Tingafundisa Kudini Mufundi we Bhaibheri Kuti Agume pa Kubhabhatidzwa—Dii ro Kutanga

1. Tsamba ya 2 Akorinti 3:1-3, inotibetsera kudini kuti tizwisise ropapfadzo yatinayo ye kubetsera mufundi dakara abhabhatidzwa? (Onai imaji iri pa kapa.)

MUNOZWA kudini pamunoona mufundi we Bhaibheri we ungano yenyu ecibhabhatidzwa? Pasina mubvunzo, munopfara maningi. (Mt. 28:19) Kana mainga muri imwimwi maimufundisa Bhaibheri, munozwa mupfaro kupinda ese! (1 Ate. 2:19, 20) Afundi e Bhaibheri abva kubhabhatidzwa i “tsamba inorumbidza,” haiwa basi ku afundisi awo, asi ku ungano yese.—Erengai 2 Akorinti 3:1-3.

2. (a) Mubvunzo upi unokosha watinodikana kudzibvunzisa, uye ngei? (b) Cinyi cinozwi fundo ye Bhaibheri? (Onai masoko e pasi.)

² Zvinopfadza kuona kuti mu makore marongomuna adarika, numero ye fundo dze Bhaibherib dzaikwana kuita 10 000 000 pa mwedzi umwe na umwe. Mukati me nguwa ii, tikada kuona anhu anokwana kuita 280 000 akabhabhatidzwa kuti agare Apupuri a Djehovha uye afundi apsva a Djesu Kristu. Hino tinodikana kuitei kuti tibetsere anhu aya anokwana kuita zviuru kuti abhabhatidzwe? Djehovha unoetsera maningi, ndiyo ndaa iyena uri kupasa mukana anhu ese kuti agumewo pa kugara afundi a Kristu. Hino tinodikana kuita zviri zvese kuti tibetsere anhu aya kuti agume pa kubhabhatidzwa no kukasika. Nguwa iri kupera nokukasika!—1Ako. 7:29a; 1 Pe. 4:7.

3. Fundo ino icareketei nge zve kuitisa fundo dze Bhaibheri?

³ Nge ndaa ye basa iri re kukasika re kuita afundi, Dare Rinotungamirira rakabvunzisa mafiriyari e nyika dzakawanda kuti ngazvipi zvinodikana kuizwa pa kubetsera afundi e Bhaibheri kuti agume pa kubhabhatidzwa. Mu fundo ino no inoteera, ticafunda kuti ngazvipi zvatinofunda kubva ku mapiyoneiro, mamisiyonario uye no aonereri e nharaunda agara no basa.c (Zvie. 11:14; 15:22) Madii aya mairi acareketa kuti zvii zvinodikana kuizwa no mufundisi uye no mufundi we Bhaibheri kuti fundo ibudirire. Dii iri re kutanga, ticaona zviro zvishanu zvinodikana kuizwa no mufundi we Bhaibheri kuti agume pa kubhabhatidzwa.

FUNDAI MASUMANA ARI ESE

4. Tinodikana kurangarirei nge fundo dzinoizwa pa musuwo we samuzi?

⁴ Aparidzi akawanda anosoitisa fundo pa musuwo we samuzi. Kunyazi hazvo izvona zvingaita kuti tikudze cido ce samuzi, kakawanda kaco makani akhona aatori nguwa yakareba uye amasumanapi ese. Pa kuedza kuita kuti akhwinidzire cido ce samuzi, muparidzi pamweni angakumbira numero ya samuzi. Pedzepo hama inotanga kufonera kana kutumira masoko anoreketa nge zve Bhaibheri kune samuzi. Makani akaita hingana aya, angakwanisa kutora mwedzi kana kutoguma pakusagara mufundi we Bhaibheri anobudirira. Ngekudaro, dzibvunzisei kuti, nguwa yakareba iri kupedza samuzi kuti agare mufundi we Bhaibheri,d acahambira mberi dakara pa kudzitsaurira obhabhatidzwa here? Zvezvirokwazvo haiwa.

