Mayo

Akristu e mu nguwa ya Djesu akabatanawo no nzara yakakura yakaitika “mu nyika yese yaigarhwa.” Apana mubvunzo wekuti aya ainga ari misoro ye mhuri ainetseka maningi kuti aone zvekurhya zvekuti akwanise kupasa mhuri yawo. Uye cimborangaridzai kubata-bata kazvakaita madjaha aya ainga akaronga kuita zvakawanda mu basa re kuparidzira. Nguwa dzimweni, pamweni aitorangarira kucinja urongwa wawo. Kunyazi migariro yainga yakasiyana ku umwe na umwe wawo, Akristu e mu nguwa iyona akaedza kugutsikana no zviya zvaainga anazvo. Awona akarumbwa eciparidzira nge mushobo waaikwanisa, uye aipfara nge kupungurirana zviya zvaainga anazvo no hama dze ku Djudha. (Zvii. 11:29, 30) Aya akatambira rubetso re zvekurarama nazvo akaona pamhene kuti Djehovha aiabetsera zvakadini. (Mat. 6:31-33) Awona pamweni akazotozwa ari padhuze no hama dziya dzaiabetsa. Uye aya akapasa zvipo kana kuti aya akabetsera nge mushobo umweni, akakwanisa kuzwa mupfaro we kubetsera amweni.—Zvii. 20:35. w23.04 paji. 16 mandi. 12-13

Nguwa dzimweni, Djehovha angadaira minamato yedu ngekuita kuti anhu asikamuseenzeri atibetsere. Ngo muezaniso, Djehovha akaita kuti Mambo Artaxerxe atendere kuti Neemiya ahwirire ku Djerusarema kuti abetsere pakuwakwazve ke thaundi. (Nee. 2:3-6) Mazuwa ano, Djehovha angaitawo kuti anhu asikamuseenzeri aitewo zvimwezvo. Kakawanda kakhona minamato yedu aidairhwi nge mushobo unoshamisa. Asi mhinduro ye minamato yedu yatinopaswa na Djehovha ndiyona kamare yatinoda kuti tirumbwe takagondeka kaari. Ngokudaro, garai makagadzirira kuti muone kuti Djehovha anodaira kudini minamato yenyu. Ndiyo ndaa zvakanaka maningi kuti nguwa no nguwa tiime uye torangarira kuti Djehovha arikudaira kudini minamato yenyu. (Pis. 66:19, 20) Isusu tinopangidza kuti tino kutenda haiwa basi patinoita minamato kuna Djehovha, asi patinotenderawo mhinduro yaanotipasa pasinei nokuti yadairhwa kudini.—Aheb. 11:6. w23.05 mapaji. 12-13 mandi. 13, 15-16

Patakadzipira kuna Djehovha, isusu takapikira kuti taizomunamata uye taizoita kuda kake nokusikaperi uye tinodikana kudzadzisa cipikirhwa icona. Kuita zvese zvatakapikira kuna Djehovha ubaba wakakura asi azviremi. Uye Djehovha akatisika kuti tiite kuda kake. (Zvak. 4:11) Iyena akatisika no cido cekumuziya, kumunamata uye akatisika no mufanikiso wake. Ndiyo ndaa tinokwanisa kukhwedera dhuze na Djehovha uye zvinotipfadza patinoita kuda kake. Kusiya izvona, kana tikaita kuda ka Mwari uye tozwira Mwana wake, isusu “ticazorodzwa.” (Mat. 11:28-30) Rumbwai mecibambisa rudo renyu kuna Djehovha, ngekunyasa kurangarira zviro zvese zvakanaka zvaakamuitirai uye makomborero ese aacamupasai. Kana rudo renyu kuna Mwari rikarumbwa recikura, zvicaita nyore kuti imwimwi mumuzwire. (1 Juau 5:3) Djesu wakakwanisa kuita kuda ka Djehovha ngekuti ainamata kaari ecikumbira rubetso uye akakanda ndangariro dzake pa mubairo wake. (Aheb. 5:7; 12:2) Kuita hingana Djesu, namatai kuna Djehovha mecikumbira simba uye kandai ndangariro dzenyu pa kariro ye upenyu usikaperi. w23.08 mapaji. 27-28 mandi. 4-5

Isusu tinoreremedza anhu anokwanisa kuetsera ciro asikanyangadzwi. Isusu tinotenda maningi kana munhu akapangidza mwoyo unononoka kutsamwa kunyazi takaita ciro cakashata. Uye tinotenda maningi munhu wakatifundisa Bhaibhei ngo kuetsera no mwoyo unononoka kutsamwa pataipeta masimba kuti tifundire, titendere kana kuti kuseenzesa muupenyu wedu zvataifunda. Kupinda zvese izvi, tinotenda maningi Djehovha no mwoyo unononoka kutsamwa waanotipangidzira! Kunyazi tecikoshesa munhu paanopangidza mwoyo unononoka kutsamwa, pamweni zvingatishuphira kupangidzawo mwoyo uwona. Ngo muezaniso, pamweni zvingatishuphira kurumbwa takaterama pa mbuto ino karu dzakawanda maningi dziri kuda kudarika. Maka-maka panguwa yekuti tinonga tanonoka paciro catinonga takapangana no munhu. Uyewo, tingatama kugara no mwoyo unononoka kutsamwa kana munhu akaita ciro cinotinyangadza uye nguwa dzimweni kuetsera zvipikirhwa zvakaringana no nyika ipsva, zvingagara zvisiripi nyore. Pa migariro yese iyi ye zviro, tinodikana kugara no mwoyo unononoka kutsamwa. w23.08 paji. 20 mandi. 1-2

