Djehovha ndi “Mupfaro Wedu Mukuru”

1-2. (a) Akawanda nyamasi uno anobatana no mugariro upi? (b) Zvinyi zvaticaona mu fundo ino?

NYAMASI uno akawanda anoita zviri zvese kuti agumire mupfaro, asi kunyazi no kupeta masimba kaanoita aakwanisi kupfara zvezvirokwazvo. Akawanda anobathwa no mazwiro ekuzwa ecishoterhwa no ciro uye kutsukwara. Anhu a Djehovha nyamasi uno, anobatanawo no mazwiro akadaro. Sezvo tiri kurarama “mu mazuwa ekupedzesera” tingaetsera kubatana no zviro “zvinoshupha kushingirira.”—2 Ti. 3:1.

² Mu fundo ino, ticaona kuti cinyi cingakwanisa kutibvisira mupfaro uye cinyi catingaita kuti tigarezve no mupfaro. Asi cokutanga tinodikana kuziya kuti ndiani Manyuko e mupfaro.

MANYUKO E MUPFARO WE ZVIROKWAZVO

3. Zviro zvakasikwa zvinotifundisei ngezva Djehovha? (Onaiwo foto.)

³ Djehovha nguwa dzese anopfara uye iyena anodawo kuti isusu tipfare. Ngokudaro, azvitishamisi kuona mupfaro wake pa zviya zvaakasika, hingana nyika yedu ino yatinayo, kuwanda ke makori akasiyana-siyana anotitenderedza, mushobo unotamba zvinyama uye zvekurhya zvakawanda zvinonaka. Zvezvirokwazvo, Mwari anotida uye anoda kuti isusu tikhorovhere upenyu.

Nzoo idoko: Foto © Romi Gamit/Shutterstock; zviyana zve pinguii: Vladimir Seliverstov/500px via Getty Mafoto; mbudzi: Rita Kochmarjova/stock.adobe.com; howe mbiri dzakakura: georgeclerk/E+ via Getty Mafoto

4. (a) Djehovha anorumbwa kudini ecipfara kunyazi eciona matambudziko mu nyika? (b) I cipo cipi catakapaswa na Djehovha? (Pisarema 16:11)

⁴ Kunyazi Djehovha ndi “Mwari anopfara,” iyena anoziya ngezve marhwadzo uye matambudziko ari kubatana no anhu mu nyika. (1 Ti. 1:11) Asi iyena aasii kuti matambudziko awona apungure mupfaro wake. Iyena anoziya kuti matambudziko aya ngee nguwa doko uye akatogadza nguwa yekuti awona ese apere. Iyena ari kushingirira dakara zuwa raacapedza kutsukwara uye matambudziko ese nokusikaperi. Asi parizvino, Djehovha anozwisisa zvatiri kubatana nazvo uye anoda maningi kutibetsera. Hino, iyena angatibetsera kudini? Nge dii rimweni, iyena anotipasa cipo ce mupfaro. (Erengai Pisarema 16:11.) Ngationei kuti Djehovha akapasa kudini mupfaro Mwana wake, Djesu.

5-6. Ngei Djesu ari kupfara?

⁵ Pa zvisikwa zvese zvakasikwa na Djehovha, Djesu ndiye anopfara maningi. Ngei? Ngationei zvikonzero zviiri. (1) “Iyena ndiye mufanikiso wa Mwari asikaoneki” uye iyena anonyasa kupangidza nge mushobo wakakwana unhu wa Baba ake pa zvese zvaanoita. (Ako. 1:15; 1 Timoti 6:15) (2) Djesu akagara nguwa yakareba maningi na Baba, ekuti ndi Manyuko e mupfaro.

⁶ Djesu anopfara ngekuti nguwa dzese anoita zviya zvaanobvunzwa na Baba ake kuti aite. (Zvie. 8:30, 31; Juau 8:29) Mugumisiro wakhona ngewe kuti Djehovha anodada maningi naye.—Mat. 3:17.