5. Maererano no masoko akareketwa na Djesu ari pana Ruka 14:27-33, cinyi cingatibetsera pa basa redu rekuita afundi?

⁵ Pa nguwa imweni, Djesu wakaita mufanikiso eciezanisa zviro zvinobatanidza kugara mufundi wake. Kutanga, iyena wakareketa nge zve munhu uri kuda kuwaka nyumba yakakura. Iyena unodikana “kutanga agara pasi kuti aerenge zvaacaseenzesa” aone kuti acakwanisa kuipedza. Pedzepo Djesu wakareketazve muezaniso wa mambo uri kuda kuenda koorhwa na mambo umweni. Mambo uu cekutanga unodikana “kugara pasi uye odziongorora” aziye kuti masorudado ake acawina here. (Erengai Ruka 14:27-33.) Zvimwe-zvimwezvoo, Djesu waiziya kuti munhu waidikana kuita zvimwezvo kuti agare mufundi wake. Munhu umwe na umwe unodikana kugara pasi, odziongorora kuti cinyi cinodikanwa agare mufundi wa Djesu. Uye isusu tinodikana kubetsera afundi edu kuti adziongorore nge kuakohomedzesa kuti afunde ma sumana ese. Tingazviita maitirei?

6. Zvinyi zvatinodikana kuedza kuita kuti tigare no fundo dzinobudirira?

⁶ Danho rekutanga, kutunhudzira nguwa yamunopedza meciitisa fundo pa musuwo we samuzi. Edzai kureketa fundo imwe iri mu Bhaibheri pese pamunohwirira. Kana samuzi adjaira nguwa yakati rebei mecicedza, mubvunzisei kuti, pane mbuto yatingagara kuti ticedze zvakawanda here? Mhinduro yake icapangidza kuti uri kubata no nyara mbiri fundo ye Bhaibheri here kana kuti haiwa. Pakupedzesera, kuti mufundi akasike kuhambira mberi, mubvunzisei, tadini kufunda kairi pa sumana? Kunyazi zvakadaro, pacino zvakawanda kupinda kufunda kamwe kana kairi pa sumana.

GADZIRIRAI PA FUNDO IMWE NA IMWE

7. Mufundisi unodikana kugadzirira kudini pa fundo imwe na imwe yo Bhaibheri?

⁷ Imwimwi hingana mufundisi, munodikana kunyasa kugadzirira pa fundo imwe na imwe. Tangai no kuerenga ndima yese uye onai matsamba. Garai no mafundo makuru akadjeka musoro menyu. Rangarirai musoro we fundo, misoro midoko, pa mibvunzo ye fundo, pa tsamba dzakazwi “erengai”, pa mafoto, uye pa vhidhiyo ipi hayo icamubetserai pa kupanganidza fundo. Pedzepo, rangarirai mufundi wenyu. Rangarirai pacino nguwa kuti mungapanganidza kudini fundo yenyu zviri nyore uye zvinozwisisika. Kana mukaita izvi, mufundi wenyu acanyasa kuzwisisa uye kuzviseenzesa mu upenyu wake.—Ne. 8:8; Zvie. 15:28a.

8. Masoko a muphostori Pauro ari pana Akorosi 1:9, 10, anotifundisei pa kunamata tecibatanidza mufundi wedu?

⁸ Cimwenizve cinodikana kuita dii re pa kugadzirira kenyu, ndece kunamata mecibatanidza mufundi wenyu uye zvaanodikana kucinja. Kumbirai Djehovha amubetserei kuti mufundise zvinobaya mwoyo. (Erengai Akorosi 1:9, 10.) Edzai kurangarira mafundo ekuti angashupha mufundi wenyu kuazwisisa kana kuti kuatenda. Musakanganwe kuti cinangwa cenyu ndece kumubetsera kuti agume pa kubhabhatidzwa.

9. Mufundisi angabetsera kudini mufundi kuti agadzirire? Panganidzai.

⁹ Cido cedu ngece kuti fundo ye Bhaibheri ye nguwa dzese, iite kuti mufundi atende zvese zvaanoizirhwa na Djehovha uye na Djesu uye zvimuitise kuti ade kufunda zvakawada. (Mt. 5:3, 6) Kuti abetsereke no fundo, mufundi unodikana kukanda nzeru dzake pa zviya zvaari kufunda. Ngekudaro, mubetserei kuti agadzirire pa fundo imwe na imwe. Mupanganidzirei kuti unodikana kugadzirira ndima imwe na imwe paciine nguwa, uye kuti ungazviseenzesa kudini mu upenyu wake. Mungamubetsera kudini? Gadzirirai mwese pamwepo no mufundi wenyu kuti mumupangidzire kuti angagadzirira kudini.e Mufundisei kuti angagumira kudini mhinduro dze mibvunzo ye fundo. Mufundisei kuti atsurutsute masoko acazomubetsera kuedzurira mhinduro. Pedzepo, mukumbirei kuti adaire nge masoko ake kamare. Mufundi paanoita izvi, munokwanisa kuona kuti iyena wazwisisa kamare zvaari kufunda. Asi pano cimwenizve camunodikana kubetsera mufundi wenyu kuti aite.

