Marso

Nyika ipsva aisati yaayo. Ngo muezaniso, cimborangarirai ku zviro zviya zvaapo zvakaita hinga nyeredzi, miti, zvinyama no anhu. Apana munhu waizobhuya kuti zviro izvi azviriyopi, asi kainga kuno nguwa yekuti zviro izvi zvainga zvisiriyopi. Izvona zviripo ngekuti Djehovha akazvisika. (Gen. 1:1, 26, 27) Mwari wedu akagondesa kuunzisa nyika ipsva. Uye iyena acadzadzisa cipikirhwa ici, kana cipikirhwa ici cikadzadzika anhu acagara no upenyu wakakwana nokusikaperi. Pa nguwa yakasisira ya Djehovha, nyika ipsva icaitikadi zvezvirokwazvo hinga zviro zvakawanda zvakatitenderedza. (Isa. 65:17; Zvak. 21:3, 4) Patinonga tecietsera nyika ipsva tinodikana kukhorovhera mikana yese kuti tibambise kutenda kedu. Nguwa dzese garai anotenda murusudzunuro. Rangarirai ngezve simba ra Djehovha. Uye nguwa dzese rumbwai makabatikana pa mabasa e ku mwiya. Nge mushobo iwona, imwimwi mucagara pakati pe aya e kuti “nokutenda uye no mwoyo unononoka kutsamwa awona anoona zvipikirhwa.”—Aheb. 6:11, 12. w23.04 paji. 31 mandi. 18-19

Djeseu akaringisa kudenga oita munamato pamberi pe anhu ese. Iyena arikuda kukudza Djehovha nge zvese zvirikuda kuitika ipona. Pedzepo Djesu anokhuwa nge izwi guru eciti: “Razaro, buda!” (Juau 11:43) Uye Razaro unobuda ecihamba kubva mukati me guwa! Djesu wakakwanisa kuita ciro caiita hinga acikwanisiki kuitika. Ngano ii inobambisa kutenda kedu mu kariro ye rumuko. Nge gwanza ripi? Karirai ngezve cipikirhwa cakabhuiwa ndi Djesu ecibvunza Marta paakabhuya kuti: “Hama yako icamutswa.” (Juau 11:23) Ngokuti wakaezana na Baba ake, Djesu ano simba uye cido rekudzadzisa zvipikirhwa izvi. Kucema kakaita Djesu kunonyasa kupangidza kuti iyena anoda no mwoyo wese kupedza rufu uye matambudziko. Kupinda izvona Razaro paakabuda mu guwa, Djesu akapangidza kuti ano simba rekumutsa akafa. Pakupedzesera, rangarirai ngezve masoko akabvunzwa Marta ndi Djesu hingana zvinorekethwa mu tsamba nyamasi. Isusu tinozvikonzero zvakanaka zvekutenda kuti zvipikirhwa zva Mwari zve rumuko zvicaitikadi zvezvirokwazvo. w23.04 mapaji. 11-12 mandi. 15-16

Nguwa dzimweni tinodikana kucinja minamato yedu kana tikaona kuti ngacipi cido ca Djehovha katiri. Tinodikana kuedzurira kuti Djehovha ano cinangwa uye acadzadzisa cinangwa icona pa nguwa yaakasanangura. Cinangwa ici cinobatanidza kutsakatisa zvacose matambudziko ese arikukonzera kushuphika, tsaona dzinoitika dzoga, matenda uye rufu. Uye Djehovha acadzadzisa cinangwa cake eciseenzesa Umambo wake. (Dha. 2:44; Zvak. 21:3, 4) Asi zuwa iri risati raguma, Djehovha arikutendera kuti Sathani atonge nyika. (Juau 12:31; Zvak. 12:9) Kana Djehovha akagadzirisa matambudziko e anhu zvino, zvinozoita hingana kuti utongi wa Sathani urikubudirira. Asi izvona azvirei kuti Djehovha aatibetseri. Djehovha acatibetsera. w23.05 paji. 8 ndi. 4; mapaji. 9-10 mandi. 7-8

Tingabetsera kudini amweni kuti abudise mafundo anokosha pa Cirangaridzo? Ciro cokutanga, ngece kupika amweni kuti auye ku Cirangaridzo. Pane kupika basi aya atinoparidzira, tingakwanisa kutara mazina e aya aticazoda kupika, akadai hinga anyacigarisano uye amweniwo. Kunyazi tisina mupiko dzakawanda dzakadhindwa, tingakwanisa kuseenzesa link. Ticashamisika no numero ye anhu acatenda kupikwa! (Mup. 11:6) Edzurirai kuti aya atinopika, angakwanisa kugara no mibvunzo—maka-maka kana asati amboenda ku Nyumba ye Umambo. Zvainga zvakanaka maningi kurangarira ngezve mibvunzo dzaangaita uye kugadzirira kuti muzoadaire. Mumasure mekupinda Cirangaridzo, akawanda anonga akapikwa angagara no mibvunzo dzakawanda. Isusu tiri kuda kuita zvese zvatinokwanisa—Cirangaridzo cisati catanga uye pacinonga capera—kuti tibetsere aya ano “mwoyo unoda” kuti akhorovhere zvakanaka musangano uu.—Zvii. 13:48. w24.01 paji. 12 mandi. 13, 15; paji. 13 ndi. 16

