Garai no Maonero a Mwari Ngezve Doro

IMWIMWI munotenda Djehovha nge zvipo zvamakapaswa naye, kutobatanidzawo cisananguro camunaco cokusanangura kuti mungaseenzesa kudini zvipo zvamakapaswa. Maererano no Bhaibheri, vhinyu cipo ca Djehovha. Bhaibheri rinoti: “Pau inoizwa kuti ipase mupfaro, uye vhinyu inoita kuti upenyu upfadze.” (Mup. 10:19; Pis. 104:15) Asi makamboona kuti anhu amweni ano cinetso no doro. Kusiya izvona maererano no nyika kana tsika, anhu ano maonero akasiyana-siyana ngezve doro. Hino cinyi cingabetsera Mukristu kuti aite cisananguro cakanaka cakaringana no doro?

Azvinei no katinogara kana ketakabarirhwa, tinodikana kugonda no nhungamiriro dza Mwari.

Hingana zvamunoona anhu akawanda mu nyika yese anomwisa doro. Amweni anothanda kumwa doro nge ndaa ye kupfadza karinoita. Amweni anomwira kuti akanganwe zvinetso zve upenyu. Mu mbuto dzimweni, munhu unomwisa unoonekwa hingana wakabamba maningi.

Zvinopfadza kuziya kuti Akristu angakwanisa kugonda no Musiki wawo. Ngo muezaniso, Djehovha anoreketa ngezve migumisiro yakashata yokumwisa doro. Pana Zvierengo 23:29-35 tinoerenga ngezve munhu wakararadza uye migumisiro yakashata yakazoonekepo.a Daniel, mukuru we ku Europa, unoedzurira mushobo wainga wakaita upenyu wake asati afunda ngezva Djehovha uye kuseenzesa mazano ake. Iyena unoti: “Inini ndaimwa maningi, uye nge ndaa yazvo ndakaita zvisanaguro zvakashata. Uye migumisiro yakhona aizi kunaka. Nyamasi pandinoima ndorangarira zviro zvekare, ndinotsukwara ndizvo.”

Tingaita kudini zvisananguro zvakanaka ngezve doro kuti tigare no migumisiro yakanaka? Tinodikana kuita kuti marangariro a Mwari atungamirire zvisananguro zvedu.

Ngatione zvinorekethwa no Bhaibheri ngezve doro uye kuti ngei anhu ecimwa doro.

ZVINOREKETHWA NO BHAIBHERI NGEZVE DORO

Bhaibheri aribhui kuti zvakashata kumwa doro no mudida. Irona rinoti kumwa doro kakanaka. Bhaibheri rinoti: “Irhya cokurhya cako no mupfaro uye imwa vhinyu yako no mwoyo unopfara.” (Mup. 9:7) Pamweni paya, Djesu aimwa vhinyu uye aseenzi amweni a Djehovha akatendeka aimwawo vhinyu.—Mat. 26:27-29; Ruka 7:34; 1 Ti. 5:23.

Bhaibheri rinoreketa kuti pano musiyano mukuru we kumwa padoko no kumwisa. Bhaibheri rinoti: “Musararadze ngo vhinyu.” (Aef. 5:18) Uye irona rinoreketa kuti “zvidhakwa . . . aazogari nhaka ye Umambo wa Mwari.” (1 Ako. 6:10) Zvirikupangidza pamhene kuti Djehovha anozonda kumwa doro dakara pakuraradza. Pano kuteedzera zvinoizwa no anhu, isusu tinoita zvisananguro maererano no zvinopfadza Mwari.

Amweni anorangarira kuti anokwanisa kumwa maningi asi asikazoraradzi. Asi izvona zvino ngozi. Bhaibheri rinoti: “Uya unogara muranda we vhinyu” ungakwanisa kuita zvishaishi zvakakura uye otoshaishira Djehovha. (Tito 2:3; Zvie. 20:1) Djesu akatongwadzawo kuti “kumwisa doro” kunopingaidza munhu kuti asapinde mu nyika ipsva ya Mwari. (Ruka 21:34-36) Hino, cinyi cicabetsera Mukristu kuti asasongane no matambudziko anokonzerhwa no doro?