Nge nhungamiriro ya Djehovha, Gidhioni waidikana kuendesa kumba masurudado akawanda. Gidhioni pamweni waida kurangarira kuti: ‘Kodi ndinodikanadi kuita izvona kamare? Zvinobudiriradi?’ Kunyazi zvakadaro, Gidhioni wakateerera. Nyamasi uno akuru anoteedzera muezaniso wake nge kuita cinjo dzinobhuiwa no sangano ra Djehovha. (Aheb. 13:17) Gidhioni wakateerera Djehovha kunyazi paaitya uye pazvaimukanda pa ngozi. (Ato. 9:17) Mumasure mekuti abambiswa na Djehovha, Gidhioni wakagara no rugondo rokuti Djehovha aizomubetsera kuti iyena acengete anhu ake. Akuru anogara ku mbuto yekuti basa redu ririkurambidzwa, anoteedzera muezaniso wa Gidhioni. Awona ano ushingi uye anotungamirira kuronga misangano uye kuparidza, kunyazi ecidzikanda pa ngozi ye kusungwa, kana kubvunziswa zvakawanda kuruza basa kunyazi kubathwa no bvinga. Panguwa ye dambudziko guru akuru acadikana kugara no ushingi kuti ateerere nhungamiriro dzaanonga ecipaswa kunyazi kuita izvona zveciakanda pa ngozi. w23.06 mapaji. 5-6 mandi. 12-13

Uye ndizvona kamare zvakaizwa na Mupristi Mukuru Djeoyadha. (1 Sam. 2:30) Ngo muezaniso, iyena akaita kuti ngano ya Djeoyadha itarhwe mu Bhaibheri kuti tifunde ngezvake. (Aro. 15:4) Uye Djeoyadha paakafa iyena wakagara no cikomborero cokuigwa “mu Thaundi ra Dhavhidhi pamwepo no madzimambo ngekuti wainga aita zviro zvakanaka mu Israeri pa zviro zvinocokuita na Mwari we cokwadi pamwepo no nyumba Yake.” (2 Mak. 24:15, 16) Ngano ya Djeoyadha ingatibetsera kuti titunhudzire kuthya kedu Djehovha. Akuru angateedzera Djeoyadha ngekugara ecipsvaka mishobo ye kudziirira ungano. (Zvii. 20:28) Aya acembera angafunda no muezaniso wa Djeoyadha kuti kana akathya Djehovha uye orumbwa akagondeka, Djehovha acaaseenzesa kuti aite kuda Kake. Uye madjaha angafunda no muezaniso wa Djehovha nge kubata no rureremedzo aya akura hinga mabatire akaita Djehovha Djeoyadha kunyanya aya aano makore akawanda ecimuseenzera. (Zvie. 16:31) Ngatitsigire takagondeka “aya anotungamirira” nge kuwateerera.—Aheb. 13:17. w23.06 paji. 17 mandi. 14-15

Pa misangano, garai munhu anozwisisa pamunonga mecisanangura kuti mucadaira kangana. Kana imwimwi mukamutsa nyara kakawanda, izvona zvingakwanisa kuita kuti muitisi azwe kubambidzirhwa kupasa mukana imwimwi kuti mudaire kunyazi amweni asati adaira. Izvi zvingapedzesera zvaakurembesa amweni kumutsa nyara. (Mup. 3:7) Kana hama dzakawanda dzikamutsa nyara pa nguwa inonga yeciizwa fundo, zvingaita kuti pamweni tisadaire kakawanda hinga zvataida. Nguwa dzimweni muitisi angakonerhwa kutipasa mukana kunyazi kamwe hako. Izvona zvingakwanisa kuita kuti tiore mwoyo, asi atidikani kunyangadzwa ngokuti atizi kupaswa mukana. (Mup. 7:9) Kana imwimwi mukasama kudaira kakawanda hingana zvamaida, zvakadini kunyasa kupurutana mhinduro dzinopaswa no amweni uye mumasure me misangano moatenda nge zvaanonga aita? Pamweni hama no hanzvadzi dzingazwa kubambiswa ngekudzisimba kamunodziita kuita hingana kubambiswa kaaizoizwa nge mhinduro yenyu iya yamaida kupasa. w23.04 mapaji. 23-24 mandi. 14-16

Fundai uye nyasai kurangarira Soko ra Mwari. Nzinde dze muti padzinonyanya kuenda pasi, uwona unonyanya kubamba, nge mushobo umwewo patinorumbwa tecifunda Soko ra Mwari kutenda kedu kunonyasawo kubamba. Uye izvi zvinoita kuti tirumbwe takabamba. Patinofunda uye kunyasa kurangarira zviri mu Soko ra Mwari tinogara no rugondo rokuti zvatinokumbirhwa na Djehovha zvakatinakira. (Ako. 2:6, 7) Rangarirai kubetsera kakaita nhungamiriro dza Djehovha, mazano ake uye kudziirira kake ku aseenzi ake e kare. Nge muezaniso, paciono Ezekieri wakanyasa kuringira ngirozi payaipima tempro. Ciono cakabambisa Ezekieri uye cakatifundisa zviro zvinokosha pa mushobo wekudziirira uye kuzwira mitemo ya Djehovha pakunamata kakacena. (Ezek. 40:1-4; 43:10-12) Isusu tinobetsereka patinofunda uye patinonyasa kurangarira zviro zvese zvakaitika uye no zviro zvakadzika zviri mu Soko ra Mwari. Isusu tingakwanisa kugara no mwoyo wakabamba tecigonda Djehovha zvakadjeka.—Pis. 112:7. w23.07 paji. 18 mandi. 15-16

