“Khwederai dhuze na Mwari, uye iyena acakhwedera kamuri.”—Tiyago 4:8
Mwari Anopurutana Minamato Yedu Here?
Imwimwi makambodzibvunzisa kuti Mwari anopurutana minamato yenyu here? Kana zviri izvona, imwimwi andimwipi mwega. Anhu akawanda akatoita minamato kuna Mwari ngezve matambudziko awo, asi matambudzikoo anondorumbwa andorinawo. Kodi izvi zvinoda kureya kuti Mwari aapurutani minamato yedu here? Haiwa! Bhaibheri rinogondesa kuti Mwari anopurutana minamato yedu kana tikanamata kaari nge mushobo waanoetsera. Ngatione zvinobhuiwa no Bhaibheri.
ZVEZVIROKWAZVO MWARI ANOPURUTANA MINAMATO YEDU.
“Imwimwi Muzwi we munamato, anhu e madzinza ese acauya kamuri.”—Pisarema 65:2.
Anhu amweni anoita munamato kunyazi asikatenderi kuti aripo ari kuapurutana. Awona anoita izvona ngekuti anorangarira kuti kubhuya ngezve mazwiro awo eciseenzesa munamato zvinobetsera kuti azwe zviri nani. Asi munamato auiti basi kuti muzwe zviri nani pa matambudziko amunonga mecisongana nawo. Bhaibheri rinotigondesa kuti: “Djehovhaa ari dhuze no anhu ese anomudainza, ese anomudainza no mwoyo wese. . . . [Iyena] anozwa kucema kawo kuti abetserhwe.”—Pisarema 145:18, 19.
Hino, tingagara no rugondo rokuti Djehovha Mwari anozwa minamato yo aseenzi ake. No rudo rakakura, iyena anogondesa kuti: “Imwimwi mucandidainza uye mucauya kandiri meciseenzesa munamato, uye inini ndicamuzwai.”—Djeremiya 29:12.
MWARI ANODA KUTI IMWIMWI MUITE MUNAMATO KAARI.
“Rumbwai meciita munamato.”—Aroma 12:12.
Bhaibheri rinotikohomedzesa kuti ‘tirumbwe teciita munamato’ uye “nguwa dzese.” Zviri pamhene kuti Djehovha Mwari anoda kuti anhu aite munamato kaari.—Mateu 26:41; Aefeso 6:18.
Ngei Mwari anoda kuti isusu tiite munamato kaari? Rangarirai zvinoteera: Baba anopfara mwana paanokumbira rubetso kaari, andizvopi? Izvirokwazvo kuti kakawanda kakhona baba anonga aakutoziya zvinonga zvecidiwa no mwana. Asi baba paanozwa mwana wawo ecikumbira rubetso rawo, awona anozwa kuti mwana wawo unoagonda uye unoda kubetserhwa. Ngo mushobo umwewo, patinoita munamato kuna Djehovha Mwari, isusu tinopangidza kuti tinomugonda uye tinoda kugara shamwari dzake.—Zvierengo 15:8; Tiyago 4:8.
ZVEZVIROKWAZVO MWARI ANONYASA KURANGARIRA NGE ZVENYU.
‘Khandirai kaari zvese zvinomurhyai mwoyo, ngokuti iyena anomucengetai.’—1 Pedru 5:7.
Mwari anoda kuti tinamate kaari ngokuti anotida uye anonyasa kurangarira umwe na umwe wedu. Iyena anonyasa kuziya matambudziko edu uye anoda kutibetsera.
Mambo Dhavhidhi wairumbwa eciita munamato kuna Djehovha Mwari ecikumbira rubetso. Iyena waireketawo na Mwari ngezve marangariro ake uye mazwiro ake. (Pisarema 23:1-6) Mwari aiona kudini Dhavhidhi? Mwari aida Dhavhidhi uye aipurutana minamato yake. (Zviito 13:22) Nge mushobo umwewo, Mwari anopurutana minamato yedu ngekuti anoda umwe na umwe wedu.
“ININI NDINODA DJEHOVHA, NGEKUTI IYENA ANOZWA IZWI RANGU”
Izvi ndizvo zvakarakethwa no mutari umweni we pisarema mu Bhaibheri. Masoko aya anopangidza kuti iyena wainga ano rugondo rokuti Mwari aipurutana minamato yake, uye izvi zvaimubetsera maningi. Iyena waizwa ari dhuze na Mwari uye wainga ano simba rinodiikanwa kuti arhwisane no matambudziko ake uye marhwadzo e upenyu.—Pisarema 116:1-9.
Kana tino rugondo rekuti Mwari anopurutana minamato yedu, zvicaita kuti tirumbwe teciita minamato. Onai muezaniso wa Pedro wekuti unoraramira kakutsi ke Espanha. Iyena wakafirhwa no mwana wake we makore 19 pa tsawana yo karu. Pedro wakapererhwa no mazano. Iyena wakafungura mwoyo wake kakawanda kuna Mwari nge kuita munamato ecikumbira kunyaradzwa uye kubetserhwa. Cinyi cakaitika? Iyena unoti: “Djehovha akadaira minamato yangu nge kunyaradza uye kubetsera inini no mukadzi wangu, eciseenzesa hama dzedu mukutenda.”
Mhinduro dze minamato yedu dzingadairhwa peciseenzeswa nyaradzo uye rubetso re shamwari dzedu dzinodiwa
I zvirokwazvo kuti munamato auzi kuita kuti mwana wawo ahwirirezve kugara mupenyu. Asi zvezvirokwazvo wakabetsera maningi Pedro no mhuri yake. Mukadzi wake, Maria Carmen, unoedzurira kuti: “Munamato wakandibetsera kuti ndishingirire marhwadzo angu. Inini ndaizviziya kuti Djehovha Mwari aindizwisisa, ngekuti pandaiita munamato kaari, inini ndaizwa kuti iyena aindipasa runyararo uye ndaiterama.”
Hingana zvinorekethwa no Bhaibheri uye zviitiko zvakadai, zvinopangidza kuti Mwari anopurutana minamato yedu. Asi zviri pamhene kuti Mwari aadairi minamato yese. Ngei Mwari anodaira minamato imweni asi imweni haiwa?
a Bhaibheri rinopangidza kuti Djehovha i zina ra Mwari.—Pisarema 83:18.