FUNDISAI MUFUNDI KUTI AREKETE NA DJEHOVHA NGUWA DZESE

10. Ngei mufundi ecidikana kuerenga Bhaibheri mazuwa ese, uye ungabetsereka kudinini nge urongwa we kuerenga Bhaibheri?

¹⁰ Pane basi kufunda sumana yese no mufundisi, pano ciro cinodikanwa kuitwa mazuwa ese no mufundi. Iyena unodikana kucedza na Djehovha, kana kuti, kuzwa zvinoreketa Djehovha uye kureketa naye. Kuti azwe Djehovha, mufundi unodikana kuerenga Bhaibheri mazuwa ese. (Djos. 1:8; Pis. 1:1-3) Mupangidzirei kuti ungaseenzesa kudini “Urongwa we Kuerenga Bhaibheri”, uri pa jw.org.f Kuti mufundi abetsereke nge urongwa wake we kuerenga Bhaibheri, mupanganidzirei kuti iyena unodikana kurangarira zvaari kuerenga. Mubvunzei kuti, paanonga ecierenga Bhaibheri unodikana kudzibvunzisa kuti: Izvi zvinondifundisei nge zva Djehovha? Ndingazviseenzesa kudini mu upenyu wangu?—Zvi. 17:11; Tg. 1:25.

11. Tingafundisa kudini mufundi kuti anamate nge mushobo unodikanwa? Ngei zvecikosha kuti anamate mazuwa ese kuna Djehovha?

¹¹ Kohomedzesai mufundi wenyu kuti arekete na Djehovha. Kuti aite izvi, iyena unodika kunamata mazuwa ese. Nge ndaa ii, musati uye mapedza kufunda, itai munamato no mwoyo wese mecibatanidzawo zina rake. Mufundi paanomuzwa mecinamata, iyena unofunda kuti angaita kudini minamato we pamwoyo kuna Djehovha mu zina ra Djesu Kristu. (Mt. 6:9; Ju. 15:16) Rangarirai kuti mufundi wenyu ucagara kudini dhuze na Mwari nge kupurutana Djehovha eciseenzesa kuerenga Bhaibheri mazuwa ese uye nge kureketa na Djehovha eciseenzesa munamato! (Tg. 4:8) Mufundi wenyu paanorumbwa eciita izvi, iyena ucakudza cido ce kuguma pakudzipira uye kubhabhatidzwa.

BETSERAI MUFUNDI KUTI AWAKEUSHAMWARI WAKE NA DJEHOVHA

12. Mufundisi ungabetsera kudini mufundi kuti akudze ushamwari wake na Djehovha?

¹² Zvese zvinofundwa nge mufundi azvidikani kuti zvigare basi mu mundangariro dzake, asi zvinodikanawo kuguma mu mwoyo make. Ngei? Ngekuti mwoyo—unobatanidza cido uye mazwiro—ndiwona unoita kuti tiite ciito. Djesu wainyasa kuziya kufundisa ngo mwazvo. Asi anhu aimuteerera ngekuti iyena waikwanisa kubaya mwoyo yawo. (Ru. 24:15, 27, 32) Mufundi wenyu unodikana kuona kuti Djehovha ndi Munhu kamare, kana kuti, munhu watinokwanisa kugara ne ushamwari. Uye iyena unodikana kuona Djehovha hingana Baba, Mwari uye Shamwari yake. (Pis. 25:4, 5) Pamunoitisa fundo ye Bhaibheri, itai kuti unhu wa Mwari ubude pamhene. (Eki. 34:5, 6; 1 Pe. 5:6, 7) Pasinei no zvamunonga mecifunda, edzai kuita kuti mufundi wenyu akande nzeru dzake pa Unhu wa Djehovha—hingana rudo, unatsi uye usisi. Djesu akati “mutemo ukuro kupinda yese uye wekutanga” ndi uyu “Ida Djehovha Mwari wako.” (Mt. 22:37, 38) Edzai kuita kuti mufundi wenyu ade Djehovha zvecibva pasi pe mwoyo.