Mu Bhaibheri mune miezaniso yakawanda yekuti madjaha angakwanisa kuiteedzera. Miezaniso iyona, ngeye anarume aida Djehovha uye akakwanisana no ubaba wakasiyana-siyana kuti acengete anhu ake. Imwimwiwo mungakwanisa kugumira miezaniso yakanaka ye Akristu amweni akakura pakunamata mu mhuri menyu kamare uye mu ungano. (Aheb. 13:7) Uye imwimwi muno muezaniso wakakwana wa Djesu Kristu. (1 Ped. 2:21) Pamunonyasa kufunda ngezve muezaniso iyona, nyasai kurangarira ngezve mawara akanaka anopangidzwa no anarume awona. (Aheb. 12:1, 2) Pedzepo onai kuti mungaateedzera kudini. Mwanarume unokwanisa kunyasa kurangarira unotanga anyasa kurangarira asati asanangura zvaacaita. Hino, petai masimba kuti musakurire uye mugare munhu unokwanisa kunyasa kurangarira. Tangai ngekufunda zvokwadi zvisikacinji zvo Bhaibheri uye rangarirai kuti ngei izvona zvecibetsera. Pedzepo seenzesai zvokwadi izvi zvisikacinji pamunoita zvisananguro zvinozopfadza Djehovha. (Pis. 119:9) Munonga maita danho rakakura maningi rekuti muzogare Mukristu wakakura pakunamata.—Zvie. 2:11, 12; Aheb. 5:14. w23.12 mapaji. 24-25 mandi. 4-5

Abereki angabetsera ana awo kuziya kuti angadaira kudini no upfawi paya pekuti munhu unoita mubvunzo ngezve zviya zvaanotenda. (Tig. 3:13) Abereki anganani angaroedza ana awo pa nyaya dzakaita hingana idzi pakunamata ke mhuri. Awona anofunda nyaya dzinganani dzingakwanisa kuoneka kucikora uye anotoita miezaniso opangidza kuti angadaira kudini. Anofundisawo ana awo kuti adaire no upfawi uye anoafundisawo kudaira nge mushobo unoita kuti amweni ade kuziya zvakawanda. Kumbodzirowedza pacino nguwa kungabetsera madjaha kupanganidzira adoni awo ngezve zviya zvaanotenda uye kugara akagutsikana kuti anozvikonzero zvakawanda kuti atende zvinorekethwa no Bhaibheri. Pa mbuto yakazwi: “Vechidiki Vanobvunza Kuti” iri mu saiti ye jw.org ino matii manganani angabetsera madjaha. Mbuto idzona dzinobetsera madjaha kuti abambise kutenda kawo uye dzinoabetsera kuti apase mhinduro eciseenzesa masoko awo. Mhuri padzinofunda pamwepo ma artigo aya, ese anofundira kuti angadziirira kutenda kawo nge mushobo uno upfawi uye unoita kuti anhu ade kupurutana. w23.09 paji. 17 ndi. 10; paji. 18 mandi. 15-16

Imwimwi makambogara no cinangwa cekunamata asi makashuphirhwa kuti mucidzadzise here? Hino ziyai kuti andimwipi mwega. Ngo muezaniso, Philip wakaona kuti waidikana kunamata kakawanda uye kutunhudzira mushobo wake wekuita munamato, asi wakashuphirhwa maningi kuti awone nguwa yekuita izvona. Uye Erika wainga ano cinangwa cekukasika kuguma ku misangano yekubuda mu basa re kuparidzira, asi kakawanda kakhona, iyena wainonoka kuguma. Kana imwimwi murikuseenza no simba kuti mudzadzise cinangwa cenyu asi amusati mazvikwanisa, musarangarire kuti imwimwi amubetseri. Kudzadzisa cinangwa kunyazi ciri cidoko iciro cinoda nguwa uye kupeta masimba. Uye kupeta masimba kamuri kuita kunotopangidza kuti munokoshesa ushamwari wenyu na Djehovha uye munoda kunyasa kumuseenzera. Ziyai kuti Djehovha anokoshesa maningi kupeta masimba kamuri kuita, uye zviri pamhene kuti iyena aaetseri kuti timuitire zviro zvatisikakwanisi kuita. (Pis. 103:14; Mik. 6:8) Hino, pamunosanangura cinangwa, garai no maonero ari pakati no pakati. Sanangurai cinangwa camunokwanisa kudzadzisa. w23.05 paji. 26 mandi. 1-2