Mu Bhaibheri tinogumira ngano dzinokwana kuita 8 dze anhu akamutswa kuti ararame pa nyika pano. Zvakadini kutora nguwa kuti munyase kufunda ngezve ngano idzi? Pamunoita izvona, psvakai kufunda ciro pa ngano imwe na imwe. Tarirai kuti rumuko rimwe na rimwe rinopangidza kudini kuti Mwari ano cido uye simba rekumutsa aya akafa kuti araramezve. Maka-maka, kutora nguwa kuti muerenge uye munyase kurangarira ngezve rumuko rinokosha ra Djesu. Rumuko iri rakaoneka ngo mabhirionji e anhu rinotunhudzira kutenda kedu uye musambofe makakanganwa izvi. (1 Ako. 15:3-6, 20-22) Isusu tinotenda maningi nge zvipikirhwa zva Djehovha zve rumuko! Tingakwanisa kugara no rugondo rokuti izvona zvicadzadzika, ngekuti Djehovha ano cido uye simba rekuzvidzadzisa. Ndiyo ndaa tinodikana kushinga kubambisa kutenda kedu mu kariro ii ye rumuko inoshamisa. Ngekuita izvona, zvicatikhwededza dhuze na Djehovha, Mwari anogondesa ku umwe na umwe wedu kuti: ‘Uya wamunoda ucamutswa!’—Juau 11:23. w23.04 paji. 8 ndi. 2; paji. 12 ndi. 17; paji. 13 ndi. 20

Maonero ari pakati no pakati no kudzidodosa mawara akada kutodzana. Munhu uno maonero ari pakati no pakati aadzioni hinga unokosha kupinda umweni uye unoziya paanogumira. Bhaibheri rinoreketa ngezve kudzidodosa ke mundangariro. Izvona zvinopangidza kuti kudzidodosa kunotangira mundangariro. (Afi. 2:3) Kakawanda kakhona munhu uno maonero ari pakati no pakati munhu unodzidodosa. Gidhioni wainga ari munhu ano maonero ari pakati no pakati uye waidzidodosa. Ngirozi ya Djehovha payakabvunza Gidhioni kuti wainga asanangurhwa na Djehovha kuti aponese Aisraeri mu nyara dze madzinza anosimba e Midhiani, iyena wakadaira ecidzidodosa eciti: “Mhuri yangu idoko pakati pa Manasi, uye inini andikoshi pa ese e nyumba ya baba angu.” (Ato. 6:15) Gidhioni aazi kurangarira kuti wainga ano mawara kuti aite basa irona. Asi Djehovha anoziya zviro zvese uye iyena wakabetsera Gidhioni kuti akwanise kuita zvakanaka basa rake. Akuru anopeta masimba kuti arumbwe ano maonero ari pakati no pakati uye kudzidodosa. (Zvii. 20:18, 19) Awona aagari ecipanganidza ngezve basa rawo uye kubudirira kaakamboita. Awona aarangaririwo kuti aabetseri nge ndaa ye zvishaishi zvaakamboita uye nge ndaa ye kusama kukwana kawo. w23.06 paji. 3 mandi. 4-5

Musoro wa Sathani paucatsakatiswa, zvicaitika basi pakupera kekutonga ke makore 1000. (Zvak. 20:7-10) Bhaibheri rinoreketa ngezve zviro zvicaitika kana pakaoneka uzondi pakati pe nyika. Kutanga, madzinza acakhuwa eciti: “Runyararo no kucengeteka!” (1 Ate. 5:2, 3) Pedzepo, “asikakariri,” dambudziko guru ricatanga madzinza paacarhwisa magereja ekunyepa. (Zvak. 17:16) Mumasure mazvo, Djesu acatonga anhu eciparadzanisa mabira no mbudzi. (Mat. 25:31-33, 46) Kunyazi zvakadaro, Sathani aazohwiriri sure. No uzondi wakakura, iyena acaita kuti madzinza abatane kuti arhwise aseenzi a Mwari. Bhaibheri rinodainza kurhwisa uku hingana Gogi we nyika ye Magogi. (Ezek. 38:2, 10, 11) Panguwa imweni, akadzodzwa anonga aciri pa nyika, acatorhwa kuti aende kudenga. Ari ikona pamwepo na Djesu uye no cikwata cake ce anyahondo, acarhwa pa hondo ye Amagedhoni dii rekupedzesera re dambudziko guru. (Mat. 24:31; Zvak. 16:14, 16) Mumasure me izvi, Kutonga ka Kristu ke Makore 1000 kucatanga pa nyika.—Zvak. 20:6. w23.10 mapaji. 20-21 mandi. 9-10

Aseenzi a Djehovha akawanda nyamasi anorarama mu mbuto yekuti basa redu rakarambidzwa. Kuita hingana Obhadhiya hama no hanzvadzi idzi dzinodiwa dzinorumbwa dzecipangidza rureremedzo ku aya ano masimba, asi awona anopasa Djehovha ciro Caanosisira—kudzipira kakadzara. (Mat. 22:21) Awona anopangidza kuti anothya Djehovha ngekumuteerera pane kuteerera anhu. (Zvii. 5:29) Awona anorumbwa eciparidzira uye ecipinda misangano no ungwaru. (Mat. 10:16, 28) Kusiya izvona awona anoita zvaanokwanisa kuitira kuti hama ne hanzvadzi dzawo dzione zvekurhya zvekunamata zvakakwana. Onai muezaniso wa Henri, iyena unogara ku África ku mbuto yakarambidzwa basa redu ke cinguwa. Panguwa iwona, Henri wainga akagadzirira kuti apase hama no hanzvadzi mabhuku. Iyena wakati: “Inini ndiri munhu unopsveruka maningi. Djehovha akandibetsera kuti ndigare no ushingi.” Imwimwi munorangarirawo kuti mungagara no ushingi wainga una Henri here? Honde asi kana mukathya Djehovha nge mushobo wakanaka. w23.06 mapaji. 15-16 mandi. 9, 11

