Kudimurhwa

Matsamba e Bhaibheri Anobetsera pa Kurarama ke Cikristu, acamubetserai kuti mugumire mavhersikuro no ngano dze Bhaibheri dzicamubetserai kuti mukwanisane no zvinetso zvo zuwa no zuwa. Bhuku iri ricamubetserawo kuti mugumire dii ramunoda re Bhaibheri kuti mubambise amweni uye muakohomedzese kuti aite zvisananguro zvinokudza Djehovha. Kana mukakwanisa kugumira nyaya yamunoda, siyai kuti mibvunzo no zvinoreketwa mu ngano dze Bhaibheri dzimutungamirire. (Onai bhokisi rakazwi: “Mushobo Wamungaseenzesa Bhuku Iri.”) Nokukasika imwimwi mucagumira tsamba dzakawanda dze Bhaibheri dzingamubetserai kuona mazano uye nyaradzo. Imwimwi mucagumirawo mafundo amungacedza no amweni ngezvawo kana kuti mavhersikuro e Bhaibheri angamupfadzai, angamubetsera kuti mugadzirise matambudziko enyu, angamupasai mazano uye kumubambisai.

Mushobo Wamungaseenzesa Bhuku Iri

Kuti mugumire nyaya yamurikuda, imwimwi mungaseenzesa pakazwi kukwarakwatisa kana kuti mungakwarakwatisa meciseenzesa matii. Matsamba e Bhaibheri Anobetsera pa Kurarama ke Cikristu rakasiyaniswa nge matii manomwe: Matambudziko, Maitiro, Ungano, Upenyu we zuwa no zuwa, Mhuri, Ukama Wedu na Djehovha, uye Mawara. Nyaya dzakawanda dzicange dziri pasi pe matii aya. Sanangurai dii ramunoda uye sanangurai musoro wamurikupsvaka. Asi kana mukasama kuziya kuti nyaya yamuri kupsvaka iri pa dii ripi, bayai pakazwi ESE kuti musanangure misoro yese dakara magumira nyaya yamurikupsvaka. Pa nyaya imwe na imwe, imwimwi mucagumira mutsetse yakasvipirira. Mitsetse imweni inonga yeciafirmari; uye mitsetse dzimweni dzinonga dziri mibvunzo. Pamunoerenga mavhersikuro akasvipirira anooneka mumasure me mitsetse, rangaridzai kuti mavhersikuro awona anotsigira kudini ma afirmasau kana kuti anodaira kudini mibvunzo. Nyaya dzimweni dzinonga dzakaparadzaniswa nge matii kuti dzimubetsere kugumira nokukasika nyaya yamurikupsvaka. Nguwa dzimweni, pano tsamba dzimweni dze Bhaibheri dzino masoko akazwi: “Onaiwo.” Mavhersikuro awona anopasa marangariro anocokuita no nyayeyo. Mumigariro dzakawanda, imwimwi mucagumira mundandanda we “Ngano dze Bhaibheri dzinokosha.” Mumasure me mundandanda uwona, mucaona mitsetse inopanganidza ngo mucigwagwa ngezve fundo guru re mavhersikuro aya. Mitsetse iyona icamubetsera kuti muziye zviro zvamungarangaridza pamunonga mecierenga mavhersikuro aya.

Bhuku iri aripanganidzi tsamba dzese ngezve nyaya imwe na imwe. Asi irona rakagadzirhwa kuti rimubetserei kuona tsamba dzingamubetserai uye pedzepo kuona kuti mungaseenzesa kudini maferamenta amweni kuti mufunde zvakawanda kana zvecidikanwa. (Zvie 2:1-6) Kuti munyase kuziya zviro zvakawanda pa fundo yenyu, seenzesai mareferensiya uye masoko e pasi e kufunda e Shanduro yeNyika Itsva yeMagwaro Matsvene. Seenzesaiwo Bhuku Rinobatsira Zvapupu zvaJehovha Pakutsvakurudza kana kuti Índice das Publicações da Torre de Vigia kuti mufunde zvakawanda ngezve zvinoreiwa no tsamba ye Bhaibheri kana kuti kuseenzeswa kaingaizwa. Psvakai zviro zvabva kubudiswa kuti mugumire mazwisisiro mapsva e zvokwadi zvisikacinji zvo Bhaibheri.

Tinoetsera kuti Matsamba e Bhaibheri Anobetsera pa Kurarama ke Cikristu acamubetserai kuti mugumire ungwaru, uzii uye kuzwisisa zviri mu Matarhwa Macena. Pamunoseenzesa bhuku iri, imwimwi mucanyasa kugara no rugondo rokuti “soko ra Mwari ripenyu uye rino simba.”—Ahe 4:12.