Munoseenza Zvakanaka ne Amweni Here?

Djesu akafundira kudenga kugara ne mawara anodikana pakuseenza ne amweni. Paakazouya pa nyika pano akafundisa ateeri ake mawara awona. Isusu tingafundawo zvakawanda ne muezaniso wa Djesu. Ngatimboreketa padoko nge zve mazano 3 ne muezaniso wa Djesu. Mazano aya acatibetsera kuti tiseenze zvakanaka ne amweni uye togara takabatana ne hama dzedu.

ZANO 1: ‘KUDZANAI’

Kuti tiseenze zvakanaka ne amweni tinodikana kudzidodosa. Munhu wakadai unoreremedza adoni ake e basa uye aaedzi kugara muridzi we zvese. Djesu ainga ari munhu anodzidodosa uye akfunda kudarona Baba ake Djehovha. Kunyazi zvakadaro Djehovha akaita kuti anhu amweni aone kuti akabetswawo ne Mwana ake. Izvi zvinoonekwa ne masoko a Djehovha ari pana Genesi 1:26: “Ngatisike munhu ne mufanikiso wedu.” (Ge. 1:26) Masoko aya akapangidza Djesu kuti Djehovha munhu anodzidodosa.—Pis. 18:35.

Djesu paainga pa nyika, ayena ainga munhu anodzidodosa. Nge muezaniso Djesu paaisimbwa, ayena aipasa mbiri Djehovha. (Mk. 10:17, 18; Ju. 7:15, 16) Ayena aipeta masimba kuti agare murunyararo ne ateeri ake. Kuna Djesu, awona ainga shamwari dzake haiwa aranda. (Ju. 15:15) Djesu akatosuka tsoka dze afundi ake kuti afundise kukosha ke kudzidodosa. (Ju. 13:5, 12-14) Tinodikana kuteedzera muezaniso wa Djesu uye kukanda zvido zve amweni pa mbuto yekutanga. Ticaseenza zvakanaka kana ‘tikakudzana’ uye kana tikasanetseka kuti ndiyani acasimbwa ne basa rinonga raizwa.—Aro. 12:10.

Munhu anodzidodosa unoziya kuti kana pano api e zano akawanda “zvirongwa zvinobudirira.” (Zvie. 15:22) Zvakanaka kuedzurira kuti akuna munhu unoziya zvese, kunyazi ano nguwa yakawanda. Kunyazi Djesu akatoreketa kuti aatozii zvese. (Mt. 24:36) Djesu aida kuzwa maonero e afundi ake kunyazi asikazi kukwana. (Mt. 16:13-16) Izvi zvinopangidza pamhene kuti ngei afundi ake aizwa akasudzunuka kunyazi eciziya kuti ainga anhu asikazi kukwana! Isusu tinodikanawo kudzidodosa kudaro. Kana tikaziya kuti atizii zvese, uye tozwawo marangariro e amweni ticakwanisa kugara ne runyararo ne “kubudirira ke zvirongwa.”

Akuru anodikana kuteedzera kudzidodosa ka Djesu paanoseenza ese. Awona anodikana kuedzurira kuti mukuru upi na upi ungakwanisa kupfuridzirhwa ne mwiya mucena kuti zvibetsere dare re akuru kuita zvisananguro ne ungwaru. Kana umwe na umwe akazwa akasudzunuka kupa maonero ake, zvingagara nyore kuguma pa zvisananguro zvakanaka uye ungano inobetsereka.

ZANO 2: “KUDZIDODOSA KENYU NGAKUZIIKANWE”

Kuti tiseenze zvakanaka ne amweni, tinodikana kukasika uye tisarumbwe tecida kuti zviro zviizwe ne mushobo wangu. Djesu ainga ne mikana yakawanda yekuona Djehovha ecidzidodosa. Nge muezaniso, Djesu akaona Baba ake ecipangidza usisi anhu. Nge ndaaye citema, anhu aidikana kufa. Asi Djehovha aazi kuwasiya akadaro, akaita ciro kuti aponese anhu.—Ju. 3:16.