CINYI CINOMUITISAI KUTI MUMWE DORO?

Zvaizonga zvakashata kutendera kuti tsika dzedu uye katakakurira kupfuridzire maonero edu ngezve doro. Hinga Akristu tinoda kuita zvinopfadza Djehovha kutobatanidzawo nyaya dze zve kurhya uye kumwa, kuita izvona kupangidza ungwaru. Bhaibheri rinotiedzurira kuti: “Ngokudaro, kana mecirhya kana mecimwa, kunyazi kana meciita ciro cipi haco, itai zviro zvese kuti Mwari akudzwe.” (1 Ako. 10:31) Rangarirai ngezve mibvunzo no mazano anoteera:

Kodi inini ndinomwa kuitira kuti anhu andipfarire here? Ekisodho 23:2 inoti: “Usateedzere anhu.” Apa tinoona kuti Djehovha, aingwadza Aisraeri kuti ainga asikadikani kuteedzera anhu ainga asikamupurutani. Zano iri, riciri kuseenzawo katiri mazuwa ano. Kana tikatendera kuti anhu apfuridzire marangariro no zvisananguro zvedu ngezve doro, tingakwanisa kusiya Djehovha uye mitemo yake.—Aro. 12:2.

Ndinomwa doro kuti ndipangidze amweni kuti inini ndakabamba here? Mu tsika dzimweni, kumwisa doro zvinoonekwa hingana zvirinane uye zvinotenderhwa. (1 Ped. 4:3) Asi onai zano rakanaka ratinogumira pana 1 Akorinti 16:13 inoti: “Rumbwai makamuka, garai makabamba mu kutenda, rumbwai makashinga, garai no simba.” Kodi doro ringabetseradi munhu kuti agare no simba? Haiwa. Doro rinoita kuti munhu asakwanise kurangarira zvakanaka kunyazi pakuita zvisananguro. Ndiyo ndaa, kukwanisa kumwa doro rakawanda, zvinopangidza kuti tino cinetso. Isaya 28:7 inopanganidza kuti anhu anosiya kuti atungamirirhwe no doro acadzikuwadza.

Simba re zvirokwazvo rinobva kuna Djehovha, uye zvinobatanidza kugara ‘takamuka uye takabamba pakutenda.’ (Pis. 18:32) Isusu tingaita izvona nge kungwarira uye kuita zvisananguro zvicacengetedza ushamwari wedu na Djehovha. Djesu akapangidza simba irona paainga ari pa nyika, uye anhu akawanda aimureremedza ngekuti iyena akapangidza ushingi uye ainga akasanangura kuita zvakanaka.

Kodi ndinomwa kuti nditize zvinetso zvangu here? Mutari we Pisarema wakafemerhwa kutara kuti: “Matambudziko paakandiwandira, imwimwi [Djehovha] makandinyaradza uye makanditeramisa.” (Pis. 94:19) Hino, kana mukadzirhya mwoyo nge ndaa ye dambudziko ripi haro, gondai Djehovha, musagonde doro. Mushobo watingazviita nge we kuita munamato kuna Djehovha. Amweni anopsvaka rubetso re hama dzakakura pakunamata mu ungano uye izvona zvinoabetsera. Kubhuya zvazviri, kumwa kuti tiedze kugadzirisa dambudziko zvingasiya munhu asina simba rokuita zviro zvakanaka. (Oze. 4:11) Daniel, wamborekethwa ngezvake unoti: “Inini ndainetseka nge ndaa yo kudzirhya mwoyo uye no mazwiro ekudzipasa ndaa, hino ndaimwa kuitira kuti ndikwanise kukurira dambudzikoro. Asi matambudziko angu aibambirira uye ndakaruza shamwari dzangu.” Asi cinyi cakabetsera Daniel? Iyena unoenderera mberi eciti: “Ndakaona kuti ndaida rubetso ra Djehovha haiwa rubetso re doro. Pakupedzesera ndakakwanisa kupedza dambudziko rangu.” Kubhuya zvazviri Djehovha akagadzirira kuti atibetse, kunyazi matambudziko akaita hingana tisina pokubuda napo.—Afi. 4:6, 7; 1 Ped. 5:7.