Anhu ano ushingi angathyawo, asi aasii kuti kuthya ikona kuapingaidze kuita zviro zvakanaka. Dhanyeri wainga ari mudjaha uno ushingi wakakura maningi. Iyena waifunda ngezve uphorofita wainga wakatarhwa kubatanidzawo uphorofita wa Djeremiya. No fundo ii Dhanyeri wakakwanisa kuona kuti nguwa yekuti Adjudha agare ku Bhabhironi yainga yaapadhuze kupera. (Dha. 9:2) Kuona uphorofita uu we mu Bhaibheri wecidzadzika, zvezvirokwazvo zvakabambisa kutenda ka Dhanyeri kuna Djehovha uye ese anogonda Djehovha anokwanisa kupangidza ushingi wakakura. (Ezanisai na Aroma 8:32, 37-39.) Uye cakakosha pane zvese, Dhanyeri waiita munamato kuna Djehovha. (Dha. 6:10) Dhanyeri waikumbira rurekerero uye waireketa mazwiro ake. Uye Dhanyeri waikumbira rubetso. (Dha. 9:4, 5, 19) Dhanyeri wainga ari munhu hingana isusu, hino iyena aazi kubarhwa no ushingi. Asi iyena wakakwanisa kusakurira wara iri ngekufunda, kuita munamato uye kugonda Djehovha. w23.08 paji. 3 ndi. 4; paji. 4 ndi. 7

Kuzwira mutemo we anyautongi, kunobetsera isusu no amweni. Kuitisa kudini? Cekutanga, isusu atiphanicwi hinga kuphanicwa kunoita amweni asikazwiri mutemo. (Aro. 13:1, 4) Uye kuzwira kedu kungabata-bata maonero aanoita apupuri a Djehovha hinga cikwata. Ngo muezaniso, makore akadarika ku Nigéria masurudado akapinda mu Nyumba ye Umambo ecipsvaka anhu asikadi kuripa misoho. Asi mutungamiriri we masurudado wakakumbira kuti masurudado abude mu Nyumba ye Umambo uye wakabhuya kuti: “Apupuri a Djehovha nguwa dzese anoripa musoho.” Pese patinopurutana mitemo ye anyautongi, anhu anoona zvakanaka miitiro ye aseenzi a Djehovha uye mune ramangwana pamweni miitiro ii yakanaka ingakwanisa kudziirira hama dzedu. w23.10 paji. 9 ndi. 13

Aseenzi amweni a Djehovha ari kuetsera mugumo we mugariro uno we zviro ke makore akawanda. Mukuona ke anhu zvinoita hingana kuti zvipikirhwa zva Mwari zviri kunonoka kudzadzika. Asi Djehovha anoziya kuti aseenzi ake anozwa kudini, iyena akatoguma pakubvunza muphorofita Abhakuki kuti: “Ngekuti zvauri kupangidzwa zvicaitika pa nguwa yakasisira, uye nguwa yekuti zviitike yaa dhuze, izvona azvizombotami kuitika. Kunyazi zvikanonoka, rumbwa wakaetsera! Ngekuti izvona zvicandoitika. Azvizononoki!” (Abha. 2:3) Kodi Djehovha akareketa masoko aya kuti anyaradze Abhakuki basi here? Kana kuti masoko aya anoseenzawo katiri nyamasi uno? Afemerhwa, Pauro wakatarawo masoko amwewo ku Akristu arikuetsera nyika ipsva. (Aheb. 10:37) Tingagonda hedu kuti kunyazi hazvo mumaonero edu zveciita hingana kuti zvipikirhwa izvi zvirikunonoka kudzadzika, izvona “zvicandodzadzika basi. Azvizononoki!” w23.04 paji. 30 ndi. 16

Aisraeri akaramba kutendera kuti Djehovha aiseenzesa Mozesi hinga muimiriri. (Num. 14:10, 11) Nge ndaa yazvo, Djehovha aazi kutendera kuti mibarirhwana ii ye Aisraeri ipinde mu Nyika Yakapikirhwa. (Num. 14:30) Nge dii rimweni, Aisraeri amweni akatondowedza nhungamiriro ya Djehovha. Ngo muezaniso, Djehovha akati: “Karebhi . . . wakarumbwa ecinditera no mwoyo wese.” (Num. 14:24) Djehovha akakomborera Karebhi uye akatomupasa dii raakasanangura mu nyika ye Kanani. (Djs. 14:12-14) Mubarirhwana wakazoteera we Israeri wakazorumbwawo wecizwira nhungamiriro dza Djehovha. Mumasure mekuti Mozesi wafa uye Djoshuwa wagara mutungamiriri we Israeri, awona “akamureremedza mu upenyu wake wese.” (Djs. 4:14) Mugumisiro wakhona, Djehovha akakomborera Aisraeri uye akaatora dakara ku nyika yaainga akaapikira.—Djs. 21:43, 44. w24.02 paji. 21 mandi. 6-7

Kuitawo hinga medhiko unokwanisa kuona kuponda ke mwoyo we munhu ngekupima pa moko pake, isusu tinokwanisawo kuziya kuti rudo redu na Mwari rakabamba kudini nge madire atinoiita amweni. Kana tikaziya kuti rudo redu ku hama dzedu riri kutonhora, pamweni izvona zvingapangidza kuti rudo redu na Djehovha riri kupunguka. Asi kana tikarumbwa tecipangidza rudo ku hama dzedu, zvinopangidza kuti rudo redu na Djehovha rakabamba. Kana rudo redu ku hama dzedu rikatanga kupunguka, ici i cinetso cakakura maningi. Ngei? Ngekuti ici cipangidzo cekuti ushamwari wedu na Djehovha uri kupera. Muphostori Juau wakazvibudisa pamhene paakati: “Uya asikadi hama yake, yaanoona, aangakwanisi kuda Mwari, uya waasikaoni.” (1 Juau 4:20) Izvona zvinotifundisei? Zvinotifundisa kuti tinokwanisa basi kupfadza Djehovha kana “tikada umwe na umwe wedu.”—1 Juau 4:7-9, 11. w23.11 paji. 8 ndi. 3; paji. 9 mandi. 5-6