Mumasure mekuti Adhamu na Evha asiya kuzwira Djehovha, Pamweni zvaizopangidza kuti Sathani wainga akwanisa kuita kuti Djehovha asadzadzise cinangwa cake cekudzadza nyika no anhu akakwana uye no anhu anozwira. Pamweni Sathani wakarangarira kuti Djehovha aisazokwanisa kudzadzisa cipikirhwa cake. Pamweni iyena wairangarira kuti Djehovha aizoparadza Adhamu na Evha, osikazve kazado imweni yakakwana kuti adzadzise cinangwa cake ku anhu. Asi kudai Djehovha akaita kudaro, hinga zvakabuda pamhene zvakabhuiwa na Sathani zvekuti Djehovha munyepi. Ngei? Ngekuti, maererano no Genesi 1:28, Djehovha ainga akabvunza Adhamu na Evha kuti ana awo aizodzadza nyika. Sathani wakarangarira kuti Djehovha aizotendera Adhamu na Evha kuti agare no ana asi ainga asikazogari akakwana. (Mup. 7:20; Aro. 3:23) Pasina mubvunzo, Sathani ungadai akabhuya kuti Djehovha aazi kubudirira. Ngei? Ngekuti pamugariro wakadai Mwari angadai asikazi kukwanisa kudzadzisa cinangwa cake uye nyika yainga isikazogari Paraizo yakadzara no anhu anozwira uye akakwana. w23.11 paji. 6 mandi. 15-16

Djehovha anotipasa nhungamiriro dzakadjeka eciseenzesa Soko rake uye no sangano rake. Apana cikonzero cekutunhudzira nhungamiriro dziya dzaanotipasa. (Zvie. 3:5-7) Hino atiiti zviro tecidarika zviro zviya zvakatarhwa mu Bhaibheri kana kuti atigadzi mitemo pa nyaya dze cisananguro ce munhu ega. Sathani unoseenzesa “ucengedzi usina zvaunobetsera” uye “zviro zvekutanga zve nyika” kuti atipause uye aparadzanise anhu. (Ako. 2:8) Mu nguwa ye aphostori, izvi zvaibatanidza fundiso dzakatsamira mu marangariro e anhu, fundiso dze Adjudha dzainga dzisikapindirani no Matarhwa, uye fundiso dzekuti Akristu aidikana kuzwira Mutemo wa Mozesi. Marangariro aya aicengedza anhu ngekuti aiyaitisa kuti agare kure no Manyuku e uzii we zvirokwazvo, Djehovha. Nyamasi uno, Sathani unoseenzesa ma midhiya no ma redhi sosiyari kuti abararise masoko ekupandukira uye masoko ekunyepa anobhuiwa no atungamiriri ezvematongerhwe e nyika. w23.07 paji. 16 mandi. 11-12

Djehovha akagadzirisa zviro nge mushobo wakakwana kuitira kuti cinangwa cake cidzadzike. Djehovha akatendera kuti Adhamu na Evha abare ana. Ngo mushobo uwona, iyena akapangidza kuti ainga asiripi munyepi. Iyena akaita gadziriro ye “mubarirhwana” waizosudzunura ana anozwira a Adhamu na Evha uye wakagara no cokwadi cekuti cinangwa cake caizodzadzika. (Gen. 3:15; 22:18) Sathani aazi kumborangarira ngezve kugadziriswa uku. Ngei? Ngekuti rusudzunuro rinotsamira pa rudo rakakura ra Djehovha. (Mat. 20:28; Juau 3:16) Sathani aana wara iri re rudo ngekuti iyena unorangarira ngezvake basi. Hino cinyi cicaitika nge ndaa ye rusudzunuro? Mukupera ke kutonga ke makore 1000 Akristu, mibarirhwana inozwira uye yakakwana ya Adhamu na Evha icadzadza nyika inonga yaa Paraizo hingana zvakabhuiwa na Djehovha kuti zvaizoitika. w23.11 paji. 6 ndi. 17

Isusu tinozwira mitemo ya Djehovha yakaringana no ruceno re upenyu uye no ngazi. Ngei? Ngekuti Djehovha anoti ngazi inoimirira upenyu, cipo cinokosha catakapaswa na Djehovha. (Rev. 17:10) Djehovha paakatendera kuti anhu arhye nyama, iyena akaabvunza kuti awona ainga asikadikani kurhya ngazi. (Gen. 9:4) Iyena akaphindisazve nhungamiriro ii paakapasa Mutemo wa Mozesi ku Aisraeri. (Rev. 17:10) Uye Djehovha akapasa nhungamiriro ku dare rinotungamirira re muzana re makore e kutanga kuti abvunze Akristu kuti ‘arumbwe eciramba . . . ngazi.’ (Zvii. 15:28, 29) Uye isusu tinonyasa kuzwira Mutemo uu nge kusanangura mushobo we kuraphwa watinoda. Isusu tinonyasawo kutondowedza nhungamiriro dzakakhwirira dze ruceno dzinopaswa na Djehovha. Muphostori Pauro wakatikohomedzesa kuti tiuraye “nhengo” dze mwiri wedu—zvecida kureya kuti tiite zvese zvatinokwanisa kuti tisagare no zvido zvakashata. Isusu atiiti kana kuona ciro cipi haco cinotiitisa kuti tiite uhure.—Ako. 3:5; Djobo 31:1. w23.07 paji. 15 mandi. 5-6

