Cinyi Catingaita Kuti Mwari Apurutane Minamato Yedu?
Djehovha Mwari ndi “Muzwi we munamato.” (Pisarema 65:2) Isusu tinokwanisa kureketa naye pa mbuto ipi hayo uye pa nguwa ipi hayo, no izwi rinozika kana kuti no izwi risikaziki. Djehovha anoda kuti imwimwi mumudainze kuti “Baba.” Uye zvezvirokwazvo iyena ndi Baba akanaka atingagara nawo. (Mateu 6:9) Ngo rudo, Djehovha anotifundisa kunamata nge mushobo wakanaka, kuti iyena akwanise kudaira minamato yedu.
ITAI MINAMATO KUNA DJEHOVHA MWARI MU ZINA RA DJESU
“Kana mukakumbira Baba ciro cipi haco mu zina rangu, awona acamupasai.”—Juau 16:23.
Masoko aya a Djesu anopangidza pamhene kuti Djehovha anoda kuti tiite minamato kaari, haiwa teciseenzesa mifanikiso, acena, ngirozi, kana kuti anyaukama edu akafa kare, asi muzina ra Djesu Kristu. Patinonamata Mwari mu zina ra Djesu, isusu tinoziya kuti Mwari anopurutana minamato yedu nge ndaa ye zvatakaizirhwa na Djesu. Djesu akati: “Apana anouya kuna Baba asikazi kupinda nge pandiri.”—Juau 14:6.
REKETAI ZVECIBVA MU MWOYO
“Dururai mwoyo wenyu pamberi pake.”—Pisarema 62:8.
Patinoita munamato kuna Djehovha, tinodikana kureketa naye hingana mwana uri kureketa na baba ake ano rudo. Pane kuita munamato tecindophinda masoko atinoziya basi kana kuti tecierenga bhuku re minamato, isusu tinodikana kuita munamato kaari no rureremedzo uye zvecibva mu mwoyo.
NAMATAI ZVINOENDERANA NO KUDA KA MWARI
“Tikakumbira ciro cipi haco maererano no kuda kake, iyena anotizwa.”—1 Juau 5:14.
Eciseenzesa Bhaibheri, Djehovha anobhuya zviro zvaacatiitira uye zvatinodikana kuita kaari. Kana tecida kuti minamato yedu itenderhwe na Mwari, tinodikana kuita minamato “maererano no kuda kake.” Kuti tikwanise kuita izvona, tinodikana kufunda Bhaibheri kuti tinyase kuziya Mwari. Ngo kuita kudaro, iyena acapurutana minamato yedu.
IMWIMWI MUNGAITA MUNAMATO NGE ZVEI?
Namatai mecikumbira zviya zvamuri kuda. Isusu tinganamata kuna Mwari tecikumbira kuti tione zvokurhya, zvekupfeka uye pekugara. Isusu tingaitawo munamato tecikumbira ruziwo kuti tiite zvisananguro zvakanaka uye simba kuti tikwanise kukunda matambudziko edu. Tingakumbirawo kuti titunhudzire kutenda, kurekererhwa na Mwari uye rubetso rake.—Ruka 11:3, 4, 13; Tiyago 1:5, 17.
Itiraiwo munamato amweni. Abereki ano rudo, anopfara maningi kana ana awo akazwirana uye akadanana. Djehovha anodawo kuti ana ake e pa nyika pano anyasewo kurangarirana. Isusu tingaitirawo munamato mhuri yedu, mwamuna kana mukadzi wedu, ana edu uye shamwari dzedu. Mufundi Tiyago wakatara kuti: “Itiranai munamato.”—Tiyago 5:16.
Namatai mecitenda zviya zvamunazvo. Ngezve Musiki wedu, Bhaibheri rinobhuya kuti: “[Iyena] akapangidza unaki wake eciapasa mvura ye kudenga uye nguwa ye kukorora zvakawanda, eciagutsa no zvokurhya uye ecidzadza mwoyo yawo no mupfaro.” (Zviito 14:17) Kana tikaima kuti tirangarire zvese zvatinoizirhwa na Mwari, ticada kumutenda pa munamato. Uye zviri pamhene kuti isusu tinodikanawo kupangidza kutenda Mwari nge kumuzwira.—Akorosi 3:15.
