Dezembro

Kodi Djehovha ano simba re kumutsa akafa? Zviri pamhene kuti honde! Iyena nge we “Masimba ese.” (Zvak. 1:8) Iyena ano simba re kutsakatisa muzondi upi hake, kutobatanidzawo rufu. (1 Ako. 15:26) Ticino zvikonzero zvimweni zvinopangidza kuti ano cido ce kumutsa aya akafa. Ndangariro dzake adzina mugumo. Kuti tinyase kuzvibata, iyena anodainza nyeredzi imwe na imwe ngo zina rayo. (Isa. 40:26) Kusiya izvona, iyena anoedzurira aya akafa. (Djobo 14:13; Ruka 20:38) Kuna Djehovha zviri nyore kuedzurira zviro zvese zvinocokuita no aya aacamutsa, izvona zvinobatanidza mushobo waainga akaita, unhu wawo, zvaakasongana nazvo mu upenyu uye zvaaiedzurira. Tisina kana mubvunzo tinokwanisa kugonda mu kariro ya Djehovha ye rumuko, ngokuti tinoziya kuti iyena ano cido uye simba re kuzviita. Asi tino ciro cimweni cinoita kuti titende mu kariro ye rumuko: Djehovha akamboita izvona kare. Mu nguwa ye kare, iyena akapasa simba irona ku aseenzi ake amweni, kutobatanidzawo Djesu kuti amutse akafa. w23.04 mapaji. 9-10 mandi. 7-9

Kana isusu tikareketa ngo mushobo wakanaka uye no upfawi, zvicaita nyore kuti anhu atipurutane uye arumbwe ecicedza nesu. Izvirokwazvo kuti kana munhu akada kureketedzana kana kureketa zvakashata ngezve zviya zvatinotenda, isusu atibambidzirhwi kurumbwa tecicedza naye uye kumudaira mibvunzo dzake. (Zvie. 26:4) Asi anhu akawanda aazoiti izvona; kubhuya zvirokwazvo akawanda acatipurutana. Zviri pamhene kuti kugara no upfawi zvinobetsera maningi. Hino namatai kuna Djehovha mecimukumbira kuti iyena amupasei simba rekurumbwa no upfawi paya pamudikana kudaira munhu anonga ari kumuitai mibvunzo dzakaringana no zviya zvamunotenda kana paya pamunonga meciizirhwa hasha. Edzurirai kuti mhinduro dzamungapasa no upfawi dzingabetsera kuti musazopedzesere maakureketedzana. Mhinduro inopaswa no upfawi ingabetsera anganani kuti ade kutipurutana uye kucinja maonero awo anocokuita na isusu uye Bhaibheri. Garai “makagadzirira nguwa dzese kuti mudziirire” zviya zvamunotenda “mecizviita no upfawi uye no rureremedzo rakakura.” (1 Ped. 3:15) Garai makashinga kupangidza upfawi nguwa dzese uye kupangidza kuti imwimwi muri munhu wakabamba! w23.09 paji. 19 mandi. 18-19

Onai mishobo mirongomuna yatingapangidza mwoyo unononoka kutsamwa. Cekutanga, munhu uno mwoyo unononoka kutsamwa aakasiki kunyangadzwa. Uye aahwirinziri cakashata no cakashata uye paanobatana no migariro inonyangadza iyena aabati anhu amweni ngo mushobo usikazi kunaka. (Eki. 34:6) Cecipiri, munhu uno mwoyo unononoka kutsamwa unoetsera akaterama. Munhu uno mwoyo unononoka kutsamwa aavhunduki uye aanyangadzwi zviro pazvinononoka kuitika maererano no zvaanoda. (Mat. 18:26, 27) Cecitatu, munhu uno mwoyo unononoka kutsamwa aaiti zviro asikazi kurangarira. Munhu uno mwoyo unononoka kutsamwa paanonga ecida kuita ciro cinokosha, iyena aaiti asikazi kunyasa kurangarira; kana kuti aaiti zviro no kukasika kuti acipedze. Pano kudaro, iyena unotora nguwa ecinyasa kurangarira kuti ungaciitisa kudini. Pedzepo, iyena unoseenzesa nguwa yakawanda kuti aite zviro ngemushobo kwawo. Cecirongomuna, munhu uno mwoyo unononoka kutsamwa unopeta masimba kuti akurire miedzo asingagurunguti. Iyena unokanda ndangariro pa zviro zvakanaka zvaanazvo uye unoita zvese zvaanokwanisa kuti arumbwe eciseenzera Djehovha no mupfaro. (Ako. 1:11) Aseenzi a Djehovha anodikana kupangidza mwoyo unononoka kutsamwa pa migariro ii yese. w23.08 mapaji. 20-21 mandi. 3-6