Paainga aciri djaha, Mambo Djoashi akaita cisananguro cakanaka. Iyena ainga asina baba, hino akatondoedza mazano a Djeoyadha, Mupristi Mukuru wainga akagondeka. Djeoyadha wakarera Djoashi hinga mwana wake kamare. Nge ndaa ye muezaniso wakanaka wa Djeoyadha, Djoashi wakasanangura kuseenzera Djehovha uye kubetsera aseenzi a Mwari kuti aite zvimwezvo. Djoashi ndiye kamare wakahwirinzazve kunamathwa ka Djehovha mu tempro. (2 Mak. 24:1, 2, 4, 13, 14) Kana abereki enyu kana kuti munhu umweni uri kumufundisai ngezva Djehovha uye no zviro zvaanopfarira, imwimwi mungagara no rugondo rekuti izvona i cipo cinokosha kamuri. (Zvie. 2:1, 10-12) Abereki enyu angakwanisa kumufundisai nge mishobo yakasiyana-siyana. Kana imwimwi mukaseenzesa mazano e mu Bhaibheri aanonga amupasai. Asi, cinonyanya kukosha nge cekuti Djehovha acapfara maningi uye ushamwari wenyu naye ucatunhudzira kubamba. (Zvie. 22:6; 23:15, 24) Izvi izvikonzero zvakanaka zve kuteedzera muezaniso wa Djoashi paainga aciri mudjaha. w23.09 mapaji. 8-9 mandi. 3-5

Djehovha anotigondesa kuti acapurutana minamato yedu. Mwari wedu anoda aseenzi ake akagondeka, hino iyena aambofuratiri minamato yawo. (Pis. 10:17; 37:28) Asi izvona azvireyi kuti iyena acatipasa zvese zvatinomukumbira. Zviro zvimweni zvatinomukumbira ticazvitambira mu nyika ipsva basi. Djehovha anoona kuti zvikumbiro zvedu zvinoenderana kudini no cinangwa cake. (Isa. 55:8, 9) Dii rimweni re cinangwa ici rinobatanidza kudzadza nyika no anhu acagara no rubatano uye mupfaro pasi pe utongi wake. Asi Sathani unobhuya kuti anhu acazopfara maningi kana akadzitonga ega. (Gen. 3:1-5) Kuti apangidze pamhene kuti zvakabhuyiwa na Dhiyabhurosi i manyepo, Djehovha anotendera kuti utongi we anhu uoneke nyamasi uno. Asi utongi we anhu ndiwona uri pamberi pakubara matambudziko e anhu anooneka nyamasi uno. (Mup. 8:9) Isusu tinozviziya kuti Djehovha aapedzi zvino matambudziko ari kubarhwa mazuwa ano. w23.11 paji. 21 mandi. 4-5

Djehovha akagondesa kuti peciseenzeswa Abrahamu, “madzinza” akawanda aizokomborerhwa. Asi nguwa yaihamba, Abrahamu wainga aano makore 100 uye Sara wainga ano makore 90, uye awona ainga asati aano mwana. Mu maonero e anhu zvainga zvisikaitiki kuti Abrahamu na Sara agare no mwana. Uye izvi zvakaedzawo kutenda ka Abrahamu. Asi iyena “ wainga ano kutenda kaibva pa kariro, kuti waizogara baba e madzinza akawanda.” (Aro. 4:18, 19) Pakupedzesera, mwana wainga ecikarirhwa wakabarhwa. Abrahamu wakagara baba a Izaki. (Aro. 4:20-22) Hinga zvataona, isusu tingakwanisa kutenderhwa uye kuzwi anatsi na Djehovha hingana zvakaitika na Abrahamu. Zvezvirokwazvo, Pauro wakabhuyazve ngezvazvo paakati: “Masoko ekuti ‘zvakaita kuti azwi’ aazi kutarhwa basi nge ndaa yake [Abrahamu] asi akatarhwawo nge ndaa yedu, ngokuti tinozodainzwawo kuti anatsi, ngokuti tinotenda Uya akamutsa Djesu.” (Aro. 4:23, 24) Kuitawo hinga Abrahamu, isusu tinodikana kugara nokutenda, kupangidza no zviito uye kariro. w23.12 paji. 7 mandi. 16-17

