Itirai Amweni Munamato Nguwa Dzese

1. Tingaziya kudini kuti minamato yedu inokosha kuna Djehovha?

MUNAMATO i cipo cinokosha. Rangarirai zvinoteera: Djehovha akapasa ngirozi mabasa manganani. (Pis. 91:11) Iyena akapasawo Mwana wake mabasa anokosha. (Mat. 28:18) Asi kodi iyena akagadza munhu kuti aite basa rekuzwa minamato here? Haiwa, iyena ndi “Muzwi we munamato.” (Pis. 65:2) Iyena kamare ndiye anotizwa paya patinoita munamato.

2. Ngei Pauro wakagara muezaniso wakanaka we kuitira munamato amweni?

² Tingazwa takasudzunuka kubhuya na Djehovha zvese zviya zvinotishupha, asi tinodikanawo kuitira munamato amweni. Muphostoro Pauro wakagara muezaniso wakanaka pakuita izvona. Ngo muezaniso, iyena wakatara ku ungano ye Aefeso kuti: “Ndinoreketa nge zvenyu mu minamato yangu nguwa dzese.” (Aef. 1:16) Pauro waiitirawo munamato amweni. Ngo muezaniso, iyena wakabvunza Timoti kuti: “Ndinotenda Mwari, . . . ndisikakukanganwi pandinoita munamato we kudeketera usiku no masikati.” (2 Ti. 1:3) Upenyu wa Pauro wainga usiripi nyore, iyena wainga ano matambudziko uye wainamata nge zvazvo. (2 Ako. 11:23; 12:7, 8) Kunyazi zvakadaro, iyena waidusawo nguwa kuti abhuyewo ngezve amweni pa minamato.

3. Ngei tinopedzesera takanganwa kuitira munamato amweni?

³ Pamweni paya tingakanganwa kuitira munamato anhu amweni. Ngei izvona zveciitika? Hanzvadzi imweni inozwi Sabrinaa inobhuya cikonzero cakhona. Iyona inoti: “Tinogara takabatikana maningi mu upenyu. Tingakwanisa kugara takabatikana no matambudziko edu, topedzesera taita munamato nge zvedu kamare uye ngezve zvinetso zvedu.” Kodi izvona zvinosooitikawo kamuri? Kana zveciitika, fundo ino icamubetserai, (1) kufunda kuti ngei zvecikosha kuitira munamato amweni uye (2) kuona mazano manganani ekuti tingazviita kudini.

NGEI TECIDIKANA KUITIRA MUNAMATO AMWENI?

4-5. Minamato yatinoitira amweni ingagara kudini no “simba rakakura”? (Tiyago 5:16)

⁴ Kuitira munamato amweni kuno “simba rakakura.” (Erengai Tiyago 5:16.) Minamato yedu ino simba re kucinja zvicaitika mu upenyu we munhu. Djesu aiziya kuti munamato ungakwanisa kucinja upenyu we munhu. Eciziya kuti muphostori Pedru waizomuramba, Djesu akati: “Ndinorumbwa ndecikuitira munamato we kudeketera kuti kutenda kako kusarembe.” (Ruka 22:32) Pauro waiziyawo kuti minamato dzino simba rakakura. Paainga akasungwa zvisina unatsi ku Roma, iyena wakatarira Firimoni kuti: “Ndino kariro yekuti ne minamato yenyu, ndicazohwirinzwa kamuri.” (Firi. 22) Uye ndizvona kamare zvakaitika, mumasure me cinguwa, Pauro wakabudiswa mu kadheya uye wakatangazve kuita basa rake re kuparidzira.

⁵ Zviri pamhene kuti izvi azvidi kureya kuti minamato yedu ingabambidzira Djehovha kuti aite zviro zvaasikadi kuita. Djehovha anoona zviya zvinobatana no aseenzi ake uye nguwa dzimweni anosanangura kuita zviya zvaanokumbira. Kuziya izvona, kunotibetsera kuita munamato no mwoyo wese kuna Djehovha ngezve mugariro watiri kubatana nawo uye kumugonda, tecisiya zvese mu nyara dzake.—Pis. 37:5; onai 2 Akorinti 1:11.

6. Maerenano no miezaniso, cinyi cinoitika kana tikaitira amweni munamato? (1 Pedru 3:8)

⁶ Kuitira munamato amweni kunotibetsera kuti ‘tizwirane usisi.’ (Erengai 1 Pedru 3:8.) Munhu uno usisi unonyasa kuzwisisa ngezve matambudziko e amweni uye unoita ciito kuti amunyaradze pa matambudziko aari kusongana nawo. (Mark. 1:40, 41) Kunamata ngezve amweni kunounzisa makomborero akawanda. Ngo muezaniso, mukuru umweni unozwi Michael unoti: “Pandinonamata ngezve zviro zvinodiwa no amweni, inini ndinonyasa kuzwisisa matambudziko aari kubatana nawo uye izvona zvinotunhudzira rudo rangu kaari. Inini ndinozwa ndiri dhuze nawo, kunyazi pamweni awona asikatozvizii.” Mukuru umweni we ungano unozwi Richard, unoti: “Kana tikanamata ngezve umweni tinozwa cido cakakura cekuda kuita ciito kuti timubetsere uye kana tikaita ciro kuti tibetsere munhu iyena, nge mushobo uwona tinogara dii re mhinduro ye munamato uwona.”

