Mungaitei Kuti Mhuri Yenyu Ipfare?—Dii 2

Ana i zvipo zvinobva kuna Djehovha. Ndiyo ndaa iyena anoetsera abereki acengete cipo icona. Djehovha anopasa abereki mazano ano ungwaru kuti akwanise kuzviita. Mazano a Mwari anobetserawo ana kuti aitewo kuti mhuri ipfare.

1. Djehovha anopasa abereki mazano api?

Djehovha anoetsera kuti abereki ade ana awo uye kuti aone nguwa yakawanda yekugara nawo. Iyena anodawo kuti abereki adziirire ana awo uye aseenzese mazano ari mu Bhaibheri kuti aapangire. (Zvierengo 1:8) Iyena anoti ku abereki: “Arerei meciapangira uye meciafundisa maererano no zvinodiwa na Djehovha.” (Erengai Aefeso 6:4.) Djehovha anopfara paanoona abereki eciteerera zvaanobhuya pakurera ana awo oga haiwa kusiya anhu amweni kuti aarere.

2. Djehovha anopasa ana mazano api?

Djehovha anobvunza ana kuti: “Purutanai abereki enyu.” (Erengai Akorosi 3:20.) Ana paanoreremedza uye paanopurutana abereki awo, anoita kuti Djehovha apfare uye anotopfadzawo abereki awo. (Zvierengo 23:22-25) Izvona ndizvo zvaiizwa na Djesu paainga aciri mwana mudoko. Kunyazi hake akabarhwa asina citema, iyena aipurutana uye aireremedza abereki ake.—Ruka 2:51, 52.

3. Mungaitei kuti mhuri yenyu ikhwedere dhuze na Mwari?

Kana muri mubereki, zviri pamhene kuti munodawo kuti ana enyu ade Djehovha hinga zvamunoita. Mungazviita kudini? Bhaibheri rinoti: “Unodikana kurumbwa weciphinda-phinda [masoko a Djehovha] ku ana ako, wecireketa nge zvawo paunogara mumba mako uye paunohamba mu gwanza.” (Dheuteronomiyo 6:7) Tsamba ii yaseenzesa soko rekuti “kuphinda.” Pamweni munotoziya kuti ana anoda kurumbwa ecindobvunzwa ciro kuti arumbwe eciciedzurira. Tsamba ii inoreya kuti munodikana kupsvaka mikana yekugara mecireketa no ana enyu nge zva Djehovha. Zvakanaka maningi kuti mupsvake nguwa ma sumana ari ese kuti munamate Djehovha se mhuri. Kunyazi musina ana, zvakanaka maningi kuti mupsvake nguwa ma sumana ari ese kuti mufunde Soko ra Mwari.

FUNDAI ZVAKAWANDA

4. Pangirai ana enyu no rudo

Kupangira ana akuripi nyore. Bhaibheri ringabetsera kudini? Erengai Tiyago 1:19, 20, pedzepo cedzai nge zve mibvunzo dzinoteera:

• Abereki angapangidza kudini rudo paanoreketa no ana awo?

• Ngei abereki asikadikani kupangira ana awo akatsukwara?a

5. Dziirirai ana enyu

Kuti mudziirire ana anyu, zvinokosha kuti muafundise zvinorekethwa ne Bhaibheri nge zve shwiro dze pa maponde, kunyazi mecipsveruka kureketa nge zvazvo. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Wakai Nyumba Yakabamba Dziirirai Ana Enyu pa Zviro Zvakashata (2:58)

• Ngei zvecishupha kuti abereki acedze no ana awo nge zve shwiro dze pa maponde?

• Abereki amweni akareketa no ana awo nge zve shwiro dze pa maponde nge gwanza ripi?

Hingana zvakarekethwa no uphorofita, nyika ya Sathani irikubambirira kushata. Erengai 2 Timoti 3:1, 13, pedzepo cedzai nge zve mubvunzo unoteera:

• Vhersikuro 13 inobhuya nge zve anhu akashata, uye tinoziya kuti amweni awo anodzipa ana. Hino, ngei zvecikosha kuti abereki afundise ana awo zvinorekethwa no Bhaibheri nge zve maponde uye kuti angadzidziirira kudini kuti asadziphwe?

Maizviziya here?