Kana mecisongana no migariro inomuitisai kuti muthye, edzurirai kuti Djehovha ari kuona cinetso camuri kusongana naco uye iyena anonyasa kuziya mazwiro enyu. Ngo muezaniso, panyaya ye Aisraeri ku Edjipitu, pane kuona migariro inoshupha yaaisongana nayo, Djehovha akaabvunza kuti “ainyasa kuziya [kushuphika] kaaiita.” (Eki. 3:7) Nguwa dzimweni, imwimwi munosodzibvunzisa kuti Djehovha anomubetserai kudini kuti mukunde zvinetso? Itai munamto kaari mecikumbira kuti amubetserei kuona rubetso raari kumupasai. (2 Mad. 6:15-17) Cimborangarirai kuti: Makambobambiswa here ngo mharidzo kana kuti mhinduro yakapaswa no munhu pa musangano? Pano bhuku, vhidhiyo kana kuti ngoma yakamubambisai here? Pano munhu akambocedza na imwimwi ngezve ciro kana kuti tsamba yakamubambisai? Nguwa dzimweni, tinokanganwa kudiwa katinoizwa no hama dzedu uye kubetserhwa katinoizwa peciseenzeswa Bhaibheri. Asi izvi i zvipo zvinoshamisa zvatinopaswa na Djehovha. (Isa. 65:13; Mark. 10:29, 30) Izvona i zvipangidzo zvekuti Djehovha anotikoshesa. (Isa. 49:14-16) Uyewo i zvipangidzo zvekuti Djehovha anosisira rugondo redu. w24.01 mapaji. 4-5 mandi. 9-10

Nguwa doko asati ahwirira kudenga, Djesu akaedzurira afundi ake kuti aidikana kupasa upupuri ngezvake mu “Djerusarema, mu Djudhiya mwese ne mu Samariya, uye dakara ku mbuto dziri kure dze nyika.” (Zvii. 1:8; Ruka 24:46-48) Mumasure me cinguwa, atungamiriri e Cidjudha akasunga Pedru na Juau uye akaaendesa ku Sinedhriyo, uye aona akarambidzwa kuparidzira uye akaathyisidzira. (Zvii. 4:18, 21) Pedru na Juau akati: “Kudai mecirangarira kuti zvino unatsi pamberi pa Mwari kuti tipurutane imwimwi pane kupurutana Mwari, zviri kamuri. Asi kana tiri isusu, atingasii kureketa ngezve zviro zvatakaona no zvatakazwa.” (Zvii. 4:19, 20) Pedru na Juau paakasudzunurhwa, afundi akaita munamato kuna Djehovha ecikumbira rubetso rake kuti arumbwe eciita kuda kake. Djehovha akadaira munamato uu wakaizwa no mwoyo wese.—Zvii. 4:31. w23.05 paji. 5 mandi. 11-12

Ke mabhirionji e makore, Djehovha no Mwana wake akararama ese kudenga uye akagara no rudo rakakura ku umwe na umwe wawo. Djehovha akanyasa kupangidza pamhene kuti aida Djesu, hinga zvatinoerenga mu tsamba ya nyamasi. Djehovha angadai akabhuya basi kuti: ‘Uu ndiye wandapfarira.’ Asi iyena aida maningi kuti isusu tiziye kuti anoda maningi Djesu, ndiyo ndaa akabhuya kuti Djesu ndi “Mwana wake mudusiswa.” Djehovha aidada maningi na Djesu ngokuti iyena ainga akagadzirira kupasa upenyu wake. (Aef. 1:7) Djesu ainga asina mubvunzo kuti Baba ake aimuda. Iyena ainga ano rugondo rekuti Djehovha aimuda zvekuti akatobhuya kakawanda kuti Baba aimuda.—Juau 3:35; 10:17; 17:24. w24.01 paji. 28 ndi. 8

Cimborangaridzai nyaya ii: Munhu wamunoda maningi unobhuya zvakashata nge zvenyu. Uye imwimwi munozviziya kuti azvirokwazvopi, asi anhu anganani anozvitendera. Uye kupinda izvona, awona anotanga kubararisa manyepo aya, uye anhu akawanda anotanga kuzvitendera. Pakadaropo maizozwa kudini? Zvezvirokwazvo imwimwi maizotsukwara maningi ngezvazvo, andizvopi? Nyaya ii inotibetsera kuzwisisa kuti Djehovha akazwa kudini zina rake parakasvipiswa. Umwe we ana ake e kumwiya, wakareketa manyepo nge zvake ku mwanakadzi we kutanga, Evha. Uye iyena wakatendera manyepo aya. Nge ndaa ye manyepo aya, abereki edu ekutanga, akapandukira Djehovha uye mugumisiro wakhona nge wekuti citema uye rufu, zvakabararika ku anhu ese. (Gen. 3:1-6; Aro. 5:12) Matambudziko ese atiri kuona mu nyika nyamasi uno—hingana rufu, hondo, uye kushuphika—zviripo nge ndaa ye manyepo akarekethwa na Sathani. Kodi Djehovha ari kuzwa kudini nge kuona matambudziko ese aya akakonzerhwa nge ndaa ye manyepo aya? Zvezvirokwazvo, izvi zviri kutsukwarisa maningi Djehovha. Asi kunyazi zvakadaro, Djehovha aazi kugara Mwari anoita zvakashata kana kuti no bundu, asi anorumbwa ari “Mwari anopfara.”—1 Ti. 1:11. w24.02 paji. 8 mandi. 1-2

