Janero

Djesu “akaona” mai aicema uye pedzepo “iyena akaazwira usisi.” (Ruka 7:13) Asi Djesu aazi kuazwira basi usisi, iyena akaapangidzira usisi. Iyena akareketa no mwanakadziwo uye pamweni akatoreketa no izwi rinobambisa eciti: “Musaceme.” Pedzepo, iyena wakatanga kuita ciito cekuabetsera. Iyena akamutsa mwana wa mai aya uye “omuendesa kuna mai ake.” (Ruka 7:14, 15) Tingafundei kubva pa cishamiso ca Djesu cekumutsa mwana we mufirhwakadzi? Tinofunda kuti tinodikana kupangidza usisi ku aya akafirhwa nge adiwa awo. Hingana Djesu tinodikana kugara anhu anoona kuti tipangidzire usisi aya anonga afirhwa. Tingatanga isusu kusanangura kana kuita ciro cingaabetsera uye kuanyaradza. (Zvie. 17:17; 2 Ako. 1:3, 4; 1 Ped. 3:8) Kunyazi masoko ari nyore uye zviro zvidoko zvatinoita zvingakwanisa kuabambisa nokuanyaradza maningi. w23.04 mapaji. 5-6 mandi. 13-15

Kunyazi Djesu aitoziya kuti shamwari yake Razaro yainga yatobva kufa, iyena akaetsera mazuwa mairi kuti aende ku Bhetaniya. Hino Djesu paakaguma ku Bhetaniya, Razaro wainga aano mazuwa marongomuna afa. Asi ngei Djesu akaetsera nguwa yese ii? Ngekuti pane kuti abetsere shamwari dzake, iyena aida kuita zviro zvinokudza Djehovha Mwari. (Juau 11:6, 11, 17) Ngano ii inotifundisawo nge zve ushamwari. Cimborangarirai zvinoteera: Mariya na Marta paakatumira masoko kuna Djesu, awona aazi kukumbira kuti iyena aende ku Bhetaniya. Awona caakaita kuziisa basi kuti shamwari yenyu ye pamwoyo irikurhwara. (Juau 11:3) Kusiya izvona, Djesu kudai akatomutsa Razaro ngece kure. Kunyazi zvakadaro, iyena wakasanangura kuenda ku Bhetaniya koogara no shamwari dzake Marta na Mariya. Imwimwi muno shamwari yakadaro here yakagadzirira kumubetsera kunyazi musikazi kuikumbira? Hino imwimwi mucagonda kuti shamwari iyona icamubetserai kunyazi “mukabatana no matambudziko.” (Zvie. 17:17) Hingana Djesu, tingakwanisa kugara shamwari yakadaro ku anhu amweni! w23.04 paji. 10 mandi. 10-11

Patinonga tecibatana no mugariro unoshupha, tingatanga kurangarira kuti nyika yakagondeswa na Djehovha aizombofi yakauya. Izvona zvinoda here kubhuya kuti kutenda kedu kakaremba? Haiwa andizvopi. Rangaridzai ngezve muezaniso unoteera. Panguwa yekuti cando ciri kunyanyisa isusu tingarangarira kuti akuzombopisizve. Asi kupisa kunozondoita. Nge mushobo umwewo, patinonga takaora mwoyo, tinotanga kurangarira kuti nyika ipsva aizombogumi. Asi kana tino kutenda kakabamba, tinogara no rugondo rekuti zvipikirhwa zva Mwari zvicadzadzika. (Pis. 94:3, 14, 15; Aheb. 6:17-19) Patinorumbwa tino rugondo irona, kunamata Djehovha kucarumbwa kuri ciro cinokosha maningi mu upenyu wedu. Isusu tinodikana kugara no kutenda kakabamba kuti tiparidzire. Ku anhu akawanda, “masoko akanaka” e zve nyika ipsva ya Mwari, kaari anoti masoko aya akanaka maningi kuti agare e cokwadi. (Mat. 24:14; Ezek. 33:32) Atimbofi takatendera kuti maonero e anhu aya atikanganise. Asi kuti izvona zvisaitike tinodikana kurumbwa tecibambisa kutenda kedu. w23.04 paji. 27 mandi. 6-7; paji. 28 ndi. 14

Imwimwi makambodzibvunzisa kuti Djehovha anodairadi minamato yenyu here? Kana zviri izvona, amuripi mwega. Hama no hanzvadzi dzakawanda dzakabhuya kuti dzakambozwawo kudaro, kunyanya paaisongana no matambudziko. Izvona pazvinoitika, pamweni zvingamushuphirai maningi kuti muziye kuti Djehovha anodaira minamato yenyu. Ngei tingagonda kuti Djehovha anodaira minamato ye aseenzi ake? Bhaibheri rinotigondesa kuti Djehovha anotida maningi uye kuti tinokosha kaari. (Ajeu 2:7; 1 Juau 4:10) Ndiyo ndaa iyena anotipika kuti tikhwedere dhuze naye teciseenzesa minamato. (1 Ped. 5:6, 7) Djehovha anoda maningi kutibetsera kuti tirumbwe tecikhwedera dhuze naye uye kuti tikwanisane no matambudziko e upenyu. Mu Bhaibheri, tinogumira ngano dzakawanda dzinopangidza kuti Djehovha akadaira kudini minamato dze aseenzi ake. Pano muezaniso wamuri kurangarira here? w23.05 paji. 8 mandi. 1-4