Samusoni wainga ecida maningi Dharira zvekuti iyena aazi kukwanisa kuziya zviro zvaida kuizwa na Dharira. Iyena waibambidzira Samusoni kuti amubvunze cikonzero caiita kuti iyena agare no simba maningi. Pakupedzesera, iyena wakapanganidza zvese kaari. Zvinotsukwarisa kuti Samusoni ndiye wainga adzikanda pa mugariro uu unoshupha. Kushaisha kake kakaita kuti iyena aruze ke cinguwa simba rake uye aruze kutenderhwa na Djehovha. (Ato. 16:16-20) Ngekuti wakagonda Dharira haiwa Djehovha, izvona zvakamubarira matambudziko akakura maningi. Afiristiya akamubata uye akamubora madziso pedzepo akamusunga ku Gaza uye iyena ndiye wainga ecipsverudzwa hinga muranda mukwii we matsangu. Uye Samusoni wakarumbwa ecipsverudzwa, Afiristiya paakamutora kuenda ku mutambo waaizoita ku mwari wawo Dhagoni. Awona airangarira kuti akakwanisa kubata Samusoni no rubetso ra mwari wawo wekunyepa. Afiristiya “aida kumuseka” nge mugariro wake uye akadainza Samusoni kubva mu karaboso kuti aasekese.—Ato. 16:21-25. w23.09 mapaji. 5-6 mandi. 13-14

Pamweni mudoni wedu we kubasa kana we kucikora ungatibvunzisa kuti ngei mecirumbwa meciteerera mitemo ye Bhaibheri. Patinomudaira isusu ticaita zviri zvese kuti tidziirire kutenda kedu uye pa nguwa imweyo ticapangidza kuti tinoreremedza maonero ake. (1 Ped. 3:15) Pane kuona mubvunzo wake hingana kuti iyena uri kutirhwisa, zvakanaka maningi kuona mubvunzo uwona hinga mukana wekuziya kuti ngazvipi kamare zvinokosha kaari. Pasinei kuti ngacipi kamare camuitisa kuti aite mubvunzo uwona, isusu tinoda kudaira nguwa dzese takaterama uye no upfawi. Pamweni mudoni wenyu wekubasa uri kuda kuziya kuti, ngei imwimwi musikapembereri zuwa renyu rekubarhwa? Isusu tingasimba mudoni wedu we kubasa ngekurangarira kaanoita amweni. Uye tingamubvunza kuti isusu tinodawo kuseenza pa mbuto ino ushamwari. Ngokudaro, tingakwanisa kuthurudza kunetseka ke adoni edu e kubasa uye pamweni zvingatiitisa kuti tikwanise kufungura mukana we kucedza nawo ngezve Bhaibheri panyaya dzinocokuita no kupemberera zuwa rekubarhwa. w23.09 paji. 17 mandi. 10-11

Tinomakomborero akakura maningi ekuseenzesa nguwa doko yasara kuti tiparidzire anhu mu nyika yese. Muphostori Pedru unotikohomedzesa kuti ‘tigare tecinyasa kurangarira’ ngezve kuoneka ke zuwa ra Djehovha. (2 Ped. 3:11, 12) Tingazviita kudini? Kana zveciita zvakanaka kunyasa kurangarira mazuwa ese ngezve makomborero aticatambira munyika ipsva. Makamborangarira here muri pa mbuto yakarungama, mecifema mhepo yakanaka, mecirhya zvokurhya zvinonaka uye mecitambira anyaukama kana shamwari dzenyu dziri kumutswa kana kuti mecifundisa anhu e kare kare kuti zvipikirhwa zve Bhaibheri zvakadzadzika kudini. Kunyasa kurangarira izvi kunomubetsera kuti murumbwe mecietsera uye kugonda kuti mugumo waa padhuze. “Kuziya ngezve ramangwana” redu uye kuziya izvi pacino nguwa, isusu “atizopauswi” nge fundiso dze manyepo e nyika ino yakashata. w23.09 paji. 27 mandi. 5-6

Madjaha akatendererhwa no shamwari dzekucikora “dzisikazwiri abereki awo.” (2 Ti. 3:1, 2) Ngei madjaha akawanda asikazwiri? Madjaha amweni anorangarira kuti abereki awo anoakumbira kuti aite zviro zvekuti awona aakwanisi kuzviita. Amweni anorangarira kuti nyika yacinja maningi uye kuti abereki awo akasarira sure zvekuti mazano awo aacabetseri kana kuti akanyanya kuoma. Imwimwi munorangarirawo kudaro here? Anhu akawanda anoona hinga kuti zvinoshupha maningi kuzwira zano rakatarhwa mu tsamba ya nyamasi. Ngazvipi zvingamubetserai kuti muite kudaro? Imwimwi mungafundira kuzwira nge kuteedzera muezaniso wakanyasa kunaka kupinda dzese—Djesu. (1 Ped. 2:21-24) Iyena ainga ari munhu akakwana, asi abereki ake ainga asikazi kukwana. Kunyazi zvakadaro, iyena waireremedza abereki ake pa nguwa yaishaisha uye pa nguwa yaainga asikanyasi kuzwisisa.—Eki. 20:12. w23.10 paji. 7 mandi. 4-5