7. Kuitira amweni minamato kunotibetsera kudini kuona zvinetso zvedu nge mushobo uri pakati no pakati? (Afiripi 2:3, 4) (Onaiwo mafoto.)

⁷ Kunamata ngezve amweni, zvinotibetsera kuona matambudziko edu ngo mushobo uri pakati no pakati. (Erengai Afiripi 2:3, 4.) Tiri kurarama mu nyika iri kuonererhwa na Sathani, ndiyo ndaa tese isusu tinobatana no matambudziko. (1 Juau 5:19; Zvak. 12:12) Kugara no musambo we kunamata ngezve amweni zvinotiedzurira kuti ‘matambudziko atiri kubatana nawo ari kubatanawo no hama dzedu.’ (1 Ped. 5:9) Mupiyonera umweni unozwi Katherine unoti: “Kunamata ngezve amweni, zvinondiedzurira kuti andinipi ndega ndiri kubatana no matambudziko. Izvona zvinondibetsera kuti ndisanyanye kukanda ndangariro dzangu pa zvinetso zvandiri kubatana nazvo.”

AWONA ANODA MINAMATO YEDU

8. Anhu api atinodikana kubatanidza pa minamato yedu?

⁸ Tingabatanidza ani pa munamato yedu? Tingaitira minamato anhu akasiyana-siyana. Ngo muezaniso, tingaitira munamato aya ari kubatana no cinetso ce uthongo, madjaha ari kubatana no kubambidzirhwa ku cikora kana kuti aya ari kubatana no zvinetso ngo ndaa ye kucembera. Akawanda e hama dzedu ari kubatana no kuphikiswa mu mhuri kana kuti no anyautongi. (Mat. 10:18, 36; Zvii. 12:5) Ngo ndaa ye mabongozozo e zvematongerhwe e nyika, anganani e hama dzedu akasiya nyumba dzawo. Amweni ari kutambudzika ngo ndaa ye tsawana dzinoitika dzoga. Zvingaita kuti pamweni atizii hama no hanzvadzi idzona hope no hope. Asi kana tikaita munamato nge zvadzo, tinopangidza kuti tiri kuzwira mutemo wa Djesu wekuti “dananai.”—Juau 13:34.

9. Ngei tecidikana kuitira minamato aya ari kutungamirira sangano ra Djehovha, pamwepo ne akadzi awo?

⁹ Tingaitirawo munamato aya ari kutungamirira mu sangano ra Djehovha. Izvona zvinobatanidzawo hama dzinoseenza hingana Nhengo dze Dare Rinotungamirira no abetseri awo, Nhengo dze Dare ro Firiyari, aonereri e mu mafiriyari, aonereri e nharaunda, akuru e ungano uye abati anoseenzera. Hama idzona dzinoseenza no simba kuti dziticengete uye akawanda adzo anotorhwisanawo no kudzirhya mwoyo. (2 Ako. 12:15) Ngo muezaniso, muonereri umweni we nharaunda unozwi Mark unoti: “Cimwe ce cinetso cakakura candakabatana naco ngece kugara kure no abereki angu. Awona akura uye ano cinetso ce uthongo. Inini ndinozviziya kuti yaya angu na mwaramu angu ari kuacengeta zvakanaka. Asi zvinondirhwadza kuti andikwanisi kuita zvakawanda kuti ndiabetsere.” Ainguwapi yese yekuti tinoziya zvinetso zviri kubatana no hama idzi, asi zvakanaka maningi kuabatanidzawo pa minamato yedu. (1 Ate. 5:12, 13) Uyewo tingatobatanidzawo akadzi awo pa minamato yedu, ngekuti rudo rakagondeka re hanzvadzi idzi rinoita kuti hamedzo dzirumbwe dzeciita mabasa adzo.

10-11. Tinoziya kudini kuti minamato yedu inobatanidza hama no hanzvadzi dzakawanda hingana cikwata, inopfadza Djehovha? Panganidzai.

¹⁰ Hinga zvataona, zvakadjairika kuitirawo hama no hanzvadzi dzedu munamato hinga cikwata. Ngo muezaniso, kunyazi hazvo tisina munhu watinoziya mundangariro medu, nguwa dzimweni tinonamata kuna Djehovha kuti abetsere aya ari mu makadheya kana kuti aya akafirhwa no munhu waanoda. Mukuru umweni we ungano unozwi Donald unoti: “Tino hama no hanzvadzi dzakawanda dziri kubatana no matambudziko, zvekuti nguwa dzimweni tinoita munamato tecidzibatanidza dzese, tecikumbira Djehovha kuti abetsere aya ese ari kushuphika.”

¹¹ Kodi minamato yedu inopfadza Djehovha here? Zviri pamhene kuti honde! Isusu atizii zviri kudiwa kamare no hama uye hanzvadzi dzedu. Hino azvizi kushata kuita munamto tecidzibatanidza dzese. (Juau 17:20; Aef. 6:18) Minamato iyona inopangidza kuti ‘tinoda hama dze mu nyika yese.’—1 Ped. 2:17.

ITAI MUNAMATO KU MUNHU UMWE NA UMWE

12. Cinyi cinoitika pa minamato yedu kana tikagara anhu anoongorora?

¹² Garai anoongorora. Pane kuitira munamato hama no hanzvadzi hingana cikwata, itaiwo munamato ku munhu umwe na umwe. Mu ungano menyu muno munhu uri kurhwisana no nhenda inoshupha kurapa here? