Djesu Anomutsa Razaro

Djesu ainga ane shamwari dzake nhatu dzaigara ku thaundi ro Bhetanya. Shamwari dzakhona ndi Razaro uye no hanzvadzi dzake mbiri, Mariya na Marta. Zuwa rimweni, Djesu ainga ari ku thaundi riri kure no Bhetanya. Pedzepo, iyena akatambira masoko aibva kuna Mariya na Marta aiti: ‘Razaro ari kurhwara maningi. Tapota, uyai nokukasika!’ Asi Djesu akanonoka kuendeyo. Mumasure me mazuwa mairi, iyena akabvunza afundi ake kuti: ‘Hambai ku Bhetanya. Razaro ari kuwata, asi inini ndiri kuenda ikona kuti ndimumutse.’ Afundi akamubvunza kuti: ‘Kana iyena ari kuwata, acatamba.’ Paakaona kuti afundi ainga asikazi kuzwisisa, Djesu akati: ‘Razaro wafa.’

Djesu paakaguma ku Bhetanya, painga padarika mazuwa 4 Razaro afa. Anhu akawanda ainga ari ikona kuti anyaradze Marta na Mariya. Marta paakaziya kuti Djesu ainga aguma, iyena wakagogoma dakara kaari uye wakabhuya kuti: “Tenzi, kudai mainga muri pano, hama yangu ingadai isikazi kufa.” Djesu akamubvunza kuti: ‘Hama yako icamuka, Marta. Iwewe unozvitendera here?’ Marta wakamudaira kuti: ‘Ndinozviziya kuti iyena acamuka pa zuwa rekupedzisira.’Djesu akamubvunza kuti: “Inini ndini rumuko uye upenyu.”

Pedzepo, Marta wakaenda kuna Mariya omubvunza kuti: ‘Djesu auya.’ Mariya wakagogoma ecienda kuna Djesu uye anhu akamuteera. Mariya ecicema, wakagodama pa tsoka dza Djesu uye wakati: ‘Tenzi, kudai mainga muri pano, hama yangu ingadai isikazi kufa.’ Djesu pakaona Mariya ecicema, iyena akatangawo kucema. Anhu paakaona Djesu ecicema, akabhuya kuti: ‘Onai mushobo waida Djesu Razaro.’ Asi anhu anganani aidzibvunzisa kuti: ‘Ngei Djesu ainga asikazi kuita ciito kuti aponese Razaro?’ Asi Djesu akazoitei?

Djesu akaenda ku guwa ra Razaro uye akakumbira kuti abudise buwe guru rainga riri pa musuwo pe guwa. Uye Marta wakabhuya kuti: ‘Pamweni iyena waakunuhwa ngekuti padarika mazuwa 4.’ Kunyazi zvakadaro, awona akabudisa buwero. Pedzepo, Djesu akanamata eciti: ‘Baba, ndinomutendai ngokuti mandizwa. Zvezvirokwazvo, ndinoziya kuti imwimwi munogara mecindizwa; asi ndareketa izvi nge ndaa yo anhu akandiunganira pano, kuitira kuti atendere kuti imwimwi makandituma.’ Mumasure mekuti abhuya izvi, iyena akadainzira no izwi guru eciti: “Razaro, buda kunza!” Pedzepo, pakaitika ciro cinoshamisa: Razaro wakabuda mu guwa. Djesu akaabvunza kuti abudise macira ainga akapomberedza Razaro.

Anhu akawanda akaona cishamiso ici, akatanga kutenda muna Djesu. Asi amweni akaenda koobvunza izvi Afarisi. Awona akanyangadzwa maningi zvekuti akatosanangura kuda kuuraya Razaro na Djesu. Pasina munhu waizviziya, Djudhasi Iskariyoti, umwe we aphostori 12 wakaenda kune Afarisi uye wakaabvunzisa kuti: ‘Kana ndikamubetserai kuti mubate Djesu, mucandipasa marei?’ Awona akamugondesa kuti aizomupasa mare ye prata inokwana kuita 30. Hino, Djudha wakarumbwa ecipsvaka mukana wekuti apereke Djesu ku Afarisi.