Wakaizve Ushamwari Wenyu na Djehovha

MAKORE ese, mabira akawanda anokosha anohwirinzwa mu ungano ye ciKristu. Rangarirai nge zve “mupfaro wakakura kudenga” kana rimwe re mabira parinohwirira ku sangano! (Ru. 15:7, 10) Kana imwimwi mabva kuhwirinzwa, garai ne rugondo rokuti Djesu, ngirozi uye kutobatanidzawo na Djehovha, anopfara maningi nge kumuona mecihwirira mu cokwadi. Asi pamunonga meciwakazve ushamwari wenyu na Djehovha, pacaoneka zvinetso. Ngazvipi zvinetso izvona, uye ngazvipi zvingamubetsera kuti mukwanise kuzvikunda?

NGAZVIPI ZVINETSO IZVONA?

Mu masure mekuti ahwirira mu ungano mawo, akawanda awo anonga ecirhwisana ne mazwiro akashata. Pamweni mungazwa hinga Mambo Dhavhidhi. Kunyazi mumasure mekuti ainga arekererhwa iyena wakati: “Zvishaishi zvangu zviri kundishupha.” (Pis. 40:12; 65:3) Paanohwirira kuna Djehovha amweni anorumbwa ecirhwisana ne mazwiro ekudzipasa ndaa kana kuti mazwiro ekupsveruka ke makore akawanda. Isabelle,a uwo wakapedza makore 20 akadzingwa wakapanganidza eciti: “Kandiri zvaindishuphira maningi kutendera kuti Djehovha aizondirekerera.” Kana mukaora mwoyo ushamwari wenyu na Djehovha ungarembazve. (Zvie. 24:10) Musasiye izvona zveciitika kamuri.

Amweni anorangarira kuti aangakwanisi kuita zvese zvinodikana kuti agarezve ne ushamwari na Djehovha. Mumasure mekuhwirinzwa, Antoine wakati: “Zvaiita hingana kuti ndainga ndakanganwa kuti cinyi cinozwi mu Kristu.” Nge ndaa ye mazwire akaita hinga aya, amweni anoguma pakuremba.

Mukuezanisira, cimborangarirai cigidhigidhi caphwanya nyumba. Muridzi we nyumba yaputsika, iyena unotsukwara nge kurangarira basa rinodikana kuizwa kuti aigadzirisezve. Zvimwezvo ndizvo zvinoitika kana munhu akaita cishaishi cinoparadza ushamwari na Djehovha. Mungakwanisa kunetseka ne basa rakakura kuti mugadzirise ukama wenyu na Djehovha. Asi amudikani, kuzviita mwega.

Djehovha arikutipika eciti: “Uyai zvino kuti tigadzirise zviro.” (Isa. 1:18) Imwimwi mapeta masimba akakura kuti mukwanise “kugadzirisa zviro na Djehovha.” Uye ayena anomudai nge ndaa yekuita izvona. Cimborangarirai basi: Djehovha anokwanisa kuseenzesa muezaniso wenyu kuti apase mhinduro ino simba pa manyepo akaizwa na Sathani!—Zvie. 27:11.

Nekuhwirira ku cokwadi imwimwi makakhwedera dhuze na Djehovha, uye ayena anomugondesa kuti acakhwederawo dhuze na imwimwi. (Tg. 4:8) Asi musagutsikane basi ngekuti amweni amuona mahwirira mu ungano. Munodikana kubambisa rudo renyu kuna Baba uye Shamwari yenyu Djehovha. Mungazviita kudini?

GARAI NE ZVINANGWA ZVAKARERUKA

Edzai kugara ne zvinangwa zvamunokwanisa kuita. Edzurirai kuti pakawakirhwa kutenda kenyu pacakanaka—imwimwi mucirikuedzurira zvipikirhwa zva Djehovha zviri mberi. Asi mararamire enyu eciKristu ainga akuwadzika uye munodikana kumagadzirisazve. Munodikana kuparidzira nguwa dzese, kupinda misangano, uye kupedza nguwa mecishamwaridzana ne hama ne shamwari dzenyu mukutenda. Onai zvinangwa zvinganani zvamungagara nazvo.

Reketai na Djehovha nguwa dzese. Baba edu anoziya kuti mazwiro ekudzipasa ndaa, angamushuphira kuti muite munamato. (Aro. 8:26) Asi, “rumbwai mecinamata,” bvunzai Djehovha kuti munoda maningi kugara shamwari yake. (Aro. 12:12) Andrej unoedzurira eciti: “Ndaizwa hingana kuti ndino ndaa yakakura uye ndaipsveruka. Asi mumasure mekuita munamato, mazwiro awona aipunguka. Ndaizwa ndiri mu runyararo.” Kana musikazii zvokureketa pa munamato, fundai Pisarema 51 na 65 unopangidza nge zve munamto wa Mambo Dhavhidhi paakacinyuka.

Fundai Bhaibheri nguwa dzese. Kuita izvona zvicabambisa kutenda kenyu uye zvicatunhudzira rudo renyu kuna Djehovha. (Pis. 19:7-11) Felipe unopanganidza eciti: “Nge ndaa yekuti ndainga ndisina urongwa wakanaka wekufunda Bhaibheri, ndizvona zvakandiitisa kuti ndirembe pakunamata uye nditsukwarise Djehovha,” iyena unotizve: “Ndainga ndisikadi kuphinda kuita cishaishi cimweco, ndiyo ndaa ndakasanagura kuti fundo ye munhu ega igare cidziiriro cangu.” Imwimwi mungakwanisa kuitawo zvimwezvo. Kana musikazii zvamunodikana kufunda pa fundo ye munhu ega, kumbirai rubetso re shamwari yenyu yakakura pakunamata.

