Kufa ka Djesu

Atungamiriri e apristi akatora Djesu oenda naye kumba ka Pirato. Pirato wakabvunzisa kuti: ‘Kodi munhu uu ano ndaa yei?’ Atungamiriri akabhuya manyepo akawanda ngezva Djesu uye akatobhuyawo kuti aida kutogara mambo. Hino Pirato wakabvunzisa Djesu kuti: “Ndiwe Mambo we Adjudha here?” Djesu akamudaira eciti: “Umambo wangu auiti dii re nyika ino.”

Pirato wakaona kuti Djesu ainga asikazi kuita ciro cakashata uye wakamuendesa kuna Herodhi mutungamiriri we ku Garireya. Asi Herodhi aazi kona cakashata kuna Djesu uye wakamuendesazve kuna Pirato. Hino, Pirato wakabvunza anhu kuti: ‘Inini na Herodhi atizi kuona ndaa ku munhu uu. Ndiri kumusudzunura.’ Asi anhu aazi kuzvipfarira uye akatanga kukhuwa eciti: ‘Muuraiyei. Muurayei!’ Pedzepo, masurudado akatanga kuponda Djesu no mushamu we mapote, akamupfirira uye akamuponda mbama. Masurudado akakanda mu musoro ma Djesu korowa ye minzwa uye akatanga kumuseka eciti: “Mucaita wani Mambo we Adjudha!” Pirato akabvunzazve anhu ese kuti: ‘Andiripi kuona ndaa ino mwanarume uu.’ Asi anhu akarumbwa ecibhuya kuti: “Ngaakhomerhwe pa mutanda!” Hino Pirato wakasiya kuti Djesu auraiwe.

Djesu akatorhwa kuti aende ku mbuto imweni inozwi Gorokota. Pedzepo, awona akakhomera murenje dzake uye nyara dzake pa mutanda. Djesu akanamata eciti: “Baba, arekererei, ngokuti awona aazvizii zvaari kuita.” Anhu akarumbwa eciseka Djesu, ecibhuya kuti: ‘Kana uri Mwana wa Mwari, cita pa mutanda. Dziponese.’

Pa dii rainga rakakhomerhwa Djesu, painga pano mbavha yainga yakakhomerhwawo pa mutanda. Mbavheyo yakabvunza Djesu kuti: “Ndiedzurireiwo kana maa mu Umambo wenyu.” Djesu akamudaira eciti: “Ucagara na inini mu Paraizo.” Ciriporipoco, kakagara no cidima hingana usiku uye kakarumbwa kakadaro ke nguwa nhatu. Mariya mai a Djesu uye no afundi anganani ainga ari padhuzepo. Hino, Djesu akakumbira Juau kuti acengete Mariya hingana mai ake kamare.

Pakupedzesera, Djesu akabhuya kuti: “Baba, ndiri kusiya upenyu wangu mu nyara dzenyu!” Mumasure me kubhuya izvi, iyena akafa. Pa nguwa iyona, pakaitika cigidhi-gidhi cakakura maningi. Djira rainga riri mu tempro raisiyanisa Mbuto Cena no Mbuto Yakacenesesa rakamweka no pakati. Umwe we mutangamiriri we masurudado paakaona izvi, iyena wakati: ‘Zvezvirokwazvo uu wainga ari Mwana wa Mwari.’