13. Mungabetsera kudini mufundi wenyu kuti aziye unhu wa Djehovha? Pasai muezaniso.

¹³ Mu makani amunocedza no mufundi wenyu, pangidzai kuti munoda Djehovha zvakadini. Izvi zvingabetsera mufundi wenyu, kuti asakurire ushamwari wake we padhuze na Mwari. (Pis. 73:28) Ngo muezaniso, pamweni bhurushura re kufunda, kana kuti tsamba ye Bhaibheri inomasoko anopangidza unhu wa Djehovha—rudo, ungwaru, unatsi, kana simba—izvi zvinomubaya mwoyo here? Hino mungabvuzisa mibvunzo uu mufundi wenyu. Bhuyai kuti unhu uu nge umwe we unhu unoita kuti ade Baba wake we kudenga. Asi pano cimwenizve cinodikanwa kuitwa no afundi ese kuti abudirire dakara pakubhabhatidzwa.

KOHOMEDZESAI MUFUNDI KUTI APINDE MISANGANO YE UNGANO

14. Maererano no Ahebheru 10:24, 25, misangano ingabetsera kudini afundi e Bhaibhei kuti abudirire?

¹⁴ Tese hedu tinoda kuti afundi edu abudirire dakara pakubhabhatidzwa. Kuti tiabetsere, tinodikana kuakohomedzesa kuti apinde misangano. Afundisi aano nguwa yakareba anoti, afundi anotanga kupinda misangano anobudirira nokukasika. (Pis. 111:1) Afundisi amweni anopanganidzira afundi awo kuti, zwaari kufunda pa fundo yo Bhaibheri azvesepi; asi kuti abetsereke no dii rimweni re fundo, anodikana kupinda misangano. Erengai Ahebheru 10:24, 25 no mufundi wenyu, uye mubetserei aziye kuti kana akapinda misangano acabetsereka maningi. Mupangidzei vhidhiyo inozwi Mu Nyumba yo Umambo Munoizwei?g Betserai mufundi wenyu azwisise kuti kupinda misangano masumana ese kunokosha maningi.

15. Ngazvipi zvamunodikana kuita kuti mukohomedzese mufundi wenyu apinde misangano mazuwa ese?

¹⁵ Ngazvipi zvamunodikana kuita kana mufundi wenyu asati apinda misangano kana kuti ecipinda nguwa dzimweni? Cedzai naye no cido nge zvamakafunda pamusangano wakadarika. Mupasei Murindiri kana kuti Mabhuku Achashandiswa Paushumiri Hwedu uye Kurarama Kwechikristu acaseenzesa pa musangano we pakati pe sumana. Mupangidzei kuti zvii zvicafundwa pa masumana anoteera uye mubvunzisei kuti zvii zvaapfarira. Zvicazwa mufundi wenyu paacatanga kupinda misangano, zvicamubetsera kuti asiyanise no misangano yaakapinda ku magereja amweni. (1Ako. 14:24, 25) Iyena ucaziya anhu ano miezaniso yakanaka uye acamubetsera kuti agume pakubhabhatidzwa.

16. Ngazvipi zvinodikana kuizwa kuti tibetsere mufundi agume pa kubhabhatidzwa, uye ticafundei mu fundo inoteera?

¹⁶ No zvese zvatafunda dakara zvino, tingabetsera kudini afundi edu dakara abhabhatidzwa? Kohomedzesai mufundi wenyu kuti abate fundo no nyara mbiri, afunde masumana ese, uye agadzirire asati afunda. Kupinda izvi, kohomedzesai mufundi wenyu kuti arekete na Djehovha mazuwa ese uye kuti asakurire ushamwari wake naye. Pa kupedzesera kohomedzesai mufundi wenyu kuti apinde misangano nguwa dzese. (Onai bhokisi “Ngazvipi Zvinodikana Kuizwa no Mufundi kuti Agume pa Kubhabhatidzwa.”) Asi pacino madanhu mashanu anodikana kuizwa no afundisi kuti afundi awo agume pa kubhabhatidzwa. Ndiapi iwona? Fundo inoteera icapanganidza.