Mariya wainga ano ushamwari wake kamare na Djehovha. Kutenda kake kainga kusikatsamiri pana Zuzee. Iyena wainyasa kuziya Matarhwa. Iyena waipsvakawo nguwa yekuti anyase kurangarira. (Ruka 2:19, 51) Apana mubvunzo kuti ngekugara munhu wakakura pakunamata, Mariya wainga ari mukadzi wakanaka. Nyamasi uno, akadzi akawanda anopeta masimba kuti ateedzere muezaniso wa Mariya. Ngo muezaniso, hanzvadzi imweni inozwi Emiko inoti: “Pandainga ndisati ndawakwa ndainga ndino urongwa wangu kamare we zviro zvekunamata. Asi pandakacata, mwamuna wangu ndiye waitiitira munamato uye waitungamirira kunamata ke mhuri. Ndakaona kuti ndainga ndaakutanga kuetsera kuti iyena andiitire zvese, asi ndakazoonawo kuti ndini ndaidikana kuriritira ushamwari wangu na Djehovha. Mazuwa ano ndaakupsvaka nguwa yekugara ndiri ndega na Djehovha ndecinamata, kuerenga Bhaibheri uye kunyasa kurangarira nge zvandaerenga.” (Aga. 6:5) Akadzi rumbwai mecipeta masimba kuti mubambise ushamwari wenyu na Djehovha, kana mukadaro, amuna enyu acagara no zvikonzero zvakawanda zvekumusimbai uye kumudai maningi.—Zvie. 31:30. w23.05 paji. 22 ndi. 6

Isusu atizi kubarhwa teciziya kuthya Djehovha; zvinoda kufundira kuzviita. Mushobo umweni wekuita izvona nge we kuona zvisikwa. Patinoona “zviro zvakaizwa” ndi Djehovha kana kuti zvisikwa, tinoona ungwaru wake, simba rake uye rudo rikuru raanaro katiri, uye izvona zvinotunhudzira rudo redu uye rureremedzo kaari. (Aro. 1:20) Kuita munamato kuna Djehovha kakawanda, nge umwe we mushobo unotunhudzira kuthya kedu Djehovha. Patinorumbwa teciita munamato kuna Djehovha, tinonyasa kumuziya. Patinoita munamato kuna Djehovha tecikumbira simba kuti tishingirire tinozwa rubetso rake, uye tinoedzurira kuti iyena ano simba zvakadini. Patinotenda Djehovha nge cibairo ce Mwana wake, tinoedzurira kuti iyena anotida zvakadini. Patinobatana no matambudziko todeketera kuna Djehovha kuti atibetsere kuti tione pokubuda napo, tinoedzurira kuti iyena ano ungwaru zvakadini. Minamato yakadai inotunhudzira rureremedzo redu kuna Djehovha uye inobambisa cisananguro cedu cekusama kuita ciro cingakuwadza ushamwari wedu naye. w23.06 paji. 15 mandi. 6-7

Djehovha ndiye basi ano citenderhwa cekugadza mutemo ku aseenzi ake, uye mutemo ii yakadjeka. Ngo muezaniso, dare rinotungamirira re muzana re makore rekutanga rakapanganidza mishobo mitatu yaizobetsera Akristu kuti arumbwe akabamba: (1) nge kuramba kunamata zvidhori, onamata Djehovha basi, (2) nge kureremedza ruceno re ngazi, uye (3) nge kutondoedza mitemo ye mu Bhaibheri ye kutama kuita uhure. (Zvii. 15:28, 29) Akristu angazwira kudini Djehovha pa mafundo matatu aya? Nge kunamata uye kuzwiraDjehovha. Iyena akabvunza Aisraeri kuti adzipire kakadzara kaari. (Dhe. 5:6-10) Paaiedzwa na Dhiyabhorosi, Djesu akabhuya pamhene kuti tinodikana kunamata Djehovha basi. (Mat. 4:8-10) Ndiyo ndaa atinamati zvidhori. Isusuwo atinamati anhu. Ngo muezaniso ationi mutungamiriri we gereja, mutungamiriri we zvematongerhwe e nyika, mugogomi uno mbiri kana kuti aembi hingana anamwari. Isusu tinonamata Djehovha basi uya “akasika zviro zvese.”—Zvak. 4:11. w23.07 mapaji. 14-15 mandi. 3-4

Nyika ino ya Sathani yakadzara no uhure uye nokuona pornografiya. (Aef. 4:19) Ndiyo ndaa zvinokosha maningi kuti tirumbwe tecithya Djehovha uye kugara kure no zviro zvakashata. Pana Zvierengo kapituro 9, tinoerenga ngezve ungwaru uye upenzi weciezaniswa no anakadzi airi. Anakadzi aya anopika aya asina maesperiensiya kana kuti aya “asina nzero dzakanaka.” Zvinoita hingana ari kubhuya kuti: ‘Uyai kumba kangu kuti murhye ciro.’ (Zvie. 9:1, 4-6) Azvinei no mupiko ungatendwa no munhu, mugumisiro ungasiyana. Ngatitange ngekuona mupiko unoizwa nge “mwanakadzi benzi.” (Zvie. 9:13-18) Iyena aapsveruki kupika aya asina ruziyo ku mabiko eciti: “Uyai kuno.” Asi mugumisiro wakhona ngaupi? “Aya asina simba mu rufu ari apo.” Pamweni imwimwi mungaedzurira kuti mu bhuku ra Zvierengo mungagumira miyezaniso yakada kutodzana na ii. Isusu tinongwadzwa ngezve mwanakadzi “usikadzibati” uye uno “uhure.” Uye tinoziiswa kuti: ‘Nyumba ye mwanakadzi uno uhure inoendesa ku rufu.’ (Zvie. 2:11-19) Zvierengo 5:3-10 ino ngwadzo imweni ngezve “mwanakadzi usikadzibati” uye inoti “makwanza ake anoendesa ku guwa.” w23.06 mapaji. 21-22 mandi. 6-7

