Pedru Unoramba Djesu

Djesu paakabvunza aphostori ake ese kuti pa usiku uwona aizomusiya, Pedru wakadaira eciti: ‘Inini andizoiti izvona!’ Djesu akamubvunza kuti: ‘Djongwe risati rarira, ucadiramba katatu.’

Pa nguwa yakazoteera, masurudado paakatora Djesu kuti aende naye kumba ka Kaifasi, aphostori ake akawanda akatiza. Asi Pedru uye no aphostori amweni akamuteera nge cekure. Pedru wakapinda pa ruwanze re nyumba ya Kaifasi uye wakagara dhuze no coto ce muriro. Ciedza comuriro pacakatunga ku hope ya Pedru, muranda umweni we mwanakadzi wakamuziya uye wakamubvunza kuti: ‘Iwewe waihambawo na Djesu.’ Pedru wakati: ‘Inini, andinipi, iwewe uri kundirangaridzira no munhu umweni.’

Hino, Pedru wakaenda dhuze no pamusuwo we ruwanze. Asi museenzi umweni we mwanakadzi wakamuona uye wakabvunza anhu ese ainga ari ipona kuti: ‘Munhu uyu waihambawo na Djesu.’ Asi Pedru wakati: ‘Inini adimuzii Djesu!’ Ipona, mwanarume umweni wakamukhwederera womubvunza kuti: ‘Iwewe uri umwe wawo! Mushobo wako we kureketa ngewe ku Garireya, wakaezana no wa Djesu.’ Asi Pedru wakapika eciti: ‘Anditombomuzii.’

Pa nguwa iyona, djongwe rakarira. Djesu akatenderuka uye akaringira Pedru. Ipona, Pedru wakaedzurira zvainga zvabhuiwa na Djesu. Pedru wabuda ipona uye watanga kucema maningi.

Izvona pazvaiitika, atungamiriri e apristi uye anhu amweni, akaungana kuti atonge Djesu mu nyumba ya Kaifasi. Awona ainga akatoronga kare kuuraya Djesu, asi kuti izvona zviitike, paidikana kugara no upupuri unopangidza kuti Djesu ainga ano ndaa. Awona aazi kuzvikwanisa, ngokuti Djesu ainga asikazi kuita ciro cakashata. Hino, Kaifasi wakabvunzisa Djesu kuti: ‘Ndiwe Mwana wa Mwari here?’ Djesu akadaira eciti: ‘Honde.’ Kaifasi wakabhuya kuti: ‘Aticadizve upupuri umweni. Iyena atuka Mwari.’ Ese akatenderana nazvo eciti: ‘Munhu uu unodikana kufa.’ Awona akaponda Djesu, akamupfirira mata uye akamufukidza ku hope omuponda, eciti: ‘Kana iwewe uri muphorofita, tibvunze kuti ndiani akuponda.’

Pakainga kaedza, Kaifasi no anarume amweni akaungana uye akabvunzisazve Djesu kuti: ‘Uri Mwana wa Mwari here?’ Djesu akadaira eciti: ‘Imwimwi ndimwi murikutozvibhuya.’ Hino, anarume aya akabhuya kuti Djesu ainga ano ndaa yekubhuya zvakashata ngezva Mwari. Pedzepo, awona akatora Djesu oenda naye kumba ka Ponsiyo Pirato wainga ari mutungamiriri we Roma. Cinyi cicaitika na Djesu? Ngationei.