Djesu Anoporesa Bofu

Afarisi aizonda Djesu uye aipsvaka mukana kuti amusunge. Awona akabhuya kuti Djesu ainga asikadikani kuporesa anhu pa zuwa re Sabudu. Hino, Sabudu rimweni, Djesu akaona mwanarume umweni wainga ari bofu e cikumbira mare uye akabvunza afundi ake kuti: ‘Onai kuti simba ra Mwari ricabetsera kudini mwanarume uu.’ Hino, Djesu akakanya mataka paakapfirira uye akatora matakewo otsurutsuta mumadziso e mwanarume uu. Uye akamubvunza kuti: ‘Enda kookarawa hope mu dziya ro Sirowe.’ Mwarumewo wakaita zvaainga abvunzwa na Djesu. Hino, aka kainga kari kekutanga mwarume uu kuona mu upenyu wake.

Anhu aitenderapi uye aibvunzisa kuti: ‘Ndiye Mwanarume uya wakabarhwa ari bofu?’ Mwanarumewo waidaira kuti: ‘Honde ndini!’ Anhuwo aimubvisa kuti: ‘Hino, madziso ako afunguka kudini?’ Mwanarume uu paakapanganidza zvainga zvaitika, awona akamutora oenda naye kune Afarisi. Mwanarumewo wakapanganidza ku Afarisi kuti wainga aporeswa kudini. Mutemo wa Mwari waibhuya kuti: ‘Apana munhu waidikana kuseenza mu Sabudu!’ Ndiyo ndaa, Afarisi anganani akabhuya kuti: ‘Hino kana Djesu eciporesa mu Sabudu, simba rake aribvi kuna Mwari.’ Asi Afarisi amweni aibhuya kuti: ‘Kudai simba rake risikabvi kuna Mwari, ainga asikazokwanisi kuporesa.’

Ipona, Afarisi akadainza abereki e mwanarume uu uye akaabvunzisa kuti: ‘Zvakahamba kudini kuti mwana wenyu atange kuona?’ Abereki ake akatanga kuthya maningi. Awona ainga asikadi kudzingwa musinagoga no Afarisi. Ndiyo ndaa, awona akabhuya kuti: ‘Atizvizii, mubvunzei.’ Hino, Afarisi akaendazve koita mibvunzo ku mwanarume uya. Iyena wakadaira kuti: ‘Inini ndamubvunzai kare, asi imwimwi amuzi kuzwa.’ Afarisi akanyangadzwa maningi uye akadzingira mwanarumewo mu sinagoga.

Djesu akazwa kuti ainga amudzingira uye akaenda koobhuya no mwanarumewo, eciti: ‘Iwewe unotenda muna Mesiya here?’ Mwanarumewo wakadaira kuti: ‘Ndaizotenda maari kudai ndaimuziya.’ Djesu akadaira kuti: ‘Ndini Mesiya.’ Zvezvirokwazvo mumasure me kuzwa izvona, mwanarume uya wakagara no kutenda. Djesu aazi basi kuporesa mwanarumewo, asi akamubetserawo kuti agare no kutenda.