Djesu Anosungwa

Djesu no aphostori ake anoenda ku Dunhu re Miorivhi. Painga pari pakati pe usiku uye mwedzi wainga wakadzara. Paakaguma mu munda we Getsimani, Djesu akabvunza afundi ake kuti: ‘Garai pano murumbwe makarinda.’ Iyena ainetseka maningi. Pedzepo, akatarauka padoko osiya aphostori ake, ogodama uye akanamata eciti: “Kuda kenyu ngakuizwe.” Hino, Djehovha akatuma ngirozi kuti ibambise Djesu. Pedzepo, Djesu akahwirira uye akaona kuti aphostori ainga eciwata. Djesu akabhuya kuti: ‘Mukai! Ii anguwapi ye kuwata! Azondi angu aakuguma kuti andisunge.’

Pasikazi kutora nguwa yakareba, Djudhasi wakaguma no cikwata ce anhu ainga ano masupada no mipini. Djudhasi waiziya kuti Djesu aizonga ari ikona, ngokuti kakawanda kakhona iyena aienda ikona no aphostori ake. Djudhasi wakapangana no masurudado kuti waizopangidza kuti Djesu ainga ari upi. Hino Djudhasi wakaguma painga pana Djesu uye wakamupsvoda. Djesu akabhuya kuti: ‘Djudhasi, iwewe urikunditengesa ngekundipsvoda here?’

Pedzepo, Djesu akabvunzisa anhu aya kuti aipsvaka ani. Awona akadaira kuti: “Djesu we ku Nazareta.” Hino, Djesu akabhuya kuti: “Ndini.” Azondi a Djesu akashamisika maningi zvekuti akahwirira sure uye akambwera pasi. Pedzepo, Djesu akabvunzisazve anhu kuti: “Muri kupsvaka ani?” Awona akadairazve eciti: “Djesu we ku Nazareta.” Hino, Djesu akabhuya kuti: ‘Ndamubvunzai kare kuti ndini. Siyai kuti afundi angu aende.’

Pedru paakaona zvaiitika, iyena wakabata supada uye wakaceka nzee ye mwanarume umweni waizwi Mariko. Asi Djesu akabata nzee ya Mariko uye akamuporesa. Pedzepo, Djesu akabvunza Pedru kuti: ‘Cengeta supadeyo. Munhu wese unoseenzesa supada, ucauraiwa no supada.’ Masurudado akasunga nyara dza Djesu uye aphostori akatiza. Hino Djesu akatorhwa kuti aende kuna Anasi, mupristi mukuru. Anasi wakaita mibvunzo dzakawanda kuna Djesu uye wakamuendesa ku nyumba ya Kaifasi, Mupristi Mukuru. Asi cinyi cakazoitika no aphostori?