Muphostori Pauro wakapanganidza kuti zvibairo zvaikumbirhwa ngo Mutemo zvainga zvisikacaseenzi pakupfudza zvitema. Ndiyo ndaa, Mutemo wainga “usikacaseenzi.” Hino Pauro wainga aakufundisa cokwadi ici cakadzika. Iyena wakaaedzurira kuti “kariro ye zvirokwazvo” ye rusudzunuro ra Djesu ndiyo yaizokwanisa kuabetsera kuti akhwedere “dhuze na Mwari.” (Aheb. 7:19) Pauro wakapanganidzira hama dze Cihebheru kuti kunamata ke Cikristu kainga kakakhwirira kupinda kunamata kaaita kare. Zvaaiita kuti anamate Djehovha maererano no Mutemo wa Mozesi “zvinopangidza zviro zvinozouya, asi cokwadi kamare cina Kristu.” (Ako. 2:17) Bvute ro ciro rinopangidza mushobo wakaita ciro, haiwa ciroco. Ngo mushobo umwewo, mushobo wainamata Adjudha kare wainga wakaita hingana bvute, ngekuti zvino awona aizonamata Djehovha ngo mushobo wakanaka. Isusu tinodikana kunyasa kuzwisisa zvese zvakaizwa na Djehovha kuti zvitema zvedu zvirekererhwe uye kuti tikwanise kumunamata ngo mushobo waanoda. w23.10 paji. 25 mandi. 4-5

Kapituro 11 ya Dhanyeri, inoreketa ngezve madzimambo mairi kana kuti atungamiriri e zvematongerhwe e nyika anorhwisana pa nyaya ye kutonga. Patinoezanisa ne uphorofita umweni we Bhaibheri tinokwanisa kuona kuti “mambo we kakutsi” ndi Rússia no nyika dzinoitsigira uye “mambo we katemaidumba” ndi Utongi uno Simba we Nyika Yese Anglo-Americana. Aseenzi a Mwari ari kutungamirirhwa na “mambo we kakutsi” ari kuteererhwa zvakananga. Hama no hanzvadzi dzedu dzimweni, dzakapondhwa uye dzakasungwa nge ndaa ye kutenda kawo. Pano kuti arembe, kuteererhwa uku kuri kubambisa kutenda kawo. Ngei? Ngekuti awona anoziya kuti izvi zviri kudzadzisa uphorofita wakawanda uri mubhuku ra Dhanyeri. (Dha. 11:41) Kuziya izvi kunobambisa kariro yedu uye kunotibetsera kuti tirumbwe takagondeka kuna Djehovha. w23.08 mapaji. 11-12 mandi. 15-16

Nge ndaa ye rudo rake katiri, Djehovha anozwisisa mazwiro edu uye anoda maningi kuticengeta. Patinotambudzika, iyena anotambudzikawo. Ndiyo ndaa tinganamata no rugondo teciti: “Ndicengetei hinga mboni ye dziso renyu.” (Pis. 17:8) Dziso iciro cisikazi kubamba, asi rinokosha maningi pa mwiri we munhu. Zvinoita hingana kuti Djehovha arikubhuya kuti: ‘Unoitira zvakashata anhu angu, unonga eciitira zvakashata ciro cinokosha.’ Djehovha anoda kuti mugare no rugondo rekuti iyena anomudai pacenyu mwega. Asi iyena anozviziya kuti nge ndaa ye zviro zvakaitika kare, imwimwi mungagara musina cokwadi cekuti iyena anomudai kana kuti haiwa. Pamweni murikubatana no mugariro unoshupha nguwa ino wekuti ungaedza rugondo renyu mu rudo ra Djehovha. Hino cinyi cingabambisa rugondo renyu? Kuedzurira mushobo unopangidza Djehovha rudo rake kuna Djesu, ku akadzodzwa uye katiri tese. w24.01 paji. 27 mandi. 6-7

Esdra wakaona ngezve kucengeta kunoita Djehovha anhu Ake mu nguwa dzinoshupha. Pasati paguma makore 484 K.A.A., pamweni Esdra wairaramira ku Bhabhironi Mambo Asuero paakapasa mutemo wekuti Adjudha ese aitongwa no Persiya auraiwe. (Est. 3:7, 13-15) Esdra no Adjudha ese ainga ari pa ngozi! Paakazwa ngezve mutemo uwona, awona akanetseka maningi “zvekuti akatanga kutsanya,” ecicema, ecinamata kuna Djehovha uye ecikumbira rubetso. (Est. 4:3) Cimborangaridzai kuti Esdra no Adjudha amweni akazwa kudini zviro pazvakacinja uye aya aida kuuraya Adjudha akauraiwa! (Est. 9:1, 2) Zvese izvi zvabetsera Esdra kuti azokwanisane no matambudziko aizouya mberi uye zvakaita kuti iyena agare no rugondo rekuti Djehovha angacengeta anhu Ake. w23.11 paji. 17 mandi. 12-13