Djesu aingawo munhu ari pakati ne pakati mu migariro imweni ye zviro. Tinozviona pa mwanakadzi we fenícia. Djesu ainga atumwa kuti abetsere anhu a Djehovha haiwa anhu a e madzinza. Asi kunyazi zvakadaro wakabetsera mwanakadzi uyu. (Mt. 15:22-28) Djesu aingawo munhu ari pakati nepakati wainga asikaemeri kukwana kea fundi ake. Tinozviona paakarekerera Pedru pa nguwa yekuramba Djesu. Nokuhamba ke nguwa Djesu akapa ubaba wakakura Pedru. (Ru. 22:32; Ju. 21:17; Zvi. 2:14; 8:14-17; 10:44, 45) Muezaniso wa Djesu unopangidza kuti tinodikana kukasika uye tosiya kuti “upakati ne pakati wedu uziikanwe ne munhu wese.”—Afi. 4:5.

Kugara pakati ne pakati kucatibetserawo kugara anhu anokasika kucinja uye kuseenza murunyararo ne anhu ese. Djesu aibata zvakanaka anhu ese zvokuti azondi ake aimupumha kuti “shamwari ye arongosi e musoho uye ashaishi” aitenda masoko ake. (Mt. 11:19) Tingateedzerawo kudini Djesu patinoseenza ne amweni? Louis, hama yakaseenza ke makore akawanda ne anhu akasiyana-siyana eciseenza higana muonereri we nharaunda uye ku Bheteri unoti: “Kandiri kuseenza ne anhu akwanda zvakaita hingana kuwaka ukutira ne mapuwe akasiyana-siyana. I basa guru kuwaka ukuti rausikazi kubenda ne mapuew akadaro, asi zvinobvira kana tikakanda buwe rimwe na rimwe pa mbuto yaro. Ndinoedza kuzviita kuti tiseenze ne runyararo uye takabatana.” Isusu tinodawo kugara anhu akadaro!

Pa nguwa ipi yatinodikana kugara pakati ne pkati ne hama dzedu mu ungano? Tingakwanisa kuzviita patinoseenza ne cikwata cedu ce kuparidzira.Tingaseenza ne aparidzi ane mathunga akasiyana-siyana. Tingakwanisa kuseenza mushobo unoda aparidzi amweni kunyazi kutoparidzawo ne mishobo yese.

ZANO 3: “GADZIRIRAI KUPANA”

Munhu anoda kuseenza zvakanaka ne amweni nde uya “akagadzirira kupana.” (1Ti. 6:18) Nguwa yese Djesu paaisenza na Baba ake kudenga, akawona kuti Djehovha ainga asikaigi zviro. Djehovha “paakagadzira matenga,” uye zviro zvimweni zvese “zvainga zvayo” uye akafunda zvakawanda ne zviro zvaakaona. (Zvie. 8:27) Uye Djesu paainga aa pasi pano, akapawo afundi ake zviro “zvaainga azwa” na Baba ake. (Ju. 15:15) Tingazviitawo ne kupasawo anhu amweni zviya zvatinoziya. Atidikani kusiya kupasawo amweni ruziyo ratinaro tecityira kusiiwa sure. Tinopfara patinopasawo amweni zvetakafunda.

Tingapasawo masoko anobambisa anhu amweni atinoseenza nawo. Amupfari here munhu paanouya kamuri ecimutenda nge zviro zvamakamuitira? Djesu aisimbawo afundi ake. (Ezanisai na Mateu 25:19-23; Ruka 10:17-20.) Djesu akatoti afundi ake aizoita “mabasa makuru” kudarika ake. (Ju. 14:12) Mu usiku asati afa, Djesu akasimba afundi ake akagondeka kuti: “Ndimwi mainga neni pa matambudziko angu.” (Ru. 22:28) Munokwanisa kuona kuti masoko aya akabambisa kudini anarume aya? Awona akazwa simba. Patinosimba anhu atinoseenza nawo, anopfara uye anoseenza zvakanaka.

MUNGASEENZA ZVAKANAKA NE AMWENI

Hama imweni inozwi Kayode yakati: “Mudoni we basa akanaka aadikani kugara munhu akakwana. Asi munhu anopasa amweni mupfaro uye anobetsera amweni pa basa.” Imwimwi munoseenza zvakanaka ne amweni here? Zvakadini kubvunzisa hama ne hanzvadzi dzimweni kuti dzinondionawo kudini? Kana dzecipfara kusenza nemwi, kuitawo hinga afundi aipfararira kuseenza na Djesu, mucazwawo hinga Pauro: “Tinoseenza pamwepo na imwimwi kuti mupfare.”—2Ako. 1:24.