Cikonzero cinokosha kuti tidziirire mwoyo wedu, ngecekuti Djehovha anoongorora mwoyo yedu. Izvona zvinoreya kuti kusiyana no anhu amweni anokwanisa basi kuona zvatiri ngece kunze, Djehovha anokwanisa kuona zvatiri ngece mukati. Kana tikadzadza ndangariro dzedu nge mazano e ungwaru a Djehovha, iyena acatida uye acatipasa upenyu usikaperi. (Juau 4:14) Ngekudaro, atizokuadzwi nge maitiro akashata uye manyepo a Sathani no nyika yake. (1 Juau 5:18, 19) Patinorumbwa tecikhwedera dhuze na Djehovha, rudo uye rureremedzo redu kaari ricarumbwa recikurawo. Asi tinoda maningi Djehovha zvekuti tinozonda kuita zvakashata uye nzero yekuita zvakashata. Marta, hanzvadzi imweni ye ku Croácia yakasongana no muedzo wekuita uhure, inoti: “Kandiri zvakandishuphira kurangarira zvakadjeka uye kurhwisa cido cekuita zvakashata nge kupfadzwa ke nguwa doko. Asi kuthya Djehovha kakandidziirira.” Asi kuthya Djehovha kakabetsera kudini Marta? Marta wakati wakanyasa kurangarira ngezve migumisiro yaaizosongana nayo ngekuita cisananguro cakashata. Uye isusu tinodikanawo kuita zvimwezvo. w23.06 mapaji. 20-21 mandi. 3-4

Djesu aizviziya kuti cinangwa ca Djehovha cainga ciri cekucenesa zina Rake uye kureketa cokwadi ngezve manyepo ainga arekethwa nge zvake. Ndiyo ndaa iyena akafundisa ateeri ake kuti anamate eciti: “Baba edu muri kudenga, zina renyu ngariceneswe.” (Mat. 6:9) Djesu aizviziya kuti ii yainga iri nyaya yaibatanidza zvisikwa zvese. Apana cisikwa cipi haco ciri kudenga no pa nyika cakaita zvakawanda kuti cicenese zina ra Djehovha hinga zvakaizwa na Djesu. Asi Djesu paakasungwa, azondi ake akamupumha kuti ainga asikareremedzi Baba ake kunyazi padoko. Zviri pamhene kuti Djesu aizviziya kuti kushaisha kuseenzesa kana kutuka zina cena ra Baba ake cainga ciri citema cakakura cingaizwa no munhu. Kupumhwa uye kutongwa nge ndaa ye nyaya ii zvakamurhwadza maningi. Pamweni izvi ndizvona zvakaita kuti Djesu “atsukware maningi” pa nguwa yaainga asati asungwa.—Ruka 22:41-44. w24.02 paji. 11 ndi. 11

Pakugogoma kedu kuti tiwine upenyu, tinodikana kuda Djehovha na Djesu kudarika madire atinoita anyaukama edu. (Mat. 10:37) Asi izvi azvirei kuti tinodikana kusiya zvatinodikana kuitira anyaukama edu. Kusiya izvona, kana tecida kupfadza Djehovha na Djesu tinodikana kuita zviya zvatinoetserhwa kuti tiite mu mhuri. (1 Ti. 5:4, 8) Kana tikaita izvona ticapfara maningi. Djehovha anozviziya kuti mhuri dzicakwanisa kupfara kana mwamuna no mukadzi akabatana no rudo uye no rureremedzo, kana abereki akada nokupangira ana awo uye kana ana akazwira abereki awo. (Aef. 5:33; 6:1, 4) Azvinei kuti imwimwi muri mwamuna, mukadzi kana mwana, cinonyanya kukosha ikuseenzesa mazano e ungwaru ari mu Bhaibheri. Musaite zviya basi zvamunoona kuti zvakanaka kana kuti zviri kuizwa kamunogara. Uyewo musaedze kuita zvese zvinobhuiwa no anhu akafunda kuti munodikana kuzviita. Nyasai kuseenzesa mabhuku edu anotsamira mu Bhaibheri. Awona anounzisa mazano akawanda akagondeka ekuti mungaseenzesa kudini zvokwadi zvisikacinji zve Bhaibheri. w23.08 paji. 28 mandi. 6-7

Hanzvadzi inodikana kufundira zviro zvinokwanisa kuibetsera zuwa no zuwa. Zvimweni zvakhona, ingazvifundira paya painonga yecikura uye zvicaibetsera mu upenyu wayo wese. Onai miezaniso minganani. Ngo muezaniso, fundirai kuerenga no kutara zvakanaka. Mu mbuto dzimweni, anhu anorangarira kuti anakadzi aadikani kufundira kuerenga no kutara. Asi izvi zvinokosha kuti Mukristu wese akwanise kuzviita. (1 Ti. 4:13) Hino, musasiye kuti ciro cipi haco cimupingaidzei pa kufundira kutara no kuerenga. Ngaupi mungumisiro wakhona? Izvona zvicamubetserai kuti zviite nyore kuona basa uye kurumbwa muri pa basepo. Uyewo munokwanisa kugara mufundi wakanaka we Bhaibheri uyezve munokwanisa kubetsera amweni. Asi zvinokosha kupinda zvese, imwimwi munokwanisa kuerenga Bhaibheri uye kunyasa kurangarira zvakatarhwemo, nge kudaro munokhwedera dhuze na Djehovha.— 1 Ti. 4:15. w23.12 paji. 20 mandi. 10-11