Muphostori Pauro wainga ecibhuya maka-maka ngezve “zviito zvaikumbirhwa nge mutemo,” mutemo wa Mozesi wakapaswa pa Dunhu re Sinai. (Aro. 3:21, 28) Zvinoita hingana kuti pa nguwa ya Pauro, zvainga zveciashuphira kutendera kuti Mutemo wa Mozesi uye zviito zvaikumbirhwa no Mutemo iwona, zvainga zvisikacaseenzi. Ndiyo ndaa, Pauro wakareketa ngezve muezaniso wa Abrahamu eciti: Kuti munhu atenderhwe uye azwi munatsi na Djehovha zvainga zvisikabvi pakuita “zviro zvaikumbirhwa no mutemo.” Asi zvaibva pakutenda. Izvona zvinotipfadza maningi ngokuti zvinotifundisa kuti kana tino kutenda muna Mwari uye muna Djesu, isusu tingakwanisa kutenderhwa na Mwari uye kuzwi anatsi. Ngo dii rimweni, “zviito” zvakabhuiwa ndi Tiyago pa kapituro 2 “azviitopi zvaikumbirhwa no mutemo” zvakarekethwa na Pauro. Tiyago wainga ecibhuya ngezve zviito, kana kuti mabasa anodikana kuizwa ngo Mukristu zuwa no zuwa. (Tig. 2:24) Zviito izvona ndizvona zvinopangidza kuti Mukristu unokutenda muna Mwari here kana kuti haiwa. w23.12 paji. 3 ndi. 8; mapaji. 4-5 mandi. 10-11

Imwimwi hanzvadzi muri kurangarira kuwakwa, munodikana kusanangura zvakanaka mwamuna wenyu. Musakanganwe kuti imwimwi mucadikana kutondowedza zvisananguro zvicaizwa no uya wamucasanangura kuti agare mwamuna wenyu. (Aro. 7:2; Aef. 5:33) Hino, dzibvunzisei kuti: ‘Iyena ndi Mukristu wakakura pakunamata here? Unokanda zviro zvekunamata pa mbuto yekutanga mu upenyu wake here? Unoita zvisananguro no ungwaru here? Iyena unokwanisa kutendera zvishaishi zvake here? Unoreremedza anakadzi here? Ucakwanisa kundiriritira pazviro zvekunamata, zvekunyama uye zvemundangariro here? I zvirokwazvo kuti kana imwimwi mecida kugumira mwamuna wakanaka, munodikana kumbogadzirira kuti mugare mukadzi wakanaka. Mukadzi wakanaka ndi “mubetseri” ku mwamuna wake uye “wakasisira” kaari. (Gen. 2:18) Nge kuda Djehovha, mukadzi unoita zviri zvese kuti amweni aone mawara akanaka ano mwamuna wake. (Zvie. 31:11, 12; 1 Ti. 3:11) Imwimwi mungagadzirira kuti mugare mukadzi wakanaka nge kubambisa rudo renyu kuna Djehovha uye kugara mubetseri ku amweni kutobatanidzawo mu mhuri menyu uye mu ungano. w23.12 mapaji. 22-23 mandi. 18-19

Djehovha anotigondesa kuti acatipasa ungwaru kuti tiite zvisananguro zvakanaka. Uye isusu tinoda maningi ungwaru wake kuitira paya patinoita zvisananguro zvinokosha mu upenyu. Ngo muezaniso patinosanangura kuti ticarumbwa tisikazi kuwaka kana kuwakwa here kana kuti ticawaka kana kuwakwa. Djehovha anotipasa simba kuti tishingirire. Hinga zvaakaita no muphostori Pauro, Djehovha acatipasawo simba ratinoda kuti tishingirire matambudziko edu. (Afi. 4:13) Djehovha anoseenzesa hama dzedu dze ku mwiya kuti dzitibetsere. Pa usiku asati afa, Djesu akarumbwa eciita munamato no mwoyo wese. Iyena akadeketera kuna Djehovha kuti asasiye izvona zveciitika. Asi pane kuita zvainga zvakumbirhwa ndi Djesu, Djehovha akatuma ngirozi kuti imubambise. (Ruka 22:42, 43) Djehovha angatibetserawo ngekuita kuti hama dzedu dzitifonere kana kuti dzitivhakacire kuti dzitibambise. Zvezvirokwazvo, tese isusu tingapsvaka mikana yekubhuya “soko rakanaka” kana kuti ciro cingabambisa hama dzedu.—Zvie. 12:25. w23.05 mapaji. 10-11 mandi. 9-11

Asikacaiti mabasa e Cikritu paanopinda Cirangaridzo, pamweni awona angathya kuti aazotambirhwi zvakanaka. Musarekete zviro zvingaita kuti awona apsveruke uye arhwadziwe. Hama no hanzvadzi idzi dzinodawo Djehovha hinga mushobo watinomudawo. Isusu tinopfara maningi nge kunamata Djehovha pamwepo no hama uye hanzvadzi idzi! (Pis. 119:176; Zvii. 20:35) Zvino musoro Djesu kutikumbira kuti makore ese tiedzurire ngezve kufa kake. Isusu pamwepo no anhu amweni, tinobetsereka maningi ngekuita izvona. (Isa. 48:17, 18) Ngo muezaniso, rudo redu kuna Djehovha na Djesu rinonyasa kubamba, tino mukana wekupangidza kuti tinotenda nge zvese zvaakatiitira uye tinogara padhuze no hama uye hanzvadzi dzedu. Uye tino mukana we kubetsera amweni kuziya zvakawanda ngezve rusudzunuro uye kuti agare no mukana we kutambira makomborero ari kupikirhwa na Djehovha. Hino, ngatipete masimba kuti tigadzirire zuwa iri rinokosha re gore—Cirangaridzo ce rufu ra Djesu! w24.01 paji. 14 mandi. 18-19