Mungateedzera kudini Zuzee uye morumbwa makatendeka kuna Mwari paya pamunoedzwa? Imwimwi mungasanangura zvino zvamungaita kuitira paya pamunozoedzwa. Musarangarire kairi katatu kubhuya haiwa zviya zvinozondwa na Djehovha uye musarumbwe mecirangarira zviro izvona. (Pis. 97:10; 119:165) Kana imwimwi mukaita izvona, mucakwanisa kukunda miedzo. Zvingaita kuti imwimwi maano rugondo rokuti magumira cokwadi uye munoda kuseenzera Djehovha no mwoyo wese. Asi, pamweni munozwa hingana musikazi kugadzirira kuti mudzipire kuna Djehovha uye mobhabhatidzwa. Pakadaro imwimwi mungakwanisa kuita zviro zvimwezvo zvakaizwa na Mambo Dhavhidhi. Iyena wakadeketera kuna Djehovha kuti: “Ndiongororei, ndapota Mwari uye ziyai mwoyo wangu. Ndiedzurirei muziye zviri kundinetsa mu mwoyo. Onai kana ndino marangariro akashata, uye nditungamirirei mu gwanza re unatsi.” (Pis. 139:23, 24) Djehovha anokomborera aya “anomupsvaka no mwoyo wese.” Kupeta kenyu masimba kuti mudzadzise cinangwa cenyu ce kudzipira kuna Djehovha uye kubhabhatidzwa kunopangidza kuti imwimwi muri kuita izvona kamare.—Aheb. 11:6. w24.03 paji. 6 mandi. 13-15

Mupristi mukuru waiimirira anhu pamberi pa Mwari. Mupristi mukuru wekutanga we Aisraeri wainga ari Aroni, uye iyena wakagadzwa na Djehovha tabhernakuro payakadimurhwa. Asi hinga zvakapanganidzwa na muphostori Pauro, “zvaidikana kuti paoneke apristi akawanda kuti atsiye amweni ainga afa, ngokuti rufu raiaita kuti asarumbwe eciseenza.” (Aheb. 7:23-26) Hino ngekuti ainga ari anhu asikazi kukwana, awona aidikana kupira zvibairo kuitira zvitema zvawo. Apa isusu tinoona musiyano wainga uripo pakati pe apristi akuru e Aisraeri no Mupristi Mukuru, Djesu Kristu. Hinga Mupristi Mukuru, Djesu Kristu ndi “museenzi . . . we mu tenda re cokwadi, rakaimiswa na Djehovha, haiwa nge munhu.” (Aheb. 8:1, 2) Pauro wakapanganidza eciti: “Ngokuti [Djesu] anogara ari mupenyu nguwa dzese, apana anomutsiya pa upristi wake.” Pauro wakabhuyawo kuti Djesu aazi “kusvipiswa, akaparadzaniswa no ashaishi” uye mukusiyana no apristi akuru e Israeri, “iyena aadikani kupasa mipiro mazuwa ese” kuitira zvitema zvake. w23.10 paji. 26 mandi. 8-9

“Denga rokare” ririkubhuiwa apa rinoreya anyautongi ari kutungamirirhwa na Sathani uye no madhimoni ake. (Mat. 4:8, 9; 1 Juau 5:19) Mu Bhaibheri soko rekuti, “nyika” ringaseenzeswa pakuda kureya agari e nyika. (Gen. 11:1; Pis. 96:1) Ngokudaro, “nyika yokare” zvinoreya anhu anoita zvakashata. Djehovha aaedzi kuda kugadzirisa “denga uye nyika” zvekuti zviripo zvino, ngokudaro iyena acazvitsakatisa zvacose. Uye pambuto pazvo, iyena acaunzisa “denga ripsva no nyika ipsva. Djehovha acagadzirisa nyika uye oita kuti anhu agare akakwana. Hinga zvinobhuiwa no uphorofiti uri pana Isaya, Djehovha acaita kuti Nyika yese igare yakarungama hinga zvainga zvakaita munda we Edheni. Kugadziriswa uku kucatobatanidzawo no anhu. Djehovha anotigondesa kuti acatiporesa pa matenda ese. Mapofu no asikazwi uye akaremara acaporeswa uye kunyazi no akafa acatomutswawo.—Isa. 25:8; 35:1-7. w23.11 paji. 4 mandi. 9-10

“Dambudziko guru” ricatanga pa nguwa yatisikakariri. (Mat. 24:21) Mukusiyana no tsawana dzimweni, isusu taakuetsera ngezve dambudziko iri. Makore 2000 a adarika, Djesu akabvunza ateeri ake kuti awona aidikana kugara akagadzirira pa zuwa iri. Kana tikagara takagadzirira, zvinonga zviri nyore kuti isusu tikwanise kukurira nguwa ii inoshupha uye tibetsere amweni kuti aite zvimwezvo. (Ruka 21:36) Tinozoda kushingirira kuti tizwire Djehovha, tecigonda kuti iyena anotidziirira. Ticazoitei kana hama dzedu dzikaruza zviro zvese zvekunyama? (Abha. 3:17, 18) Tinozodikana kupangidza usisi kuti tipase rubetso raanoda. Tinozoitei kana kurhwiswa ke mubatanidzwa we madzinza ukaita kuti isusu tigare pamwepo no hama dzedu pa cimbuto cidoko ke nguwa yakareba? (Ezek. 38:10-12) Tinozodikana kugara no rudo rakabamba ku hama dzedu kuti tikwanise kukurira nguwa ii inoshupha. w23.07 paji. 2 mandi. 2-3