Kumbirai rubetso ra Djehovha kuti mukwanise kukunda muedzo. Isusu tiri anhu asikazi kukwana, ndiyo ndaa tinodikana kupeta masimba nguwa dzese kuti tisaite zviro zvakashata. Asi Sathani ucaedza kuita zviri zvese kuti apingaidze upenyu wedu. Ciro cimwe caanoseenzesa, ikuwaraidzwa no zviro zvakashata. Kuwaraidzwa no zviro zvakadaro, kungadzadza ndangariro dzedu ngo zviro zvisikazi kucena—ndangariro dzinotisvipisa ngo cemukati uye dzinoita kuti tiite citema cakakura. (Mark. 7:21-23; Tig. 1:14, 15) Isusu tinoda rubetso ra Djehovha kuti tirhwise muedzo wekuita zviro zvakashata. Djesu akabatanidza cikumbiro icona paaiita munamato wekuezanisira. Iyena akati: “Musatirekere tecipinda mu muedzo, asi tinunurei pano Wakashata.” (Mat. 6:13) Djehovha anoda kutibetsera, asi isusu tinodikana kukumbira rubetso rake. Isusuwo tinodikanawo kuita maererano no zviya zvatinonga takumbira pa munamato wedu. w23.05 mapaji. 6-7 mandi. 15-17

Kana mwamuna no mukadzi ecikoshesa ushamwari wawo na Djehovha, awona anoseenzesa mazano ake uye izvona zvinoabetsera kuti anzvenge uye arhwisane no zvinetso zvaizoita kuti rudo rawo ritonhore. Munhu wakakura pakunamata unopeta masimba kuti ateedzere mawara a Djehovha akadai hingana unaki, mwoyo unononoka kutsamwa uye kurekerera. (Aef. 4:32–5:1) Kana kazado ikapangidza mawara aya, rudo riri pakati pawo ricakura. Hanzvadzi imweni inozwi Lena yakacata ke makore anodarika 25 inoti: “Zviri nyore kuda uye kureremedza munhu wakakura pakunamata.” Ngatione muezaniso umwe we mu Bhaibheri. Paaida kusanangura abereki a Mesiya wakapikirhwa, Djehovha ainga ano anhu akawanda e kusanangura pakati pe mibarirhwana ya Dhavhidhi, asi Iyena akasanangura Zuzee na Maria. Ngei? Ngekuti awona ari airi ainga ano ushamwari wakabamba na Djehovha, uye Djehovha aizviziya kuti iyena aizogara pa mbuto yekutanga pamucato wawo. w23.05 paji. 21 mandi. 3-4

Kunyazi mutungamiriri wedu Djesu akakwana, anhu aya aanoseenzesa pakutungamirira pa nyika pano, anhu asikazi kukwana. Ndiyo ndaa, nguwa dzimweni tingaona zvecishupha kuazwira maka-maka paanotikumbira kuti tiite ciro catisikadi kuita. Pa nguwa imweni Pedru wakabatana no cinetso cekutama kuzwira. Iyena wakapaswa nhungamiriro no ngirozi kuti arhye zvinyama zvimweni zvisikazi kucena maererano no mutemo wa Mozesi, asi Pedru wakaramba kuzwira—haiwa kamwe basi asi katatu kese! (Zvii. 10:9-16) Asi ngei Pedru wakaramba kuzwira? Nge dii rimweni, muphostori Pauro Atungamiriri e Cikristu e ku Djerusarema paakamubvunza kuti atore anarume arongomuna kuti awona aceneswe uye izvona zvaizopangidza kuti Pauro waireredza Mutemo wa Mozesi. Pauro waiziya kuti Akristu ainga asikadikanizve kuteerera Mutemo uye iyena wainga asikazi kushaisha. Kunyazi zvakadaro, iyena wakazwira asikabvunzisi zvakawanda. Iyena “wakatora anarume aya oenda nawo, pedzepo oceneswa pamwepo nawo.” (Zvii. 21:23, 24, 26) Kuzwira ka Pauro kakaita kuti paoneke kubatana pakati pe hama.—Aro. 14:19, 21. w23.10 paji. 10 mandi. 15-16

Pamweni imwimwi mainga musikazoreketi kuti kuthya i wara rinokosha pa ushamwari wakanaka. Asi, aya anoda kugara no ushamwari wakabamba na Djehovha anodikana “kumuthya.” Azvinei nokuti taano nguwa yakadini teciseenzera Djehovha, tese tinodikana kumuthya no mushobo wakanaka. Asi zvinoda kureyei kuthya Mwari? Kuthya Djehovha kunoreya kumuda maningi uye kutama kuita ciro cingakuwadza ushamwari wedu Naye. Ngo muezaniso, Djesu ainga ano mushobo uu “wekuthya Mwari.” (Aheb. 5:7) Iyena wainga asikathyi Djehovha ngo mushobo wakashata. (Isa. 11:2, 3) Zvezvirokwazvo, iyena waida maningi Djehovha uye waida kumuteerera. (Juau 14:21, 31) Kuita hingana Djesu, isusu tinoreremedza uye tinoshamiswa maningi ndi Djehovha ngekuti tinoziya kuti iyena uno rudo, ungwaru, unatsi, uye simba. Isusu tinoziyawo kuti Djehovha anotida uye kuti zvese zvatinoita zvinganyangadza kana kupfadza mwoyo wake.—Pis. 78:41; Zvie. 27:11. w23.06 paji. 14 mandi. 1-2; paji. 15 ndi. 5