Djehovha anotitungamirira kudini? Anotitungamirira maka-maka eciseenzesa Soko rake Bhaibheri. Asi iyena anoseenzesawo anhu kuti atitungamirire. Ngo muezaniso, iyena anoseenzesa “muranda akatendeka uye akangwara” kuti atipase zvekurhya zve ku mwiya uye kutibetsera kuti tiite zvisananguro zvakanaka. (Mat. 24:45) Djehovha anoseenzesawo anarume akaita hinga aonereri e nharaunda uye akuru e ungano. Awona anotibambisa uye anotipasa nhungamiriro kuti atibetsere kushingirira matambudziko. Isusu tinotenda maningi Djehovha nge kutitungamirira zvakanaka pa nguwa ino inoshupha mugumo usati wauya! Nhungamiriro idzi dzinotibetsera kuti tirumbwe tiri shamwari dza Djehovha uye tirumbwe tecihamba mu gwanza rinoenda ku upenyu usikaperi. Kunyazi tecizviziya, nguwa dzimweni zvingatishuphira kuteerera nhungamiriro dza Djehovha maka-maka nhungamiriro iyona painopaswa ngo anhu asikazi kukwana. Ii ndiyo nguwa yekuti tinodikana kugonda maningi kuti Djehovha ndiyena ari kutungamirira anhu ake uye kuti kutondoedza nhungamiriro yake zvakatinakira nguwa dzese. w24.02 paji. 20 mandi. 2-3

Isusu tingatunhudzirawo rudo redu kuna Djehovha nge kunyasa kufunda Soko ra Mwari. Pamunoerenga Bhaibheri, edzai kuona kuti ngano imwe na imwe inomufundisei ngezva Djehovha. Dzibvunzisei kuti: ‘Ngano ii inopangidza kudini kuti Djehovha anondida? Ngano ii inondibetsera kudini kuti ndirumbwe ndecinyasa kuda Djehovha?’ Mushobo umweni watingaita kuti titunhudzire rudo redu kuna Djehovha ngewe kufunungura mwoyo wedu kaari nguwa dzese ngekuita munamato. (Pis. 25:4, 5) Ngekuita izvona, Djehovha anodaira minamato yedu. (1 Juau 3:21, 22) Isusu tinodikanawo kusakurira rudo redu ku amweni. Mumasure me makore manganani ekuti agara Mukristu, muphostori Pauro wakaziya mudjaha umweni unozwi Timoti. Timoti waida Djehovha uye waidawo amweni. Pauro wakabvunza hama dze ku Firipi kuti: “Andina umwenizve uno mwoyo wakaita hinga [wa Timoti] wekuti ucanyasa kumubetserai.” (Afi. 2:20) Pauro waishamisika no rudo rainga rina Timoti ku hama no hanzvadzi dzake. Apana mubvunzo kuti ungano dzaivhakacirhwa na Timoti dzaigara no cidaka-daka cekumutambira.—1 Ako. 4:17. w23.07 paji. 9 mandi. 7-10

Aisraeri asati apinda mu Nyika Yakapikirhwa, Mozesi wakafa. Pasina rubetso ra Mozesi, awona akagara asikazii zvekuita no anhu a Mwari here? Haiwa. Pese paaizorumbwa akagondeka kuna Djehovha, iyena aizoacengeta. Mozesi asati afa, Djehovha akamubvunza kuti waidikana kugadza Djoshuwa kuti agare mutungamiriri we anhu. Mozesi wakarowedza Djoshuwa ke makore akawanda. (Eki. 33:11; Dhe. 34:9) Kusiya izvona, anarume amweni akawanda ainga akagadzirira kutungamirira anhu—atungamiri e 1000, atungamiriri e 100, atungamiriri e 50 uye kutobatanidzawo atungamiriri e 10. (Dhe. 1:15) Anhu a Mwari ainga ecinyasa kucengethwa zvakanaka. Muezaniso umweni wakanaka watinawo nge wa Eriya. Ke makore akawanda, iyena wakabetsera anhu e Israeri kuti arumbwe ecibatanidzwa pakunamata kakacena. Asi pano nguwa yekuti Djehovha akapasa basa ripsva Eriya katemaidumba ke Djudha. (2 Mad. 2:1; 2 Mak. 21:12) Kodi Aisraeri akatendeka e umambo 10 akasiiwa ari ega here? Haiwa. Eriya wakarowedza Erizeu ke makore akawanda. Djehovha akarumbwa ecidzadzisa cinangwa cake uye ecicengeta zvakanaka aseenzi ake. w24.02 paji. 5 ndi. 12