Kana imwimwi munomusambo wekumwa doro, munodikana kudziongorora kuti paripo pamunodikana kuita cinjo pa mamwire amunoita doro. Mungadzibvunzisa kuti: ‘Kodi umwe we mu mhuri yangu kana kuti shamwari ye padhuze yakambopangidza kunetseka nge mushobo wangu we kumwa here?’ Kana akadaira kuti honde, ici cinonga ciri cipangidzo cekuti murikusakurira cinetso camusati maona. ‘Kodi ndiri kunyanya kumwa kudarika mamwire andaiita kare here?’ Munhu uri pamugariro wakadai pamweni aasati ano cido, asi nokuhamba ke nguwa ungatanga kusakurira cido cokumwa. ‘Kodi ndinokwanisa kugara mazuwa manganani kunyazi kutodarika ndisikazi kumwa doro here?’ Kana zvinomushuphira kuzviita, ici cipangidzo cokuti doro ramupindai munyama. Pakadaropo zvirinane kupsvaka rubetso kuna medhiko kuti mukwanise kukunda cinetsoco.

Nge ndaa yo matambudziko angakwanisa kuuya nge kumwa doro, anhu amweni anosanangura kusama kurimwa. Anhu amweni aamwi doro ngekuti aadi kuzwa munuhwi we doro. Zvainga zvakanaka katiri kureremedza cisananguro ce umwe na umwe, ngekutama kuatonga nge cisananguro cawo.

Pamweni imwimwi makasanangura kukanda migano pa mudida we doro ramunoda kumwa. Imwimwi mungaonerera mamwire enyu, pamweni kamwe pa sumana kana kumwa padoko pamunonga mecirhya. Amweni akasangura mushobo we doro raanoda kumwa. Ngo muezaniso, kumwa vhinyu kana serevheja nge mushobo uri pakati no pakati, asi haiwa kumwa doro rakabamba kana doro rakavhenganidzwa. Kana imwimwi mukagadza migano idzi, zvicaita nyore kuzviteerera paya pamunonga mecimwa doro. Mukristu wakakura pakunamata paanokanda migano yakadai, aadikani kupsveruka nge zviya zvicabhuiwa no anhu amweni.

Zvinokoshawo maningi kurangarira zvinorangarirhwa nge amweni. Aroma 14:21 inoti: “Zviri nani kutama kurhya nyama no kumwa vhinyu kana kutama kuita ciro cipi haco cinokuhunyisa hama yako.” Mungaseenzesa kudini zano iri? Ngekupangidza rudo. Kana mukaziya kuti hama imweni yaizokuhunyika kana mukamwa doro, azviripi nani kusama kurimwa kuti musaikuhunyise here? Ngekuita izvona, munonga meci reremedza mazwire e amweni, haiwa zvakamunakira basi.—1 Ako. 10:24.

Kusiya izvona, zvingaita kuti utongi uno mitemo yakaringana no doro, zviri pamhene kuti Mukristu ucapurutana mutemo. Pamweni mitemoyo ingakanda makore e munhu asikadikani kumwa, kana kuti mutemo unorambidza kuseenzesa micini imweni mumasure mekumwa doro.—Aro. 13:1-5.

Djehovha akatipasa cipo cakanakisisa, uye cimwe cakhona nge ce kusanangura maseenzesere atingaita cipoco. Izvona zvinobatanidza zvaticarhya uye zvaticamwa. Zviri pamhene kuti tinotenda nge cipo cekusanangura, uye tinoda kupangidza kutenda kedu nge kuita zvisananguro zvinopfadza Djehovha.