Mambo Uziya paakagara mwanarume uno simba, iyena wakakanganwa zviro zvese zvakanaka zvaainga aizirhwa na Djehovha. Tinofundei? Tinodikana nguwa dzese kuedzurira kuti makomborero ese uye ubaba wese watinawo unobva kuna Djehovha. Pane kuti tigare tecidzikudza nge ndaa ye zviro zvatakwanisa kuita, tinodikana kuita kuti Djehovha akudzwe. (1 Ako. 4:7) Kudarika izvona, tinodikana kudzidodosa uye kuziya kuti tiri anhu asikazi kukwana uye tinodikana kupangwa. Hama imweni ino makore 60 yakatara kuti: “Inini ndakafunda kuti andidikani kukasika kunyangadzwa kana kuti kuremba kana amweni akaziya ngezve zvishaishi zvangu. Nguwa dzimweni, inini ndinoshaisha pa zviro zvidoko uye ndinopaswa mazano pa nyaya idzi, kunyazi zvakadaro inini ndinoedza kuzvigadzirisa uye ndorumbwa ndeciseenzera Djehovha.” Patinozwira Djehovha uye torumbwa tecidzidodosa, tinogara anhu anopfara zvezvirokwazvo.—Zvie. 22:4. w23.09 paji. 10 mandi. 10-11

Akristu ekutanga aidikana kushingirira. Awona ainga ano zvinetso zvimwezvo hinga zvaibatana no anhu e munguwa iyona, asi awona ainga ano zvinetso zvakawanda ngekuti ainga ari Akristu. Akawanda awo akateererhwa haiwa basi no atungamiriri e magereja e Cidjudha kana kuti no atongi e Ciroma asi aitoteererhwawo no anhu e mumhuri mawo. (Mat. 10:21) Uye mukati me ungano nguwa dzimweni, awona aidikana kuti apete masimba kuti arhwise fundiso dze manyepo dze anhu akapanduka dzaikwanisa kuita kuti ungano iparadzane. (Zvii. 20:29, 30) Kunyazi zvakadaro, Akristu aya akashingirira. (Zvak. 2:3) Akazviita kudini? Awona aitora nguwa kuti arangarire ngezve miezaniso ye anhu akashingirira, yaaigumira mu matarhwa akadai hingana ya Djobo. (Tig. 5:10, 11) Awona aiita munamato ecikumbira simba. (Zvii. 4:29-31) Uye aikanda ndangariro dzawo pamigumisiro yakanaka kuti arumbwe ecishingirira. (Zvii. 5:41) Isusu tingakwanisawo kushingirira kana tikafunda uye kunyasa kurangarira ngezve miezaniso yekushingirira yatinogumira mu Soko ra Mwari uye mu mabhuku edu. w23.07 paji. 3 mandi. 5-6

Djehovha na Djesu aazombotisii. Mumasure mekuti Pedru waramba Djesu, iyena waidikana kuita cisananguro cinokosha. Iyena waizosiya kugara muteeri wa Djesu here kana kuti waizorumbwa ecishingirira? Djesu akadeketera kuna Djehovha ecikumbira kuti kutenda ka Pedru kusarembe. Djesu akapanganidzira Pedru kuti ainga aita munamato uwona uye Djesu aigonda kuti Pedru waikwanisa kubambisa hama dzake. (Ruka 22:31, 32) Pamweni Pedru waibambiswa maningi pese paya paaiedzurira zvakabhuiwa ndi Djesu! Ngo mushobo umwewo, paya patinonga taita cisananguro cinokosha, Djehovha anotibetsera kuti tirumbwe takatendeka. Iyena angaita izvona nge kuseenzesa aushi ano rudo. (Aef. 4:8, 11) Kuitawo hinga Djehovha akapasa zvekurarama nazvo Pedru kutobatanidzawo no aphostori amweni, Iyena anokwanisawo kutipasa zvekurarama nazvo kana tikakanda Umambo wa Mwari pa mbuto ye kutanga. w23.09 mapaji. 24-25 mandi. 14-15

Djehovha anoona zvese zvatinoita kuti tipangidze unaki kunyazi pa zviro zvidoko. Iyena anokoshesa kupeta masimba katinoita uye anozviona hingana magaa aacadikana kuripa. Kana makambogara mubati anoseenzera kana kuti mukuru, Djehovha anoedzurira basa rese ramakambomuitira uye anoedzurira rudo raimuitisai kuti muite izvona. (1 Ako. 15:58) Iyena anoonawo rudo ramuri kurumbwa mecipangidza. Djehovha anoda kuti tese isusu titunhudzire rudo redu kaari uye no amweni. Tingatunhudzira rudo redu kuna Djehovha nge kuerenga Bhaibheri Soko rake, kurangarira nge zviya zvatinofunda uye kuita munamato kaari nguwa dzese. Tingatunhudzirawo rudo redu ku hama no hanzvadzi ngekuita zviro kuti tiabetsere. Rudo redu parinotunhudzira, tinonyasa kukhwedera dhuze na Djehovha uye no mhuri yedu ye kumwiya. Uyewo ushamwari wedu na Djehovha uye no hama dzedu ucagara nokusikaperi! w23.07 paji. 10 ndi. 11; paji. 11 ndi. 13; paji. 13 ndi. 18