7. Tingagumira kudini mupfaro we zvirokwazvo?

⁷ Isusu tingagumirawo mupfaro we zvirokwazvo nge kukhwedera dhuze na Djehovha, wekuti ndi Manyuko e mupfaro. Patinotora nguwa yakareba tecifundira ngezva Djehovha uye tecimuteedzera, ticanyasa kupfara uyewo tinogara no mupfaro nge kuita kuda kake uye nge kuziya kuti Djehovha anopfara ndizvo.a (Pis. 33:12) Asi zvakadini kana tikatama kugara no mupfaro ke nguwa doko kana kuti kurumbwa tisina mupfaro? Izvona zvinoda kureya kuti atitenderhwi na Mwari here? Haiwa! Isusu tiri anhu asikazi kukwana uye nguwa dzimweni tingatobatana no kurhwadziwa, kugara takatsukwara uye kubatana no dhepresau. Djehovha anozwisisa izvona. (Pis. 103:14) Ngatione kuti cinyi cingakwanisa kutibvisira mupfaro uye kuti cinyi catingaita kuti tigarezve no mupfaro.

MUSATENDERE KUTI CIRO CIPI HACO CIBVISE MUPFARO WENYU

8. Zvinetso zve upenyu zvingatibata-bata kudini?

⁸ Zvinetso zve upenyu. Imwimwi muri kubatana no cinetso ce kuteererhwa, ce tsawana dzinoitika dzega, ce urombo, co nhenda, kana kuti cekucembera here? Tingakwanisa kuruza mupfaro patinobatana no zvinetso izvi, maka-maka zvinetso zviya zvekuti apana catingaita. Bhaibheri rinopangidza pamhene kuti “kurhwadziwa mu mwoyo kunorembesa mwiya.” (Zvie. 15:13) Babis, mukuru umweni we ungano wakafirhwa no hama yake uye abereki ake mukati me makore 4 unoti: “Inini ndakazwa ndiri ndega uye ndakatsukwara maningi. Pamweni paya, ndaizwawo ndakapererhwa ngekuti ndainga ndino zvakawanda zvandaibatana nazvo uye ndainga ndisikagari ke nguwa yakareba no hama yangu uye abereki angu paainga asati afa.” Zvinetso zve upenyu zvingakwanisa kutipedza simba mu mwiri medu uye mu ndangariro.

9. Cinyi cingatibetsera kuti tigarezve no mupfaro? (Djeremiya 29:4-7, 10)

⁹ Cinyi cingatibetsera kuti tigarezve no mupfaro? Tingagarazve no mupfaro kana tikaima kunetseka no zviya zvatisikakwanisi kucinja uye tokhorovhera zviya zvatinazvo. Nyika inoitisa kuti anhu arangarire kuti upenyu wawo unodikana kugara wakakwana kuti apfare, asi izvona azvirokwazvopi. Ngo muezaniso, Djehovha akabvunza Adjudha ekuti ainga ari kuutaphwa ku Bhabhironi kuti atendere mushobo wawo mupsva we kurarama ku nyika yainga isiripi yawo uye kupasa zvakanakisisa zvawo pa mugariro uwona unoshupha. (Erengai Djeremiya 29:4-7, 10.) Tingafundei? Edzai kutenda mugariro wenyu uye pangidzai kuti munotenda ngo zviro zvakanaka zvamunazvo mu upenyu wenyu. Edzurirai kuti Djehovha acamubetserai nguwa dzese. (Pis. 63:7; 146:5) Effie, wakabatana no tsawana yekuti yakamukuwadza maningi, unobhuya kuti: “Ndakatambira rubetso rakakura maningi ra Djehovha, ro mhuri yangu uye ro ungano. Hino, ndinoda kupangidza kuti ndinotenda pa zviya zvaakandiitira. Ndiyo ndaa, ndinoita zviri zvese kuti ndigare ndakapfara.”

10. Ngei tingapfara kunyazi tecibatana no matambudziko?

¹⁰ Kunyazi tecibatana no matambudziko anoshupha maningi kana kuti ku anyaukama edu, tingakwanisa kupfara.b (Pis. 126:5) Ngei? Ngekuti mupfaro wedu autsamiri pa mugariro watiri. Maria, mupiyonera umweni, unoti: “Pamunobatana no zvinetso, kugara no mupfaro azvidi kureya kuti amuripi kurhwadziwa no zvamuri kubatana nazvo. Pane kudaro, zvinoda kureya kuti imwimwi amuripi kukanganwa zvipikirhwa zva Djehovha. Baba edu acatibetsera kudziirira mupfaro wedu.” Edzurirai kuti azvinei nokushupha kuri kuita matambudziko edu zvino, awona ngee nguwa doko, akaita hingana kutsika katinoita pa praya. Nokukasika, Djehovha acapedza zvese zvinokonzera matambudziko.