Akuru anodikana kupasa muezaniso wakanaka pakugara anhu anozwisisa. (1 Ti. 3:2, 3) Ngo muezaniso, mukuru aadikani kuetsera kuti maonero ake nguwa dzese atendhwe ngekuti iyena ndi munhu mukuru kudarika anhu amweni. Iyena unoziya kuti mwiya wa Djehovha ungakwanisa kuseenzesa mukuru upi hake kuti arekete zviro zvingabetsera pakuita cisananguro cakanaka. Hino kana akuru akawanda, akatenderana no cisananguro cisikaposhi zvokwadi zvo Bhaibheri, mukuru unozwisisa ucatsigira cisananguro icona kunyazi iyena ecirangarira nge mushobo wakasiyana. Akristu anozwisisa anotambira makomborero akawanda. Tinogara no ushamwari wakabamba no hama uye hanzvadzi dzedu uye zvinoita kuti paoneke runyararo. Tinomupfaro uye tinomukana wekuziya anhu anotsika uye mugariro wakasiyana. Zvinopfadza kuziya kuti kunyazi no musiyano dzakawanda, isusu tinonamata Djehovha takabatana. Cinonyanya kukosha pa zvese izvi ngecekuti zvinotipfadza kuziya kuti tiri kuteedzera Djehovha anozwisisa nguwa dzese. w23.07 paji. 25 mandi. 16-17

Dhanyeri waifunda uphorofita we Bhaibheri nge cinangwa cakanaka, cekuda kuziya cokwadi. Dhanyeri waidzidodosa uye waiziya kuti Djehovha aizomubetsera kuzwisisa uphorofita we Bhaibheri kana akarumbwa ari dhuze na Djehovha uye ecimuteerera. (Dha. 2:27, 28) Dhanyeri wakapangidza kuti waidzidodosa ngokuti wakagonda rubetso ra Djehovha. (Dha. 2:18) Kusiya izvona, Dhanyeri wainyasa kufunda akangwarira. Iyena wainyasa kukwarakwatisa akangwarira uphorofita wainga wakatarhwa pa nguwa iyona. (Djer. 25:11, 12; Dha. 9:2) Isusu tingateedzera kudini Dhanyeri? Ongororai mwoyo wenyu. Fundai no cinangwa cakanaka. Imwimwi munofunda uphorofita we Bhaibheri ngekuti muri kudadi kuziya cokwadi here? Hino Djehovha acamubetsera. (Juau 4:23, 24; 14:16, 17) Asi anhu amweni anofunda Bhaibheri kuti apsvake kuziya kuti irona arizi kufemerhwa na Mwari. Mu misoro ye anhu aya anorangarira kuti munhu unozvisanangurira ega zvakanaka uye zvakashaka. Ndiyo ndaa, tinodikana kufunda Bhaibheri no zvinangwa zvakanaka. w23.08 paji. 9 mandi. 7-8

Paya patinodziezanisa no amweni tingakwanisa kuora mwoyo. (Aga. 6:4) Kana tikagara tecidziezanisa no amweni tingapedzesera tagara no bibvu uye no mwiya we makwikwi. (Aga. 5:26) Kana tikagara teciedza kuita zvinoizwa no amweni asi tisikakwanisi kuzviita, tingadzikuwadza. Uye kana ‘kuetsera ciro cozotama kuitika kunoodza mwoyo,’ cimborangarirai mushobo wazvinoodza mwoyo kuetsera ciro catinoziya kuti atikwanisi kuciita! (Zvie. 13:12) Kana tikaita izvona tingakwanisa kuora mwoyo uye toguma pakutosiya kugogoma kuti tiwine upenyu. Musaetsere kuita zviro zvakawanda kudarika zviya zvamunokumbirhwa na Djehovha. Iyena aazoetseri kuti imwimwi mupase zviya zvamusina. (2 Ako. 8:12) Uye garai no rugondo rekuti Djehovha aaezanisi zvamunoita no zvinoizwa no amweni. (Mat. 25:20-23) Djehovha anokoshesa maningi basa ramunomuitira no mwiya wese, kutenda kamunako uye kushingirira kamuri kupangidza. w23.08 paji. 29 mandi. 10-11

Djehovha akadaira cikumbiro cainga caizwa na Samusoni uye nge cishamiso akaita kuti paoneke mbuto ino mvura. Samusoni paakamwa mvura iyona, “simba rake rakahwirira uye mwiri wake wakabambazve.” (Ato. 15:19) Zvinoita hingana kuti mbuto ii yainga ino mvura, yainga iciriyo mu makore akazoteera panguwa yekuti muphorofita Samueri wakatara bhuku rakafemerhwa re Atongi. Nguwa dzese dzekuti Aisraeri airingira pambuto ii ino mvura, awona aizoedzurira kuti kana akagonda Djehovha, iyena aizoabetsera pa dambudziko ripi haro. Isusuwo tinodikana kupsvaka rubetso ra Djehovha, azvina ndaa no zviro zvipi hazvo zvatinokwanisa kuita kana kuti zviro zvipi hazvo zvatakamboita mu basa rake. Isusu tinodikana kugara pakati no pakati uye totendera kuti ticakwanisa kuita zviya zvatinokumbirhwa na Djehovha kana isusu tikamugonda. Kuita hingana Samusoni wakakwanisa kugara no simba paakamwa mvura yaainga apaswa na Djehovha, isusu ticarumbwawo takabamba pakunamata kana tikakhorovhera zvokurhya zvese zvatinopaswa na Djehovha.—Mat. 11:28. w23.09 paji. 4 mandi. 8-10