Mukristu umwe na umwe unodikana kusanangura mushobo we kudziirira uthongo wake. Mukristu paanosanangura mushobo wekurapa uthongo, mitemo yaanodikana kunyanya kurangarira yakaringana no kuramba ngazi uye kuita zve midzimu. (Zvii. 15:20; Aga. 5:19, 20) Kusiya izvona, Mukristu umwe na umwe ungadzisanangurira mushobo yekurapa yaangatendera. Isusu tinodikana kureremedza citenderhwa ce hama imwe na imwe cekusanangura mushobo we kuraphwa waanoda azvinei nokuti tinotenderana nazvo kana kuti haiwa. Panyaya yakadaro, tinodikana kunyasa kurangarira ngezve mafundo anoteera: (1) Umambo wa Mwari basi ndiwo ucakwanisa kurapa nhenda dzese. (Isa. 33:24) (2) Mukristu umwe na umwe unodikana “kugara no rugondo” rekuti zvaari kuita ndizvo zvakamunakira.—Aro. 14:15, 19, 20. w23.07 paji. 24 ndi. 15

Imwimwi munokoshesa ushamwari wenyu na Djehovha here? Zvezvirokwazvo honde! Imwimwi andimwipi mwega. Kubvira mu nguwa ye kare, anhu akawanda ainga ano mazwiro akaezana no enyu. (Pis. 104:33, 34) Anhu akawanda akadzipira kuti anamate Djehovha. Ndizvona zvakaizwawo no Anaziri ku Israeri yo kare. Anaziri ainga ari Aisraeri aishingaira maka-maka pakudzipira kunamata Djehovha nge mushobo wakanaka. Mutemo wa Mozesi waitendera kuti mwanarume kana kuti mwanakadzi aite mhiko inokosha kuna Djehovha ecisanangura kugara Munaziri ke kanguwa. (Num. 6:1, 2) Muisraeri paaiita mhiko iyona ye kugara Munaziri, iyena waidikana kutondowedza zviro zvimweni zvainga zvisikadikani kuizwa no Aisraeri amweni. Asi ngei Muisraeri waidikana kuita cisananguro ce kugara Munaziri? Pamweni nge ndaa ye rudo rake kuna Djehovha uye kutenda kake no mwoyo wake wese nge makomborero aaipaswa Naye.—Dhe. 6:5; 16:17. w24.02 paji. 14 mandi. 1-2

Mu Bhaibheri, soko re Cihebheru rekuti “kugondeka,” kana kuti “rudo rakagondeka,” rinoda kureya kunyasa kubatana uye kajinji rinoseenzeswa pakupanganidza rudo ra Djehovha ku aseenzi ake. Soko rimwe-rimwero rinoseenzeswawo pakupanganidza rudo riri pakati pe aseenzi a Mwari. (2 Sam. 9:6, 7) Kugondeka kedu kungakwanisa kubamba ngekuhamba ke nguwa. Ndizvona zvakaitika na Dhanyeri. Kugonda ka Dhanyeri kuna Djehovha kakaedzwa mu upenyu wake wese. Asi muedzo wakakura wakaitika iyena paainga ano makore 90. Aseenzi a mambo ainga asikapfariri Dhanyeri uye ainga asikareremedzi Djehovha. Hino awona akaronga kuti Dhanyeri auraiwe. Awona akaita kuti mambo atare mutemo wairambidza kunamata kuna Mwari upi hake kunze ka mambo. Dhanyeri waidikana kuima kuita munamato kuna Djehovha ke mazuwa 30 kuti apangidze kuti wainga akagondeka kuna mambo. Asi Dhanyeri wakaramba kuita izvona.—Dha. 6:12-15, 20-22. w23.08 paji. 5 mandi. 10-12

Djehovha anoda kuti tirumbwe tecipangidzira rudo hama no hanzvadzi dzedu. Hama painotibata nge mushobo usikadikani kuizwa nge Mukristu, tingagara no rugondo rekuti iyona aizi kuita izvona nge kuda. Uye iyona iri kuita zvese zvainokwanisa kuti iite zviro nge mushobo wa Djehovha. (Zvie. 12:18) Djehovha anoda aseenzi ake akatendeka kunyazi paanoshaisha. Iyena anorumbwa ari shamwari yedu uye aaticengeteri bundu. (Pis. 103:9) Isusu tinotenda maningi ngekuti Djehovha anotirekerera, ndiyo ndaa tinodikana kumuteedzera nge kurekererawo amweni! (Aef. 4:32–5:1) Zvinokosha maningi kuedzurira kuti tiri dhuze no mugumo, ndiyo ndaa tinodikana kurumbwa tiri dhuze no hama uye hanzvadzi dzedu. Zvingaita kuti kuteererhwa kucabambirira uye kuti ticasungwa nde ndaa ye kutenda kedu. Kana izvona zvikaitika, ticada rubetso re hama no hanzvadzi dzedu.—Zvie. 17:17. w24.03 mapaji. 15-16 mandi. 6-7

Bhaibheri rinoreketa ngezve madjaha akakhwedera dhuze na Djehovha, akagara no makomborero ake, uye akapfara. Dhavhidhi ndi umwe we madjaha aya. Paainga aciri djaha, iyena wakasanangura kugara shamwari ya Djehovha uye nokuhamba ke nguwa wakagara mambo wakagondeka. (1 Mad. 3:6; 9:4, 5; 14:8) Zvezvirokwazvo imwimwi mucabambiswa uye mucagara no cidaka-daka ce kuda kuseenzera Djehovha makagondeka. Kana kuti imwimwi mungafunda zvakawanda ngezve muezaniso wa Marko uye Timoti. Awona akatanga kuseenzera Djehovha aciri madjaha kamare uye awona akatenderhwa na Djehovha. Mushobo wamunoseenzesa upenyu zvino, ucabata-bata zviya zvicaitika mu upenyu wenyu mune ramangwana. Kana imwimwi mukagonda Djehovha haiwa kudzigonda, iyena acamubetserai kuti nguwa dzese muite zvisananguro zvakanaka. Imwimwi mungakwanisa kugara no upenyu unopfadza uye wakadzara no zviro zvakanaka. Asi edzurirai kuti Djehovha anokoshesa maningi zviya zvamunomuitira. Apana ciro cakanaka cinodarika kuseenzesa upenyu wenyu kuti museenzere Baba edu ano rudo Djehovha. w23.09 paji. 13 mandi. 18-19