11. Muezaniso we muphostori Pauro unomubambisai kudini?

¹¹ Zvakadini kana tikatanga kurangarira kuti zvinetso zvedu zviri kuitika ngo ndaa yekuti aticaripi kutenderhwa na Djehovha. Zvinokosha maningi kurangarira ngezve aseenzi akagondeka a Djehovha akabatana no mugariro unoshupha. Onai muezaniso we muphostori Pauro. Iyena wakasanangurhwa na Djesu kamare kuti aendese cokwadi “ku madzinza amweni, ku madzimambo uye ku ana e Israeri.” (Zvii. 9:15) Aya ainga ari makomborero akakura maningi! Kunyazi zvakadaro, upenyu wa Pauro wainga wakadzara no matambudziko. (2 Ako. 11:23-27) Matambudziko a Pauro aida kureya here kuti iyena wainga asikacatenderhwi na Djehovha here? Haiwa! Ngokudaro kushingirira kaiita, kaipangidza kuti iyena wainga ano makomborero a Djehovha. (Aro. 5:3-5) Pari zvino, rangarirai ngezve mugariro wenyu. Zvingaita kuti imwimwi muri kushingirira makagondeka kunyazi no miedzo yamuri kubatana nayo. Hino, imwimwi mungagarawo no rugondo rekuti munotenderhwa na Djehovha.

12. Zviro zvataietsera zvisikazi kuitika, zvingadusa kudini mupfaro wedu?

¹² Zviro zvataietsera zvisikazi kuitika. (Zvie. 13:12) Rudo redu uye kutenda katinoita Djehovha kunotiitisa kuti tigadze zvinangwa mu basa rake. Asi kana tikagadza zvinangwa zvisikapindirani no mugariro wedu, tingakwanisa kuora mwoyo. (Zvie. 17:22) Mupiyonero umweni unozwi Holly, unoti: “Inini ndaida kupinda Cikora ce Aziisi e Umambo, kuseenza ku nyika imweni uye kuseenza ku projecto ye kuwaka ku Ramapo. Asi migariro yangu yakacinja uye inini andizozi kukwanisazve kugumira zvinangwa zvangu, ndakaora mwoyo. Zvinorhwadza maningi kana imwimwi mecida kuita ciro uye mokonerhwa kuciita.” Akawanda anobatana no mazwiro awona.

13. Kana mugariro wedu weciitisa kuti tisasanangure zvinangwa zvinganani, zvinangwa zvipi zvatingagadza?

¹³ Zvinyi zvatingaita kuti tigarezve no mupfaro? Edzurirai kuti Djehovha aatikumbiri zvakawanda. Iyena aaetseri kuti tiite zviya zvatisikakwanisi uye kukosha katinoita kaari akutsamiri pa zviya zvatingakwanisa kuita mu basa rake. Djehovha anoda kuti tigare anhu akatendeka uye anhu akagondeka. (Mik. 6:8; 1 Ako. 4:2) Djehovha anokoshesa maningi zvatiri ngecemukati kudarika zviya zvatinoita mu basa rake. Hino, zvaizonga zvakanaka here katiri kuetsere kuti tiite zvakawanda kudarika zvinoetserhwa ndi Djehovha kuti tiite?c Haiwa. Hino, kana mugariro wenyu usikatenderi kuita zvakawanda mu basa ra Djehovha, edzai kukanda ndangariro dzenyu pazviya zvamunokwanisa kuita. Ngo muezaniso, mungakwanisa kurowedza madjaha kana kubetsera uye kubambisa aya akura pa thunga. Mungaita here cinangwa ce kukohomedzesa munhu hope no hope mu terefone kana kuti kutotara mensaji here? Djehovha acamukomborerai no mupfaro pamunonga mecipeta masimba kuti mukwanise kugumira zvinangwa izvi zvinobvira! Uye edzurirai kuti nokukasika ticagara no mikana mu nyika ipsva ya Djehovha yekumuseenzera nge mushobo wekuti atisati tamborangarira. Holly wambobhuiwa nge zvake unoti: “Inini ndinogara uye ndorangarira kuti ‘ndicararama nokusikaperi.’ No rubetso ra Djehovha, ndingakwanisa kudzadzisa zvinangwa zvangu.”