Amuna no akadzi angafunda zvakawanda no muezaniso wa Akira na Prisira, kazado yaidiwa maningi nge Akristu ekutanga. (Aro. 16:3, 4) Awona aiseenza, aiparidzira uye aibetsera amweni. Aona aiita zvese izvi ari pamwepo. (Zvii. 18:2, 3, 24-26) Pese panobhuiwa ngezva Akira na Prisira mu Bhaibheri, irona rinobhuya ngezvawo ari pamwepo. Makazado angaateedzera kudini? Rangarirai ngezve mabasa akawanda amunawo ekuita. Zvinoita here kuti muite mabasa awona muri pamwepo hinga mwamuna no mukadzi? Imwimwi munoronga here kubuda pamwepo mu basa re kuparidzira? Akira na Prisira aiitawo mabasa ari pamwepo. Pamweni imwimwi amuseenzi pa basa rimwero, asi zvinoita here kuita mabasa manganani muri pamwepo akadai hingana kupukuta uye kucenesa pa nyumba? (Mup. 4:9) Kana umwe akabetsera mudoni wake mabasa, imwimwi munozwa kuti zvezvirokwazvo muri cikwata uye munoona mikana yakawanda yekucedza. w23.05 mapaji. 22-23 mandi. 10-12

Pamweni paya, tese isusu tinombozwa kuthya. Ngo muezaniso, Mambo Sauri paaiteerera Dhavhidhi kuti amuuraye, Dhavhidhi wakasanangura kutizira ku thaundi re Firistiya ku Gate. Mambo we Gate, Akiji, wakaziya kuti Dhavhidhi wainga ari murhwi uya uno simba waiemberhwa no anhu ecibhuya kuti iyena ainga auraya “makumi e zviuru” e Afiristiya. Dhavhidhi paakazviziya, “wakathya maningi.” (1 Sam. 21:10-12) Dhavhidhi wakanetseka ecirangarira kuti Mambo Akiji waizomuitei. Iyena wakaitei kuti akunde kuthya uku? Pana Pisarema 56, Dhavhidhi unopanganidza kuti waizwa kudini paainga ari ku Gate. Pana Pisarema ii, Dhavhidhi unopanganidza zviro zvaiita kuti athye, asi iyena unopanganidzawo zvaakaita kuti akunde kuthya. Iyena wakagonda Djehovha. (Pis. 56:1-2, 11) Uye Dhavhidhi aazi kuora mwoyo. Ecikomborerhwa na Djehovha, Dhavhidhi wakaita zviro zvaainga asikakariri, kudziita hingana benzi. Zvino, pane kuti Akiji ade kuuraya Dhavhidhi, Akiji wainga asikadi kugara dhuze naye. Ngo kudaro, Dhavhidhi wakapukunyuka.—1 Sam. 21:13–22:1. w24.01 paji. 2 mandi. 1-3

Awona anorekethwa pa tsamba ya nyamasi ndiani? Ndi akadzodzwa akamustwa! Umwe wekupedzesera we akadzodzwa pa nyika kana akaenda kudenga mumapeto e dambudziko guru, rimwe re mabasa ekutanga aacatambira ngerekurhwisa. Mumasure mekuti atorhwa kuenda kudenga, awona acange ari pamwepo na Djesu uye no ngirozi dzake cena uye acarhwisana pa hondo yekupedzesera no azondi a Mwari. Rangarirai zvinoteera. Nyamasi uno pa nyika, akadzodzwa anganani acembera maningi uye aacinazve simba. Kana akamutswa kuti ararame kudenga, awona acagara zvisikwa zvekumwiya zvisikafi uye zvino simba uye acarhwa pamwepo na Mambo Murhwi, Djesu Kristu. Mumasure mekupera ke hondo ye Amagedhoni, awona acaseenza pamwepo na Djesu, kuti abetsere anhu kuti agare akakwana. Apana mubvunzo kuti paanonga aakudenga, awona acakwanisa kuitira zvakawanda hama no hanzvadzi dzawo dziri pa nyika kudarika zviya zvaakaita paainga aciri panyika hinga anhu asikazi kukwana! w24.02 6-7 ¶15-16

Anhu amweni aakuita kudzipira uye kubhabhatidzwa anokana-kana kuti oita izvona here kana kuti haiwa. Pamweni imwimwi mungadzibvundzisa kuti: ‘Zvakadini mumasure me kubhabhatidzwa inini ndoita citema cakakura uye ndodzingwa?’ Kana imwimwi mecithya kuita izvona garai no rugondo rokuti Djehovha acamupasai zvese zvamunoda “kuti muhambe zvinoenderana no zina rake, kuitira kuti munyase kumupfadza.” (Ako. 1:10) Iyena acamupasaiwo simba riya ramunoda kuti muite zviro zvakanaka. Djehovha akabetsera anhu akawanda kuti amuzwire. (1 Ako. 10:13) Ndiyo ndaa anhu padoko basi ndiwona anodzingwa mu ungano. Djehovha anotipasa zvese zvatinoda kuti tirumbwe takatendeka kaari. Tese isusu tinoedzwa kuti tiite zviro zvakashata. (Tig. 1:14) Asi imwimwi mungakwanisa kusanangura zvekuita kana mukaedzwa. Cokwadi ngece kuti pakupedzesera imwimwi ndimwi munoziya zvamucaita mu upenyu wenyu. Anhu amweni anobhuya kuti zvinoshupha maningi kuti tionerere mazwiro edu uye zvatinoita, asi izvona azvirokwazvopi. Imwimwi mungakwanisa kuonerera maitiro enyu akashata. w24.03 paji. 5 mandi. 11-12