Muphostori Pauro wazviziya kuti hama dzake dzainga dzisikazi kukwana. Ngo muezaniso, hama dzimweni dze ungano ye Djerusarema dzainga dzisikatenderi kuti iyena wainga ari mufundi. (Zvii. 9:26) Paa padarika nguwa, amweni akareketa zvakashata ngezva Pauro kuti asvipise zina rake. (2 Ako. 10:10) Zuwa rimweni, Pauro wakaona mukuru umweni eciita cisananguro cakashata caizoita kuti amweni akuhunyike. (Aga. 2:11, 12) Uye Marko, shamwari imweni ye padhuze ya Pauro yakamuodza mwoyo. (Zvii. 15:37, 38) Pauro waikwanisa kuita kuti zviro izvi zvimuitise kuti asarekete no anhu akamushaishira, asi iyena aazi kuita izvona. Iyena wakarumbwa ano maonero akanaka ngezve hama dzake uye wakarumbwa eciseenza no simba mu basa ra Djehovha. Cinyi cakabetsera Pauro kuti ashingirire? Pauro waida hama no hanzvadzi dzake. Kuda kaaiaita kaimubetsera kuti asakande nzero dzake pa zvishaishi zvawo asi pa mawara awo akanaka. Rudo rakabetserawo Pauro kuti aseenzese zvaakatara hingana zviri kurekethwa mu tsamba ya nyamasi. w24.03 paji. 15 mandi. 4-5

Bhaibheri rino ngano dzakawanda dzinopangidza kuti upfawi iwara rinokosha maningi. Onai muezaniso wa Izaki. Iyena paakaenda koorarama ku nharaunda ye Gerar, anyacigarisano ake ainga ari afiristiya. Afiristiya aya ainga ano tsumbi naye uye awona akafushira zvimbo zvainga zvacerhwa no aranda a baba ake. Asi pano kurhwisana kuti aedze kugarazve no zvimbozvo, Izaki no mhuri yake akacinja oenda koogara kure uye akacera zvimbo zvimweni ikona. (Gen. 26:12-18) Asi Afiristiya akareketa kuti mvura ye zvimbo izvi zvipsva yainga iri yawo. Kunyazi zvakadaro, Izaki wakarumbwa akaterama. (Gen. 26:19-25) Asi Izaki wakakwanisa kurumbwa kudini wakaterama kunyazi anhu eciita zviri zvese kuti amuambire? Zvezvirokwazvo iyena wakaona muezaniso ye abereki ake, uye wakafunda zvakawanda no muezaniso wa baba ake Abrahamu uwo wainga ano upfawi uye wakafunda no muezaniso wa Sara uwo wainga “akaterama uye no upfawi.”—1 Ped. 3:4-6; Gen. 21:22-34. w23.09 paji. 15 ndi. 4

Djehovha akatumira Mwana wake akabarhwa ari umwe ega kuti auye pa nyika. Nge mushobo uu, Djesu aizofundisa anhu ngezve Umambo uye kupasa upenyu wake kuti aasudzunure pacitema no rufu. Pedzepo, Djehovha akamutsa Djesu kuti ahwirire kudenga kuti azotonge hingana Mambo we Umambo wa Mwari. Ciro cinonyanya kurekethwa mu Bhaibheri, cakaringana no kuceneswa ke zina ra Djehovha. Izvi zvicaitika paanonga ecidzadzisa cinangwa cake pa nyika eciseenzesa Umambo wake wecitungamirirhwa na Kristu. Cinangwa ca Djehovha acicinjiki. Djehovha akagondesa kuti zviro zvese zvicaitika nge mushobo waakareketa. (Isa. 46:10; Aheb. 6:17, 18) Nokuhamba ke nguwa, nyika icacinja kuti igare paraizo uye abarirhwana akakwana a Adhamu na Evha anonga ari anatsi “acararama nokusikaperi.” (Pis. 22:26) Asi Djehovha ano zviro zvakawanda zvaanoda kutiitira. Cinangwa cake cikuru ngece kuti aseenzi ake ese, kudenga no pa nyika amunamate akabatana. Nge mushobo uu, ese aizogara akagondeka uye aizozwira Djehovha hingana Mukuru-Mukuru we nyika yese. (Aef. 1:8-11) Imwimwi amushamisiki here pamunoona mushobo unoizwa na Djehovha kuti adzadzise cinangwa cake?—w23.10 paji. 20 mandi. 7-8