14. Cinyi cingatibvisirazve mupfaro wedu?

¹⁴ Kudzipfadza. Anganani anoseenzesa mamidhiya kuti aitise kuti anhu arangarire kuti mupfaro we zvirokwazvo unouya kana tikadzipfadza isusu pacedu. Anhu ari kukohomedzeswa kuti aite zviro zvakaita hingana, kuwaraidzwa, kutenga uye kuita rhwendo pasina cikonzero. Azvizi kushata kuita zviro izvona. Djehovha akatisika kuti tikhorovhere zviro zvakarungama zvaakasika. Hino, akawanda akazwisisa kuti zvaairangarira kuti zvaizoaunzisira mupfaro zvezvirokwazvo zvakaatorera mupfaro. Evha, mupiyonera umweni unoti: “Kana tikandoedza kudzipfadza pacedu kamare nguwa dzese, ticatsukwara uye tocinyuka.”

15. Tinofundei ngezva Mambo Soromoni?

¹⁵ Tingakwanisa kufunda no zviya zvakaitika na Mambo Soromoni. Iyena wakaita zviri zvese kuti adzipfadze, asi wakagara no mugumisiro unotsukwarisa. Iyena wakaedza kuona mupfaro ngo kugutsa zvido zvake, hingana kurhya zviro zvinonaka, kupurutana ngoma dzakanaka uye zviro zvese zvakanaka zvaaizoda kutenga mu nguwa yake. Asi izvona zvainga zvisikamupfadzi. Iyena wakati: “Dziso arigutswi no zvarinoona; uye nzee airembi nokuzwa.” (Mup. 1:8; 2:1-11) Anhu anganani anorangarira kuti akagara no mare otenga zviro zvaanoda, acapfara. Asi izvona kunyepa. Zviro izvi azvizounzisi mupfaro we zvirokwazvo.

16. Kupasa amweni zvatinazvo, kungatibetsera kudini kugarazve no mupfaro? (Onaiwo foto.)

¹⁶ Cinyi cingatibetsera kuti tigarezve no mupfaro? Djesu akatifundisa kuti: “Kupasa kuno mupfaro kudarika kutambira.” (Zvii. 20:35) Mukuru umweni unozwi Alekos, unoti: “Inini ndinokanda ndangariro dzangu pakuitira amweni zviro. Pandinoabetsera, andikandi ndangariro dzangu pa zviya zvandinoda uye izvona zvinondipfadza.” Zvinyi zvamungaitirawo amweni? Ngo muezaniso, pamunoona munhu akatsukwara, edzai kumubambisa. Pamweni imwimwi amukwanisi kugadzirisa zvinetso zvake, asi mungakwanisa kumunyaradza nge kumupurutana no usisi, kumuzwisisa uye kumuedzurira kuti akhandire zvese zvinomushupha kuna Djehovha. (Pis. 55:22; 68:19) Imwimwi mungakwanisa kumubetsera kuti azwisise kuti Djehovha aazi kumusiya. (Pis. 37:28; Isa. 59:1) Imwimwi mungakwanisa kutodzipira pakumuitira zviro zvakaita hingana kumubikira kana kutopasiyari naye. Mungakwanisa kumupika kuti muparidzire naye, kubhuya no amweni masoko akanaka nguwa dzese kunotipfadza. Siyai kuti Djehovha amuseenzesei kuti mubambise amweni. Kukanda ndangariro dzedu ku amweni pane kurangarira nge zvedu basi, zvinotipasa mupfaro wakakura.—Zvie. 11:25.

17. Kana tecida kugara no mupfaro we zvirokwazvo, zvinyi zvatinodikana kuita? (Pisarema 43:4)

¹⁷ Isusu tingagara no mupfaro we zvirokwazvo kana tikakhwedera dhuze na Baba edu ekudenga. Bhaibheri rinotigondesa kuti Djehovha ndi ‘mupfaro wedu mukuru.’ (Erengai Pisarema 43:4.) Ngokudaro, azvinei no zvatiri kubatana nazvo mu upenyu, isusu tingazwa takacengeteka. Hino, tingakanda ndangariro dzedu kuna Djehovha, wekuti ndi Manyuko we mupfaro usikaperi.—Pis. 144:15.