Akristu e ku Efeso akasanangura kurarama maererano no Soko ra Mwari, rakaita hingana ruvheneko raiatungamirira. (Pis. 119:105) Aefeso aya akasiya zvese zvainga zvakabatana no magereja e kunyepa uye uhure. Awona akagara “ateedzeri a Mwari” uye akaita zviri zvese kuti anamate Mwari no mwoyo wese uye amupfadze. (Aef. 5:1) Nge mushobo umwewo, tisati tafunda cokwadi isusu tainga tiri mu cidima pano cokuita no magereja uye maitiro akashata. Amweni edu taibatanidzwa mu maferiyadho e magereja e kunyepa uye amweni aiita uhure. Asi patakafundira zvinodiwa na Djehovha takaita cinjo uye takatanga kurarama nge mushobo unodiwa na Djehovha. Nge kudaro, izvona zvakatiunzisira zviro zvakawanda zvakanaka. (Isa. 48:17) Asi zvino tinombodikana kurhwisana no zviro zvinganani. Uye tinodikana kuita zviri zvese kuti tigare kure no dima ratakasiya kure uye “kurumbwa tecihamba hingana ana e ruvheneko.” w24.03 paji. 21 mandi. 6-7

Pamweni imwimwi mungazwa hingana kuti amusati magadzirira kuti mudzipire kuna Djehovha uye mubhabhatidzwe. Pamweni imwimwi munodikana kuita cinjo mu upenyu wenyu kuti mutondoedze mitemo ya Djehovha kana kuti pamweni munotoda kacinguwa kuti mubambise kutenda kenyu. (Ako. 2:6, 7) Mufundi umwe na umwe unobudirira nge mushobo wakasiyana-siyana uye aesepi madjaha anobhabhatidzwa no thunga rakaezana. Zvinokosha maningi kuti mudzione kuti icinjo dzipi dzamunodikana kuita pedzepo petai masimba kuti muite cinjo idzona musikadziezanisi no amweni. (Aga. 6:4, 5) Kunyazi imwimwi mukaona kuti amusati magadzirira kuti mudzipire kuna Djehovha, rumbwai muno cinangwa icona. Kumbirai Djehovha rubetso kuti mukwanise kuita cinjo dzamunodikana kuita. (Afi. 2:13) Imwimwi mungagonda kuti Djehovha acadaira minamato yenyu uye acamubetsai.—1 Juau 5:14. w24.03 paji. 5 mandi. 9-10

Pamugariro umweni, Sara wainga akanyangadzwa maningi, uye wakabvunza mwamuna wake Abrahamu zvese zvaaizwa. Iyena wakatoguma pakupasa ndaa Abrahamu nge zvese zvakaitika. Abrahamu waizviziya kuti Sara wainga ari mwanakadzi waidzikanda pasi uye waimutsigira. Iyena wakapurutana Sara uye wakaedza kugadzirisa nyaya ii. (Gen. 16:5, 6) Tingafundei? Amuna, tinozviziya kuti imwimwi muno ubaba wekuita zvisananguro mu mhuri. (1 Ako. 11:3) Kunyazi zvakadaro, zvaizonga zvakanaka maningi kudai mainyasa kupurutana maonero e akadzi enyu musati maita cisananguro, maka-maka kana cisananguro icona cecibata-bata mukadzi wenyu. (1 Ako. 13:4, 5) Zuwa rimweni pakaguma arendo panguwa isikakarirhwi uye Abrahamu wakasanangura kuapika kuti arhye nawo. Iyena wakakumbira kuti Sara asiye zvaaiita kuti abike pau dzakawanda. (Gen. 18:6) Sara wakatsigira cisananguro ca Abrahamu uye panguwa iyona kamare wakaita zvaainga akumbirhwa. Akadzi, imwimwi mungateedzera muezaniso wa Sara, ngekutsigira zvisananguro zve amuna eyu. Nge kuita izvona, imwimwi munobambisa mucato wenyu.—1 Ped. 3:5, 6. w23.05 mapaji. 24-25 mandi. 16-17

Mumasure mekuti Gidhioni wagadzwa hinga mutongi ku Israeri, iyena waidikana kugara munhu unopurutana uye uno ushingi. Asi izvona zvainga zvisiripi nyore. Iyena wakapaswa ubaba wainga uri pa ngozi we kuparadza artari yaiseenzeswa pakunamata Bhaari yainga iri ya baba ake. (Ato. 6:25, 26) Paapadarika nguwa, kairi kese Djehovha akabvunza Gidhioni kuti apungure masurudado ake. (Ato. 7:2-7) Uye iyena wakapaswawo mutemo we kuenda koorhwisa musasa we azondi pakati pe usiku. (Ato. 7:9-11) Akuru anodikana kugara “akagadzirira kuteerera.” Mukuru unoteerera aanonoki kuita zviya zvinobhuiwa no Bhaibheri uye no sangano ra Djehovha. Ngokuita izvona, awona anopasa muezaniso wakanaka ku amweni. Asi pa migariro imweni, azviripi nyore kuteerera. Ngo muezaniso, pamweni paya akuru anopaswa nhungamiriro dzakawanda, kana kuti idzona dzinocinja ciriporipoco. Nguwa dzimweni awona anogara no mubvunzo kuti nhungamiriro idzona dzinobudiriradi kamare here kana kuti haiwa. Pamweni paya awona anozviziya kuti kana akatenda ubaba anodzikanda pa ngozi ye kukandwa mu karaboso. Nyasai kupurutana uye seenzesai nhungamiriro. w23.06 mapaji. 4-5 mandi. 9-11