Adjudha akabva ku Bhabhironi paakaguma ku Djerusarema, awona akatanga kubatana no matambudziko nge ndaa ye kusama kugarisana zvakanaka ke zvematongerhwe e nyika, kusama mare uye kuphikiswa. Hino amweni zvakaashuphira kukanda nzero dzawo pa kuwakwazve ke tempro. Ndiyo ndaa, Djehovha akatuma aphorofita airi kuti abetsere anhu kuti agarezve no simba pa kunamata Djehovha, Ajeu na Zakariya. (Ajeu 1:1; Zak. 1:1) Asi makore 50 akazoteera, Adjudha akahwirira ku Djerusarema aidazve kubambiswa. Esdra, mutari ano uzii we Mutemo, akabva ku Bhabhironi ecienda ku Djerusarema koobambisa anhu a Mwari kuti akande kunamata kawo Mwari pa mbuto yekutanga. (Esdra 7:1, 6) Muphorofita Ajeu na Zakariya akabetsera anhu a Mwari kuti arumbwe ecigonda Djehovha mu nguwa dzinoshupha. Uphorofiti uu, ungatibetserawo kugara no rugondo rekuti Djehovha acatibetsera azvinei no matambudziko api hawo atingabatana nawo.—Zvie. 22:19. w23.11 paji. 14 mandi. 2-3

Tingapangidza kudini rudo ku hama no hanzvadzi dzedu? Mushobo umweni wekuita izvona ngewe kuanyaradza uye usisi ndiwo ucaita kuti “tirumbwe tecinyaradzana.” (1 Ate. 4:18) Asi tingarumbwa kudini tecibambisa rudo redu ku umwe na umwe wedu? Nge kupeta masimba kuti tirekerere zvishaishi zve hama no hanzvadzi dzedu, kunyazi paya pazvinoshupha. Ngei nyamasi uno zvecinyanya kukosha kupangidzira rudo ku umwe na umwe wedu? Muphostori Pedru wakabhuya cikonzero cakhona paakati: “Kupera ke zviro zvese kaapadhuze. Hino, . . . idai maningi umwe na umwe wenyu.” (1 Ped. 4:7, 8) Mugumo we nyika ino yakashata uri kukhwedera nokukasika. Teciziya izvona, tinodikana kuetserei? Djesu akapasa ngwadzo inoteera ku afundi ake paakati: “Imwimwi mucazondhwa no anhu e madzinza ese nge ndaa yo zina rangu.” (Mat. 24:9) Kuti tikwanise kushingirira kuzondwa kese uku, tinodikana kurumbwa takabatana. Kana tikaita izvona, Sathani aazokwanisi kutiparadzanisa ngekuti tinonga takanyasa kubatana no rudo.—Afi. 2:1, 2. w23.11 paji. 13 mandi. 18-19

Zvokwadi zviri mu Soko ra Mwari zvino simba maningi. Patinofundisa anhu ngezva Djehovha uye ngezve kuti iyena akadini, isusu tinoona zviro zvinoshamisa. Djira rakaseenzeswa na Sathani pakufukidza madziso e anhu rinombwera uye awona anotanga kuona mawara anoshamisa a Baba edu. Awona anoshamiswa no simba ra Djehovha risina mugumo. (Isa. 40:26) Awona anofundira kumugonda nge ndaa ye unatsi wake wakakwana. (Dhe. 32:4) Awona anofunda zvakawanda nge ndaa ye uzii wake wakakura. (Isa. 55:9; Aro. 11:33) Uye awona anonyaradzwa paanofundira kuti Djehovha i rudo. (1 Juau 4:8) Paanorumbwa ecikhwedera dhuze na Djehovha, kariro yawo yekurarama nokusikaperi inogara ye zvirokwazvo. I makomborero akanakisisa atinawo e kubetsera anhu kuti akhwedere dhuze na Baba edu! Patinoita izvona, Djehovha anotiona hinga aseenzi “anoseenza pamwepo naye.”—1 Ako. 3:5. w24.02 paji. 12 ndi. 15

Kana imwimwi muri mufundi we Bhaibheri kana kuti abereki enyu ari Apupuri a Djehovha, muri kurangarira kubhabhatidzwa here? Ici i cinangwa cakanaka maningi! Asi musati mabhabhatidzwa, zvinodikana kuti imwimwi mutange kudzipira kuna Djehovha. Mungadzipira kudini kuna Djehovha? Imwimwi munoita munamato uye pa munamato iwona imwimwi mucagondesa kuti mucanamata Djehovha basi. Uye kuti kuita kuda ka Djehovha kucagara pa mbuto ye kutanga mu upenyu wenyu. Zvezvirokwazvo imwimwi mucagondesa Djehovha kuti “mucamuda no mwoyo wenyu wese no upenyu wenyu wese no ndangariro dzenyu dzese uye no simba renyu rese.” (Mark. 12:30) Kudzipira ikona kunoizwa imwimwi na Djehovha basi. Asi rubhabhatidzo rinoizwa pana anhu akawanda, rinopangidza kuti imwimwi madzipira kuna Djehovha. Kudzipira uku iciro cinokosha, ndiyo ndaa mucaita zviri zvese kuti mudzadzise zvamakagondesa uye Djehovha anoetsera kuti imwimwi muite izvona.—Mup. 5:4. w24.03 paji. 2 ndi. 2; paji. 3 ndi. 5