Apupuri a Djehovha ano mabhuku akawanda anobetsera abereki kuti arekete no ana awo nge zve shwiro dze maponde uye kuafundisa kuti angadzidziirira kudini kuti asadziphwe. Onai zvimweni zvakhona:

• Dziirirai Ana Enyu (vhidhiyo)

• Fundai Kumufundisi Mukuru, fundo 10 uye 32

• Fundisai Mwana Wenyupa Nyaya Dze Pamaponde (Mukai! N.° 5 2016)

6. Reremedzai abereki enyu

VHIDHIYO: Ndingareketa Kudini no Abereki Angu? (2:19)

• Ngei zvecikosha kuti ana arekete no abereki awo no rureremedzo?

• Mwana ungapangidza kudini kuti urikureketa no abereki ake no rureremedzo?

Erengai Zvierengo 1:8, pedzepo cedzai nge zve mubvunzo unoteera:

• Mwana unodikana kudaira kudini abereki ake paanonga ecimupangira?

7. Namatai Djehovha pamwepo se mhuri

Mhuri imwe na imwe ye Apupuri a Djehovha inopsvaka zuwa rimwe pa sumana kuti ifunde Bhaibheri pamwepo. Izvona zvinozwi kunamata ke mhuri. Mungaitei pakunamata ke mhuri? Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Kunamata ke Mhuri—Kuno Basa Asi Kunomakomborero (8:04)

• Mhuri ingaita kudini kuti igare yeciita kunamata ke mhuri?

• Abereki angaita kudini kuti zviro zvinoizwa pakunamata ke mhuri zvipfadze uye zviseenzeswe mu penyu?—Onai mufanikiso uri panotangira fundo ino.

• Zvitsinzwa zvipi zvingaita kuti musaite kunamata ke mhuri?

Djehovha aietsera kuti mhuri dze Aisraeri dzigare dzecireketa zviri mu Matarhwa. Erengai Dheuteronomiyo 6:6, 7, pedzepo cedzai nge zve mubvunzo unoteera:

• Mungaseenzesa kudini zviri mu tsamba ii?

Zvamungaita pakunamata ke mhuri:

• Gadzirirai misangano ye ungano.

• Erengai uye cedzai nge zve shwiro dziri mu Bhaibheri dzinopfadza mhuri yenyu.

• Kana mune ana adoko seenzesai mazano ari pakazwi Mabasa Ekuita mu jw.org.

• Kana mune arumbwana no asikana cedzai nge zve fundo dziri pakazwi “Vechidiki Vanobvunza Kuti” dziri pa jw.org.

• Itai mitambo dze ngano dziri mu Bhaibheri no ana enyu.

• Onai mavhidhiyo ari pa jw.org pedzepo cedzai zviya zvamaona.

MUCIGWAGWA

Djehovha anoda kuti abereki ade ana awo, aapangire, uye aadziirire; anodawo kuti ana areremedze abereki awo uye aapurutane; uye anoda kuti mhuri dzinamate dziri pamwepo.

Mibvunzo yekuhwirinzira

• Abereki angapangira kudini ana awo uye angaita kudini kuti aadziirire?

• Ana angapangidza kudini kuti anokudza abereki awo?

• Zvakanakira papi kugara no nguwa yamunotoziya kuti ngeyekunamata ke mhuri pa sumana?

ZIYAI ZVAKAWANDA

I fundo dzipi dzingazobetsera ana enyu kana akakura?

“Zviro 6 Zvinodikana Kufundiswa Ana” (Mukai! N.° 2 2019)

Erengai muone kuti Bhaibheri rinobhuyei ku anhu anonga ecicengeta cemberi.

“Bhaibheri Rinotii Ngezve Kucengeta Abereki Akura?” (Fundo ye mu saite, mu ciShona)

Onai kuti mwanarume umweni wainga asikazii kuti ana anorerhwa kudini wakazogara kudini baba akanaka.

Djehovha Akatifundisa Kurera Ana Edu (5:58)

Onai kuti abereki angaita kudini kuti agare shamwari dze pa dhuze dze ana awo.

“Abereki Angarumbwa Kudini Ari Shamwari dze Ana Awo?” (Murindiri wa 1 ya Novembro wa 2011, um ciShona)