Tinodikana kuitei paya patinoambirhwa no munhu ecireketa zvakashata ngezva Djehovha kana kuti ngezve Bhaibheri? Tinodikana kunamata kuna Djehovha tecikumbira mwiya mucena uye ungwaru kuti tirumbwe takaterama. Asi ngazvipi zvatinodikana kuita kana tikaona kuti zviya zvataita andizvopi zvataidikana kuita? Tinodikanazve kuita munamato uye torangarirazve kuti kana tikabatana no mugariro wakaita hingana uu, ngazvipi zvatinodikana kucinja? Kana tikaita izvona Djehovha acatipasa mwiya mucena wake, uye acatibetsera kuti tikwanise kudzibata uye kurumbwa takaterama. Tsamba dzakawanda dze mu Bhaibheri dzinotibetsera kureketa takaterama pa mugariro unoshupha. Mwiya mucena ungakwanisa kutibetsera kuedzurira tsamba idzona. (Juau 14:26) Ngo muezaniso, mazano atinogumira mu bhuku ra Zvierengo angatibetsera kurumbwa takaterama. (Zvie. 15:18) Bhuku iri rinopangidza kuti ngei zvakanaka kupangidza upfawi pa mugariro unothyisa.—Zvie. 10:19; 17:27; 21:23; 25:15. w23.09 paji. 15 mandi. 6-7

Muphostori Pedru waiziya kuti waizofa mu nguwa doko yaizoteera. Pa makore ese aakapedza eciita basa akatendeka, iyena wakaperekedza Djesu pa mabasa ake, wakatanga kuparidzira mu mbuto dzakawanda, uye wakaseenza hinga nhengo yo dare rinotungamirira. Mu gore ra 62-64 K.A., iyena wakafemerhwa kuti atare tsamba mbiri—mabhuku mairi e Bhaibheri tsamba yo 1 uye 2 Pedru. (2 Ped. 1:13-15) Pedru wakafemerhwa kutara tsamba mbiri idzi mu nguwa yokuti hama ‘dzaitsukwara nge ndaa ye miyedzo yakasiyana-siyana.’ (1 Ped. 1:6) Anhu ano mwoyo dzakashata aiedza kusvipisa ungano no fundiso dze manyepo uye no maitiro akashata. (2 Ped. 2:1, 2, 14) Akristu aida kuzosongana no “kuguma ke zviro zvese” kana kuti Aroma aida kutsakatisa thaundi rese ro Djudha uye no tsika dzese dze Adjudha. (1 Ped. 4:7) Zviri pamhene kuti tsamba dza Pedru dzakabetsera Akristu kuti aziye zvokuita paaisongana no matambudziko aya uye kuti agadzirire matambudziko aaizosongana nawo mu nguwa yo mberi. w23.09 paji. 26 mandi. 1-2

Kuitawo hinga Djesu, isusu tinofundira kuzwira patinobatana no migariro inoshupha. Ngo muezaniso, pakutanga ke nhenda ye COVID-19 isusu takapaswa nhungamiriro yekuti tiime kuungana pa Nyumba ye Umambo uye kuparidzira nyumba no nyumba. Imwimwi makagara no cinetso ce kutondoedza nhungamiriro ii here? Asi kutondoedza kenyu kakamudziirirai, kakabetsera ungano kuti irumbwe yakabatana uye makapfadza Djehovha. Zvino, tese isusu tanyasa kugadzirira kutondoedza nhungamiriro ipi hayo pamweni yaticapaswa panonga peciitika dambudziko guru. Uye nge kuteerera nhungamiriro idzi, ndizvona zvicaita kuti tiponese upenyu wedu! (Djobo 36:11) Cikonzero cikuru cekuzwira Djehovha, ngecekuti tinomuda maningi uye tinoda kumupfadza. (1 Juau 5:3) Isusu atizombokwanisi kuripa Djehovha nge zviro zvakanaka zvatakaizirhwa naye. (Pis. 116:12) Asi isusu tingakwanisa kumuzwira uye kuzwira aya ano masimba. Kana tikaita izvona, tinonga tecipangidza kuti tino ungwaru. Munhu uno ungwaru unopfadza mwoyo wa Djehovha.—Zvie. 27:11. w23.10 paji. 11 mandi. 18-19