GARAI NO MWOYO UNONONOKA KUTSAMWA UYE RUMBWAI MECIITA MUNAMATO
Nguwa dzimweni imwimwi, mungadzirhya mwoyo nge kutama kudairhwa minamato yenyu nokukasika. Kodi zvinoda kureya kuti Mwari aaripi kunyasa kumurangarirai here? Haiwa! Onai masoko manganani e anhu amweni anopangidza kuti nguwa dzimweni zvese zvatinodikana kuita i kurumbwa teciita munamato.
Steve, wamborekethwa nge zvake pa fundo yo kutanga, unoti: “Kudai usiripi munamato, inini ndinoona kuti ndainga ndisikazokwanisizve kupfara.” Cinyi cakaita kuti Steve acinje maonero ake ngezve munamato? Iyena wakatanga kufunda Bhaibheri uye wakafunda ngezve kukosha ke kuita munamato uye ngezve kutama kuremba kuita munamato. Iyena unopanganidza eciti: “Inini ndinoita munamato kuna Mwari kuti nditende rubetso rese randinopaswa no shamwari dzangu dzinodiwa. Zvino ndaakunyasa kupfara zvezvirokwazvo kupinda kare.”
Jenny, wairangarira kuti wainga asikasisiri kupurutanwa na Mwari, unoti: “Pandainga ndecizwa ndisikabetseri, inini ndakadeketerera Mwari ndecimukumbira kuti andibetsere kuzwisisa kuti ngei inini ndaizwa ndisikabetseri.” Munamato wakamubetsera kudini? Iyena unoti: “Kuita munamato kakandibetsera kuti ndigare no maonero akanaka nge zvangu; kuona kuti kunyazi mwoyo wangu wecindipasa ndaa, Mwari aandipasi ndaa. Kuita munamato kakandibetserawo kuti ndisarembe.” Mugumisiro wakhona ngaupi? Iyena unobhuyazve kuti: “Munamato wakandibetsera kuona Djehovha hingana Baba uye Mwari ano rudo rakakura; Shamwari ye zvirokwazvo inonyasa kundirangarira. Kana inini ndikarumbwa ndecipeta masimba kuti ndimupfadze, iyena nguwa dzese acanditsigira uye acandibetsera.”
Isabel unoti: “Pandinoona mwana wangu ane mupfaro kunyazi wakaremara, inini ndinoona kuti iyena i mhinduro ye minamato yangu.”
Onaiwo muezaniso wa Isabel. Paakagara no pamwiri, mamedhiko akamubvunza kuti mwana wake waizobarhwa wakaremara. Iyena wakatsukwara maningi. Anhu amweni akatomubvunza kuti abvise pamwiri. Isabel unopanganidza eciti: “Inini ndairangarira kuti ndaizofa nge kutsukwara.” Iyena wakaitei? Iyena unoti: “Inini ndaiita munamato kakawanda, ndecikumbira rubetso ra Mwari.” Nokuhamba ke nguwa, iyena wakazobara mwana wake, Gerard. Uye iyena zvezvirokwazvo wakabarhwadi wakaremara. Kodi Isabel wakaona kuti Mwari akadaira minamato yake here? Honde! Nge mushobo upi? Iyena unoti: “Pandinoona mwana wangu, wekuti zvino wane makore anokwana kuita 14 ecipfara, kunyazi akaremara, inini ndinoona kuti iyena i mhinduro ye minamato yangu, makomborero akakura andapaswa na Djehovha.”
Masoko anobva pa mwoyo akadai, anoita kuti tirangarire ngezve masoko ari pana Pisarema, ekuti: “Djehovha, imwimwi mucazwa cikumbiro ce apfawi. Mucabambisa mwoyo yawo uye mucakanda ndangariro dzenyu paari.” (Pisarema 10:17) Zvezvirokwazvo tino zvikonzero zvakanaka zvekuti tirumbwe teciita minamato!
Mu Bhaibheri tingagumira minamato yakawanda yakaizwa na Djesu. Zvezvirokwazvo munamato unonyanya kuziikanwa ndi uya waakafundisa afundi ake. Cinyi catingafunda no munamato uwona? Ngatione.