Mucato wese unobatana no zvinetso. Bhaibheri rinopangidza pamhene kuti aya anowaka kana kuwakwa “acagara no matambudziko mu upenyu wawo.” (1 Ako. 7:28) Ngei? Ngekuti mucato unobatanidza anhu airi asikazi kukwana. Umwe na umwe uno unhu, zvaanoda uye maonero. Mu mucato pamweni umwe na umwe unobva ku tsika dzakasiya no dzo umweni kana kuti pamweni umwe na umwe wakarerhwa nge mushobo wakasiyana no we umweni. Ndiyo ndaa, no kuhamba ke nguwa mwamuna kana mukadzi ucaona zviro zvo umweni zvaiinga asikazi kuona asati acata uye zviro zvimweni zvingaita kuti paoneke matambudziko mu mucato. Pane kugadzirisa ese matambudziko awo, makazado amweni anosanangura kupasana ndaa matambudziko anooneka mu mucato, kunyazi awona ari airi ano ndaa. Amweni anotoguma pakurangarira kuti zvirinani kumboparadzana padoko kana kuti kugurisa mucato. Asi ndizvona kamare zvinodikana kuizwa? Haiwa. Djehovha anoda kuti mwamuna no mukadzi arumbwe ecirarama ese kunyazi umwe wawo eciita kuti mucato ushuphe. w24.03 paji. 16 ndi. 8; paji. 17 ndi. 11

Mumasure mekubhabhatidzwa, kariro yenyu ye kurarama nokusikaperi mu Paraizo pasi pano yakarumbwa yecikura pamairumbwa mecifunda zvakawanda uye pamairumbwa mecikura pakunamata. (Aheb. 5:13–6:1) Imwimwi mucapangidza kuti masoko akatarhwa pana Aroma 5:2-4 ngee zvirokwazvo. Pamweni imwimwi makasongana no matambudziko akawanda, asi makarumbwa mecishingirira uye makazwa kuti munotenderhwa na Djehovha. Ngokuziya kuti Djehovha anomudai, parizvino maano cikonzero cakanaka cekuti muetsere zvakagondeswa na Djehovha. Kariro yenyu yanyasa kubamba kupinda paya pamakatanga kuziya cokwadi. Ngokudaro kariro iyona yaa ye zvirokwazvo kamuri. Uye inoreya zviro zvinokosha kamuri. Iyona inomupfurudzirai pa zvese zvamunoita mu upenyu wenyu, inocinja mushobo wamunobata mhuri yenyu, zvisananguro zvamunoita uye kuseenzesa kamunoita nguwa yenyu. Muphostori Pauro unobhuyazve zviro zvinokosha ngezve kariro yatinayo mumasure mekutenderhwa na Djehovha. Iyena unotigondesa kuti kariro yedu icadzadzika zvezvirokwazvo.—Aro. 15:13. w23.12 mapaji. 12-13 mandi. 16-19

Patinobatana no matambudziko, isusu tingatanga kurangarira uye kuita zviro nge mushobo watainga tisikadi kuzviita. Djehovha anotibetsera kudini patinosongana no mazwiro awona? Djehovha anotigondesa kuti acatibetsera kuti tirumbwe takaterama pa zviro zve mundangariro uye zve kumwiya. Panoitika dutu mu bahari, kakawanda kakhona navhiyo inokhandirhwa ku dii rimwe yecienda ku dii rimweni. Kuti dzikwanise kukunda izvona, navhiyo dzakawanda dzinososeenzesa cidziiriro cinogara ku dii rimwe na rimwe re navhiyo cinokandwa pasi pe mvura. Cidziiriro icona cinobetsera navhiyo kuti isatorhwe no mhepo uye anhu anonga ari imona anozwa akacengeteka. Zvakanaka ngezve kuti cidziiriro icona cinoseenza zvakanaka navhiyo painonga yecihamba. Nge mushobo umwewo, Djehovha acatipasa cidziiriro cemundangariro uye ce kumwiya, kana tikarumbwa tecimuseenzera takatendeka mu mazuwa aya anoshupha. w24.01 paji. 22 mandi. 7-8

Kana imwimwi mecizwa kuthya, dzibvunzisei kuti: ‘Zvinyi zvakaizwa na Djehovha?’ Imai uye rangarirai ngezve zviro zvakasikwa. Ngo muezaniso, “nyasai kuongorora” kuti Djehovha anocengeta kudini shiri uye maruwa—kunyazi izvona zvisikazi kusikwa no mufanikiso wa Mwari uye kunyazi izvona zvisikakwanisi kumunamata—nge kudaro Djehovha acaticengeta. Kurangarira izvona kucanyasa kubambisa rugondo renyu kaari. (Mat. 6:25-32) Rangariraiwo zviya zvakaizwa na Djehovha ku aseenzi ake. Imwimwi mungapsvaka kufunda ngezve munhu umwe unorekethwa no Bhaibheri wainga ano kutenda kakabamba, kana kuti imwimwi mungaerenga ngano ye upenyu we Apupuri a Djehovha e mazuwa ano. Uyewo, rangariraiwo kuti Djehovha anosomucengetai kudini. Cinyi caakaita kuti imwimwi muziye cokwadi? (Juau 6:44) Iyena akadaira kudini minamato yenyu? (1 Juau 5:14) I zviro zvipi zvakanaka zvamunoona zveciitika mu upenyu wenyu zvamunozwisisa kuti zvinoitika basi nge ndaa ye rusudzunuro?—Aef. 1:7; Aheb. 4:14-16. w24.01 paji. 4 ndi. 6; paji. 7 ndi. 17