Kudai ngirozi ikareketa na imwimwi maizopurutana zvairikuda kubhuya here? Nyamasi uno, pano ngirozi irikubvunza “madzinza, mireketero uye anhu ese.” Asi iyona irikubhuyei? Irikubhuya kuti: “Ithyai Mwari uye mukudzei . . . Namatai Uya akasika denga no nyika.” (Zvak. 14:6, 7) Djehovha ndiye ega Mwari wecokwadi wekuti anhu ese anodikana kumunamata. Isusu tinotenda maningi ngekuti iyena akatipasa mukana wekumunamata mu tempro yake huru ye ku mwiya! Cinyi cinozwi tempro ye ku mwiya, uye ngakupi katingaona masoko akadzara nge zvayo? Tempro ye ku mwiya ainyumbapi kamare. Tempro ye ku mwiya inotsamira pa zvese zvakaizwa na Djehovha eciseenzesa cibairo ca Djesu kuitira kuti anhu akwanise kumunamata. Muphostori Pauro wakanyasa kupanganidza izvi pa tsamba yaakatarira Akristu e Cihebheru aigara ku Djudhiya. w23.10 paji. 24 mandi. 1-2

Muna 522 K.A.A., azondi e Adjudha akakwanisa kuita kuti umambo we Persiya uimise kuwakwazve ke tempro. Asi Zakariya wakagondesa Adjudha kuti Djehovha aizoseenzesa simba Rake kuti aabetsere kuwakazve, kunyazi aizobatana no matambudziko. Muna 520 K.A.A., Mambo Dhariyo wakaatendera kuti awakezve tempro uye wakatoabetserawo no mare. Iyena wakatopasa mutemo wekuti madzimambo amweni e munharaunda aabetsere. (Esdra 6:1, 6-10) Djehovha akapikira anhu ake kuti aizoabetsera kudai akakanda basa rekuwakazve tempro pa mbuto yekutanga. (Ajeu 1:8, 13, 14; Zak. 1:3, 16) Adjudha akabambiswa maningi nge zvakabhuiwa no aphorofita aya uye akahwirirazve kuwaka tempro muna 520 K.A.A. Awona akakwanisa kupedza kuwaka tempro pasati patopera makore mashanu. Awona akatambira rubetso ra Djehovha. Nge ndaa yazvo, awona akakwanisa kunamata Mwari akapfara.—Esdra 6:14-16, 22. w23.11 paji. 15 mandi. 6-7

Anhu akawanda akambozwa ngezva Abrahamu, asi anoziya zviro padoko basi ngezvake. Asi isusu tinoziya zvakawanda ngezve munhu uu unorekethwa mu Bhaibheri. Ngo muezaniso, Abrahamu wakadainzwa kuti “baba o ese ano kutenda.” (Aro. 4:11) Pamweni mungadzibvunzisa kuti: ‘Kodi inini ndaizokwanisa kugara nokutenda kakabamba hingana ka Abrahamu?’ Honde, zvingakwanisika. Umwe mushobo wekukwanisa kugara nokutenda hingana ka Abrahamu ngewe kufunda muezaniso waakatisiira. Mumasure mekubvunzwa ndi Mwari, Abrahamu wakaenda ku mbuto iri kure uye wakararama ke makore akawanda mu matenda. Uye iyena wainga akatogadzirirawo kupasa mwana wake waaida maningi, Izaki hingana cibairo. Zvese izvi zvakapangidza kuti Abrahamu wainga ano kutenda kakabamba muna Djehovha. Kutenda ka Abrahamu uye zviito zvake zvakaita kuti atenderhwe na Mwari uye agare shamwari yake. (Tig. 2:22, 23) Djehovha anoda kuti isusu—pamwepo na imwimwi—tigare shamwari dzake. Ndiyo ndaa, iyena akafemera Pauro na Tiyago kuti atare ngezve muezaniso wa Abrahamu mu Bhaibheri. w23.12 paji. 2 mandi. 1-2

Hanzvadzi, ziyai mushobo wakanaka we kucedza no amweni. Zvinokosha kuti Mukristu akwanise kucedza zvakanaka no amweni. Ndiyo ndaa, muphostori Tiyago wakatipasa zano rinoteera paakati masoko o nyamasi. Kana imwimwi mukanyasa kupurutana zviya zviri kubhuiwa no amweni, munopangidza kuti muno “usisi” kana kuti munokoshesawo amweni. (1 Ped. 3:8) Kana musina cokwadi cekuti mazwisisa zvabhuiwa no umweni, kana kuti urikuzwa kudini, itai mibvunzo dzakasisira. Mumasure mazvo, torai nguwa kuti munyase kurangarira musati marumbwa mecireketa. (Zvie. 15:28, masoko e pasi) Dzibvunzisei kuti: ‘Zvandicabhuya i cokwadi here uye zvicabambisa munhu umweni? Zvicapangidza rureremedzo uye unaki here?’ Edzai kufundira no hanzvadzi dzinonyasa kupurutana uye dzinoreketa ngo mushobo uno unaki. (Zvie. 31:26) Nyasai kuona mushobo waanoreketa. Kukwanisa kucedzesana no amweni zvakanaka kucamubetserai kugumira shamwari dzakanaka uye kurumbwa muri murunyararo no amweni. w23.12 paji. 21 ndi. 12

