Djehovha Akadziirira Djesu

Usiku umweni anarume aigara kure no Israeri, akaona ciedza cecidjeka kudenga. Caiita hingana ciedza co nyeredzi. Awona aitenda kuti nyeredzi dzaikwanisa kutungamirira uye kubetsera anhu. Ndiyo ndaa, akasanangura kuiteera. “Nyeredziyo” yakatora anarumewo ndakara ku Djerusarema. Paakaguma ikona, awona akabvunzisa anhu kuti: ‘Aripi mwana wabarhwewo kuti agare mambo we Adjudha? Isusu tinoda kumupasa zvipo.’

Herodhi mambo we Djerusarema, aazi kutopfarira kuzwa kubhuya ngezve mambo umweni. Hino wakadainza apristi uye wakaabvunzisa kuti: ‘Mambo uu waizobarirhwa kupi?’ Apristi akamubvunza kuti: ‘Waizobarirhwa ku Bheterehema.’ Herodhi wakadainza anarume akabva kure uye wakaabvunza kuti: ‘Endai ku Bheterehema koopsvaka mwanewo. Pedzepo, uyai kuzondibvunza kuti ari kupi. Ngekuti inini ndinodawo kuenda koomuvhakacira.’ Asi Herodhi wainga ecinyepa.

Mumasure mazvo, anarume akarumbwa eciteera “nyeredziyo” dakara aguma ku Bheterehema. Pedzepo, “nyeredziyo” yakanyasa kuima pamusoro pe nyumba. Anarumewo akapinda uye akagumira Djesu na mai ake Mariya. Awona akagodama pamberi pa Djesu uye akamupasa zvipo zvinodhura. Asi ndi Djehovha akatuma anarume aya kuti aende koopsvaka Djesu here? Haiwa.

Pa usiku uwona, Djehovha akabvunza Zuzee mu hope kuti: ‘Herodhi urikuda kuuraya Djesu. Tizira ku Edjipitu pamwepo na Mariya uye na Djesu.’ Zuzee wakatizira ku Edjipitu pamwepo no mhuri yake panguwa iyona kamare.

Djehovha akabvunza anarume ainga abva kure kuti asacedzezve na Herodhi. Herodhi paakaona kuti anarume aya ainga asikacahwiriri, iyena wakanyangadzwa maningi. Ngekuti ainga asikazi kugumira Djesu, Herodhi wakatuma anhu kuti auraye ana ese e anarume ku Bheterehema ainga ano mathunga a Djesu. Asi Djesu wainga akatodziirirhwa ku Edjipitu.

Paa padarika nguwa, Herodhi wakafa. Djehovha akabvunza Zuzee kuti: ‘Pari zvino mungahwirira henyu.’ Hino Zuzee, Mariya, uye na Djesu akahwirira ku Israeri uye akaenda koorarama ku thaundi ro Nazareta.