Djesu Anoenda mu Tempro

Zuzee na Mariya aigara ku Nazareta pamwepo na Djesu uye no ana awo e anarume uye e anakadzi. Zuzee waiseenza hingana karpintero uye waifundisa mhuri yake ngezva Djehovha uye ngezve Mitemo yake. Nguwa dzese, mhuri ya Zuzee yaienda ku sinagoga koonamata Mwari uye makore ese aiita rhwendo rakakura kuti aende pa mutambo we Paskwa ku Djerusarema.

Djesu paainga ano makore 12, iyena no mhuri yake akaita rhwendo kuti aende ku Djerusarema. Thaundi rainga rino anhu akawanda nge ndaa ye paskwa. Paskwa peyakapera, Zuzee na Mariya akatanga kuita rhwendo rawo kuti ahwirire kumba ari pamwepo no cikwata ce anyaukama. Awona airangarira kuti Djesu ainga ari pa cikwateco. Asi paakaenda koopsvaka Djesu, aazi kumuona.

Hino Mariya na Zuzee akahwirira ku Djerusarema uye akapsvaka Djesu kemazuwa matatu, asi aazi kumuona. Pedzepo, awona akasanangura kuhwirira ku tempro. Uye ndimo maakagumira Djesu. Iyena ainga ari pakati pe afundisi, ecipurutana zviya zvaaifundisa ngezva Mwari uye eciaita mibvunzo. Afundisi akashamisika maningi zvekuti akatanga kuita Djesu mibvunzo. Uye awona aipfarira mhinduro dza Djesu. Awona akazwisisa kuti Djesu aizwisisa zvakanaka Mitemo ya Djehovha.

Zuzee na Mariya ainga ecinetseka maningi. Mariya wakati: “Mwanangu, wainga uri kupi? Isusu tainga tecikupsvaka!” Djesu akadaira kuti: ‘Inini ndainga ndiri pano pa nyumba ya Baba angu.’

Djesu akahwirira ku Nazareta pamwepo no abereki ake. Ikona Zuzee wakafundisa Djesu basa re ukarpintero. Djesu akarumbwa ecikura uye uzii wake wakarumbwa wecitunhudzira. Anhu airumbwa ecipfarira Djesu uye Djehovha aipfara nge ndaa ye zviya zvaiizwa na Djesu. Unorangarira kuti Djesu ainga ano maitiro akadini paainga ari mwana mudoko?