Nyamasi uno, Djehovha anokwanisa kuseenzesa mhuri, shamwari kana kuti akuru e ungano kuti atibetsere. Asi, patinonga tecisongana no mugariro unoshupha, cido cedu ngecekuda kugara pedu tega. Tinoda kugara pa mbuto yedu tega uye takanyarara. Izvona zvinoitika. Asi tingatambira kudini rubetso ra Djehovha? Rhwisai cido cokuda kugara muri mwega. Paya patinogara tiri tega, cinangwa cedu ngece kutanga kurangarira ngezve matambudziko uye zviya zvatiri kusongana nazvo. Kugara tecirangarira izvona zvingakwanisa kutiitisa kuti tiite zvisananguro zvakashata. Zviri pamhene kuti tese isusu nguwa dzimweni tinomboda kugara tiri tega, maka-maka paya patinonga tecisongana no mugariro unoshupha. Asi kana tikatanga kupedza nguwa yakawanda takagara tiri tega tinogara kure no anhu aya angakwanisa kuseenzeswa na Djehovha kuti atibetsere. Hino, tenderai rubetso re mhuri, shamwari dzenyu, uye akuru e ungano. Edzai kuona zviya zvaari kamare—kuti i mushobo waseenzeswa na Djehovha kuti atibetsere.—Zvie. 17:17; Isa. 32:1, 2.w24.01 paji. 24 mandi. 12-13

Anaziri ainga asikadikani kucinga tsitsi rawo. Uu wainga uri mushobo we kupangidza kudzikanda pasi pa Djehovha. Zvinotsukwarisa kuti pano nguwa yekuti ku Israeri, Anaziri ainga asikareremedzwi uye ainga asikatotsigirhwi no Aisraeri amweni. Anaziri aidikana kushinga kuti akwanise kudzadzisa mhiko yawo uye kugara anhu akasiyana no amweni. (Amo. 2:12) Anhu anoona kuti isusu takasiyana no anhu amweni, ngokuti isusu tinozwira Djehovha. Isusu tinoda ushingi kuti tibvunze anhu amweni ku basa uye kucikora kuti tiri Apupuri a Djehovha. Pa nguwa yekuti mugariro we zviro we nyika ino uri kubambirira kushata, zvinoshupha maningi kurarama maererano no zvokwadi zvisikacinji zve Bhaibheri uye kureketa no amweni ngezve masoko akanaka. (2 Ti. 1:8; 3:13) Edzurirai nguwa dzese kuti “mwoyo wa [Djehovha] unopfara” paya patinopangidza ushingi kuti tisiyane no anhu aya asikamuseenzeri.—Zvie. 27:11; Mara. 3:18. w24.02 paji. 16 ndi. 7; paji. 17 ndi. 9

Onai kuti hama dze mu ungano ye ku Roma dzainga dzakasiyana kudini ku umwe no umwe wawo. Pakati pawo painga pano Adjudha ainga akarerhwa no Mutemo wa Mozesi, asi painga pano amweni ainga akarerhwa nge mushobo wakasiyana kamare. Akristu amweni ainga ari aranda uye amweni ainga akasudzunuka pamweni Akristu amweni aitoseenzerhwawo no aranda. Hino Akristu akakwanisana kudini no misiyano idzi uye akabambisa kudini rudo rawo ku umwe na umwe? Muphostori Pauro wakakohomedzesa Akristu kuti “tambiranai.” Iyena waida kureyei? Soko re Cigrego rakaturikirhwa kuti “tambiranai” riri kuda kureya ngezve kutambira munhu no unaki kana kuti nge mushobo wakanaka. Zvakatodzana no kuti munhu unotambira munhu umweni panyumba pake uye unotenda kuti agare shamwari yake. Ngo muezaniso, Pauro wakabvunza Firimoni kuti iyena waidikana kutambira no unaki Onezimo muranda wake wainga watiza. Iyena wakati: “mutambire zvakanaka.” (Firi. 17) Akira na Prisira akatambirawo Aporo, “awona akamutora” uye akamubetsera pakutunhudzira ruziyo rake re Cikristu. (Zvii. 18:26) Pane kusiya kuti musiyano uite kuti hama dziparadzane Akristu aya akakurira misiyano yawo uye akatambirana. w23.07 paji. 6 ndi. 13

Cinangwa cikuru cinoita kuti imwimwi mudzipire kuna Djehovha i rudo renyu kaari. Asi rudo irona a rudopi rinopinda haro. Irona rinowakirhwa pa “ruziyo re zvirokwazvo” uye “kuzwisisa zviro zve kumwiya,” kana kuti zviro zvamakafunda nge zva Djehovha uye kuda kake. Izvona zvinoita kuti mutunhudzire kuda Djehovha zuwa no zuwa. (Ako. 1:9) Fundo ye Bhaibheri yakaita kuti imwimwi mugare no cokwadi cokuti: (1) Djehovha i munhu kamare, (2) Bhaibheri i Soko rake rakafemerhwa uye (3) Djehovha anoseenzesa sangano rake kuti aite kuda kake. Aya anodzipira kuna Djehovha anodikana kuziya fundo dzekutanga uye anorarama maererano no mitemo ya Djehovha. Awona anopeta masimba kuti arekete no amweni zviya zvaanofunda mu Bhaibheri. (Mat. 28:19, 20) Rudo rawo na Djehovha ratunhudzira uye arikuda kunamata Djehovha no mwoyo wawo wese. Imwimwi munozwawo kudaro here? w24.03 mapaji. 4-5 mandi. 6-8