Wakaizve ushamwari wenyu ne hama uye ne hanzvadzi. Amweni paanohwirinzwa mu ungano, anotya kuti hama dzicakanyangadzwa nge zviya zvaakaita. Larissa unoti: “Ndaizwa kupsveruka maningi. Ndaizwa hingana kuti ndainga ndatsukwarisa ungano. Ndakagara ne mazwiro aya ke nguwa yakareba maningi.” Garai ne rugondo rokuti akuru ne hama dzakakura pakunamata dzakagadzirira kuti amubetsere kugadzirisa ushamwari wenyu na Djehovha. (Onai bhokisi “Akuru Angaitei?”) Awona anopfara maningi nge kuhwirira kamaita kuna Djehovha, uye anoda kuti mupfarewo!—Zvie. 17:17.

Mungakhwedera kudini ne ungano? Pamwepo ne hama pindai misangano yese uye budai mu basa rekuparidza. Izvi zvingamubetsera kudini? Felix unoti: “Ungano yainga yakandietsera. Ndakaona kuti hama dzinondida. Awona akandibetsa kuona kuti ndiri nhai ye mhuri, uye ndakaona kuti ndainga ndarekererhwa zvezvirokwazvo.”—Onai bhokisi “Cinyi Camungaita?”

MUSAREMBE!

Pa hondo yenyu ye kuwaka ushamwari na Djehovha, Sathani ucarumbwa ecikanda “madutu” pamberi penyu. (Ru. 4:13) Iyena unoda kuti imwimwi murembezve.

Ecireketa nge zve mabira ake, Djehovha akagondesa eciti: “Ndicapsvaka rakapsveteka, ndicaunzisa rakapauka, ndicapombera djira riya rakakuwadzika uye ndicabambisa rakaremba.” (Eze. 34:16) Djehovha akabetsera aseenzi ake akawanda kuti abambezve pakunamata. Mungagara ne rugondo rokuti ayena anodawo kumubetsera kuti muwakezve uye mubambise ushamwari wenyu naye.

Akuru Angaitei?

Rubetso re akuru rinodikana maningi ku muparidzi unonga ahwirinzwa mu ungano kuti akwanise kugadzirisazve ukama wake na Djehovha. Onai zvingaizwa ne akuru.

Mubetserei kuti azwe kuti unodiwa. Mupostori Pauro waiziya kuti mushaishi wacinyuka waikwanisa “kunyiswa nge kunyanya kutsukwara.” (2Ako. 2:7) Munhu wakadai ungakwanisa kupsveruka uye kuora mwoyo. Ndiyo ndaa Pauro wakapa mazano ku ungano kuti: “Munodikana kumurekerera ne mwoyo wese.” Aya akahwirinzwa anoda rubetso kuti agare no rugondo rokuti anodiwa na Djehovha uye ne hama dzawo mukutenda. Kuti awona asaore mwoyo zvakanaka kuti akuru aabetsere uye aasimbe.

Anamatirei. “Munamato we munhu munatsi uno simba guru.” (Tg. 5:16) Larissa, wamboreketwa unoti: “Ndakareketa ne akuru nge zve kupanikira uye kutya kandainga nako. Awona akanamata neni. Ndipona pendakazwisisa kuti akuru ainga asikazi kunditsamwira. Awona aida kundibetsera kuti ndigadzirisezve ukama wangu na Djehovha.” Theo unoti: “Minamato yakaizwa ne akuru yakandipangidza kuti anondida, uye anoona zvakanaka zvandinoita.”

Garai shamwari yake. Aya akahwirinzwa mu ungano anodikana kuitazve shamwari mu ungano. Mukuru unozwi Justin unoti: “Khorovherai mikana yese kuti muparidze naye uye cinonyanya kukosha muvhakacirei. Kuita ushamwari naye kunokosha!” Mukuru umweni unozwi Henry unoti: “Kana hama dzimweni dze mu ungano dzikaona kuti akuru anoshamwaridzana ne aya akahwirinzwa mu ungano, awona acada kuteedzerawo.”

Abetserei kuti afunde. Shamwari yakakura pakunamata ingakwanisa kubetsera munhu wakahwirizwa kuti afundezve. Mukuru unodainzwa Darko unoti: “Ndinopfarira maningi kupasawo amweni zvandinonga ndagumira pa fundo yangu ndega. Tinopanganawo kufunda naye munhuwo bhuku ratinoona ringatipfadza.” Mukuru umweni unozwi Clayton, unoti: “Inini ndino akohomedzesa kupsvaka ngano dze mu Bhaibheri dze anhu akabatanawo ne migariro yakaezana uye moona kuti ngazvipi zvaangafunda.”

Garai muushi wakanaka. Aya akahwirinzwa akawona akuru ecisenza hinga atongi. Asi zvino, awona anodikana kumuona hinga aushi. (Dje. 23:4) Kasikai kuzwa uye garai makagadzirira kuasimba. Onai zvinoizwa ne mukuru unozi Marcus unoti: “Tinopasana mazano e Bhaibheri, uye tinoasimba. Isusu tinoagondesa kuti tinodada nemwi nge kupeta masimba kemakaita kuti muhwirire kuna Djehovha uye kuti Djehovha arikupfara maningi. Mu masure me kuavhakacira, tinosiya zuwa raticazohwirirazve.”

a Mazina amweni mu fundo ino akacinjwa.