kuenda ku Bheterehema ku thaundi rakabarirhwa Zuzee. Mwana wa Mariya wainga aa dhuze kuti abarhwe.

Paakaguma ku Bheterehema, mbuto yainga iripo basi kuti awona agare yainga iri danga re zvipfuyo. Ndimona makabarirhwa Djesu. Mariya wakaputiridza mwanewo no djira uye no rudo rese wakamuradzika mu mbuto inokandirhwa zvokurhya zve zvipfuyo.

Dhuze no Bheterehema, kainga kuno aushi anganani ainga ari mushango ecicengeta mabira awo. Ciriporipoco, ngirozi yakauya pamberi pawo uye ruvheneko rakanyasa kudjeka rakatanga kunyetukira. Aushi akashamisika maningi uye ngirozi yakati: ‘Musathye. Ndiri pano kuti ndimupanganidzirei masoko akanaka. Mesiya abarhwa nyamasi ku Bheterehema.’ Pa nguwa iyona, awona akatanga kuona ngirozi dzakawanda mudenga dzeciti: ‘Mwari ngaakudzwe kumusoro-soro, uye anhu ari pa nyika ngaagare mu runyararo.’ Hino, aushi akaitei mumasure mekuti ngirozi dzangara-ngara?

Awona akabvunza adoni awo kuti: ‘Ngatiende zvino ku Bheterehema.’ Ciriporipoco, aushi akaenda ku Bheterehema uye akagumira Zuzee na Mariya no mwana wawo mu mbuto inocengeterhwa zvipfuyo.

Aushi paakapanganidza zvese zvainga zvabhuiwa no ngirozi, anhu ese akashamiswa. Mariya wakagara ecirangarira zviya zvainga zvabhuiwa no ngirozi uye aazi kuzvikanganwa. Aushi akahwirira kainga kuno mabira awo ecitenda Djehovha nge zviro zvese zvaainga aona uye kuzwa.