Abhigairi wainga akawakwa na Nabhari uye Bhaibheri rinoti iyena wainga ano hasha uye wakaita zvakashata. (1 Sam. 25:3) Pamweni zvakashuphira maningi Abhigairi kuti agare no mwamuna wakadai. Abhigairi waikwanisa kupsvaka mikana yekurambana no mwamuna wake. Mukana iwona wakaoneka Dhavhidhi waizogara mambo we Israeri paakada kuuraya Nabhari, nge kutuka kaakaita Dhavhidhi pamwepo no anarume aainga anawo. (1 Sam. 25:9-13) Abhigairi waikwanisa kutiza uye osiya kuti Nabhari auraiwe ndi Dhavhidhi, asi andizvopi zvaakaita. Pane kudaro, iyena wakaita kuti Dhavhidhi asauraye Nabhari. (1 Sam. 25:23-27) Asi ngei Abhigairi wakaita izvona? Abhigairi wainga ano rudo rakakura kuna Djehovha; hino izvona zvakaita kuti areremedze mucato hinga mushobo unoreremedza Djehovha. Iyena waiziya kuti kuna Djehovha mucato cainga ciri ciro cicena. Iyena waida kupfadza Djehovha uye pamweni izvona zvakaita kuti iyena aite zvaaikwanisa kuti aponese mwamuna wake pamwepo no aya aigara pa nyumba pake. Ndiyo ndaa iyena wakaita ciito nokukasika kuti Dhavhidhi asauraye Nabhari. w24.03 mapaji. 16-17 mandi. 9-10

Kodi hama dzinganani dze mu ungano menyu dziri kuedza kusama kugara no zviro zvakawanda mu upenyu wawo, kuti dziite zvakawanda kuna Djehovha here? Imwimwi munoziya madjaha ari kupangidza ushingi kuti agare akasiyana no amweni ku cikora, kunyazi izvona zveciashuphira here? Munokwanisa kurangarira aya ari kurumbwa akagondeka kuna Djehovha kunyazi no kuphikiswa mu mhuri? Garai makagadzirira kuita zvese zvamunokwanisa kuti mubambise anhu aya uye kuabvunza kuti munoshamiswa kudini nge ndaa ye ushingi waanopangidza uye nge zvese zvaanoitira Djehovha. (Firi. 4, 5, 7) Djehovha anozviziya kuti isusu tinoda kumupfadza uye kuti isusu takagadzirira kudzipira kuti tidzadzise mhiko yedu kaari. Iyena anotikudza nge kutipasa mukana we kusanangura kupangidza rudo redu kaari. (Zvie. 23:15, 16) Ngatiite zvese zvatinokwanisa kuti tirumbwe teciseenzera Djehovha uye nguwa dzese tigare takagadzirira kuti tipase zvakanakisisa zvedu kaari. w24.02 paji. 18 ndi. 14; paji. 19 ndi. 16

Edzai kurangaridza zvinoteera. Ngatimboti tiri mugore ra 29 K.A. mukutanga kuparidzira ka Djesu pa nyika pano. Djesu no mai ake Mariya apikwa kuti aende ku mucato ku thaundi re Kanani. Mariya uri kutobetsera aya apikwa. Asi pa nguwa yo mucato, panooneka cinetso—vhinyu inopera. Mariya unoenda pana Djesu nokukasika uye unoti: “Awona aacina vhinyu.” (Juau 2:1-3) Djesu akaitei? Iyena anocinja mvura kuti igare “vhinyu yakanakisisa.” (Juau 2:9, 10) Ici cishamiso cekutanga pa zvishamiso zvakaizwa ndi Djesu paainga ari pa nyika. Iyena akaseenzesa simba raainga anaro kuti aite zvishamiso uye akabetsera makumi e zviuru e anhu. Ngo muezaniso, pano nguwa yekuti Djesu akaita cishamiso cekupasa zvekurhya anarume anokwana kuita 5000 uye pano nguwa yekuti iyena akapasazve zvekurhya anarume anokwana kuita 4000 uye anhu ese aya aidarika 27 000 kana tikabatanidza anakadzi no ana adoko. (Mat. 14:15-21; 15:32-38) Pa migariro miiri ii, Djesu akarapa anhu akawanda airhwara.—Mat. 14:14; 15:30, 31. w23.04 paji. 2 mandi. 1-2

Kana imwimwi makambosongana no mugariro unoshupha maningi mu upenyu wenyu, pamweni imwimwi amucina cido cokuita ciro camaipfarira kuita kareko. Kuita hingana Eriya, zvingamushuphirai kuti mu muke uye ciro camunoda i kuwata basi. (1 Mad. 19:5-7) Isusu tinoda rubetso kuti tirumbwe tecibudirira pa basa ra Djehovha. Pa nguwa nguwa iyona kamare, Djehovha anotigondesa rubetso rake no masoko e tsamba ya nyamasi. Mambo Dhavhidhi wakakwanisa kuona rubetso irona ra Djehovha. Paaiteererhwa no azondi ake, iyena wakati kuna Djehovha: “Nyara yenyu kwayo inondibetsa.” (Pis. 18:35) Kakawanda kakhona Djehovha anoseenzesa anhu amweni kuti atipase rubetso ratinoda. Ngo muezaniso, Mambo Dhavhidhi paakazwa akaremba maningi, shamwari yake Djonatani ndiyona yakamuvhakacira kuti imubambise uye yakamubetsera pane cokuita no mundangariro. (1 Sam. 23:16, 17) Nge mushobo umwewo, Djehovha akaseenzesa Erizeu kuti abetsere Eriya—1 Mad. 19:16, 21; 2 Mad. 2:2. w24.01 mapaji. 23-24 mandi. 10-12

Nyaya iri pana Zvierengo inobhuya ngezve mwanakadzi uno rupo uye urikugadzirira mabiko. Iyena unovhenganidza vhinyu yake uye unoikanda pa meza. Mwanakadzi uu unoimirira “ungwaru we zvirokwazvo.” watinogumira pana Zvierengo kapituro 9. Muezaniso wake unotifundisa kuti Djehovha ano rupo zvakadini pa zvese Zvaanotipasa. (Zvie. 9:2, masoko e pasi) Kusiya izvona, maererano no mavhersikuro 4 na 5: “iyena [ungwaru we zvirokwazvo] unobvunza aya asina marangariro akanaka kuti: ‘Uyai, irhyai pau yangu.’” Ngei tecidikana kutendera mupiko uu? Djehovha anoda kuti ana ake agare no ungwaru. Iyena anoda kutidziirira, uye aadi kuti tifundire zviro nge mushobo unoshupha peciseenzeswa esperiensiya yakashata uye kugara tecitsumba zviro zvakashata zvatakaita. Ndiyo ndaa, “iyena anocengetera anhu ano unatsi ungwaru unobetsera.” (Zvie. 2:7) Kana tikathya Djehovha nge mushobo wakanaka, ticada kumupfadza. Isusu ticapurutana mazano ake ano ungwaru uye ticapfara nge kuseenzesa mazano aya mu upenyu.—Tig. 1:25. w23.06 paji. 23 mandi. 14-15

Kunyazi tisikakwanisi kuita zvese zvataida kuitira Djehovha, tingagara no rugondo rekuti iyena anoona kupeta masimba katinoita uye izvona zvinopfadza mwoyo wake. Ngei tingabhuya kudaro? Ngekuti mu mazuwa a Zakariya, Djehovha akakumbira muphorofita wake kuti aite hata ye oro no prata yainga yatumirhwa no Adjudha ainga asara ku Bhabhironi. (Zak. 6:11) “Hata yakakura” ii yaizoseenza hingana “ciedzuriro” ce mipiro yainga yaiizwa. (Zak. 6:14, masoko e pasi) Ngo mushobo umwewo, isusu tingagara no rugondo rekuti Djehovha aazombokanganwi kupeta kedu masimba kuti timuseenzere munguwa dzinoshupha. Apana mubvunzo kuti isusu ticarumbwa tecisongana no matambudziko mu mazuwa ano e kupedzesera, uye migariro icabambirira kushata kubvira zvino kuenda mberi. (2 Ti. 3:1, 13) Asi atidikani kusiya kuti kuora mwoyo kuonerere upenyu wedu. Edzurirai masoko akabhuiwa ndi Djehovha ku anhu ake mu mazuwa a Ajeu: “Ndinemwi . . . Musathye.” (Ajeu 2:4, 5) Isusu tingagarawo no rugo rekuti Djehovha acagara kudii redu kana tikarumbwa tecipeta masimba kuti timuseenzere. w23.11 paji. 19 mandi. 20-21

Kudai Djehovha naainga asikadi, iyena ainga asikadi kuita kuti zvishaishi zva Pedru zvitarhwe mu Bhaibheri. Asi izvona zvakatarhwa mu Bhaibheri kuitira kuti tikwanise kufunda ndizvo. (2 Ti. 3:16, 17) Kufunda ngezve mwanarume uu wainga akaremba uye uno mazwiro hingana edu, kunotibetsera kuona kuti Djehovha aaetseri kukwana kedu. Djehovha anoda kuti isusu tisarembe kunyazi tecirhwisana no kutama kukwana kedu. Ngei zvecikosha maningi kuti tisarembe? Kunyazi tikakwanisa kukunda patakarembera, nguwa dzimweni tingakwanisa kuhwirirazve kuita zviro zvakashata. Kunyazi zvakadaro, tinorumbwa tecipeta masimba kuti tibudirire. Tese isusu tingareketa uye kuita zviro zvingazoita kuti ticinyuke, asi cinokosha ngecekuti isusu tisarembe, ngo kuita kudaro, Djehovha anozotibetsera kuti tibudirire. (1 Ped. 5:10) Usisi wakapangidza Djesu kuna Pedru kunyazi no zvishaishi zvake ungatibetsera kuti tirumbwe teciseenzera Djehovha. w23.09 mapaji. 20-21 mandi. 2-3

Djesu aikwanisa kuporesa Razaro. Asi iyena aida kuita ciro cinoshamisa. Iyena akagondesa kuti: “Hama yako icamuka.” iyena akatizve: “Inini ndini rumuko no upenyu.” (Juau 11:23, 25) Ndizvona kamare, Djesu ainga akapaswa simba ra Mwari rekumutsa aya akafa. Kutobatanidza aya aainga akamutsa mu migariro dzakasiyana, musikana wainga waanomazuwa manganani afa no mudjaha wainga afa zuwa rimwe-rimwero. (Ruka 7:11-15; 8:49-55) Kuzoti Razaro kei, wainga ano mazuwa maromgomuna afa uye waakutonuhwa. Hino Djesu aizokwanisa kumumutsa here? Mariya, unoonanazve na Djesu. Iyena unophindazve masoko amwe-amwewo akarekethwa ndi Marta eciti: “Tenzi, kudai mainga muri pano, hama yangu ingadai isikazi kufa.” (Juau 11:32) Paaiona Mariya no amweni ecicema, Djesu akarumbwa akanyarara uye akatsukwara. Ecirhwadziwa ngekuona shamwari dzake dzakatsukwara, Djesu akatanga kucema. Iyena ainyasa kuziya kamare kurhwadza kazvinoita kufirhwa nge munhu watinoda! w23.04 mapaji. 10-11 mandi. 12-13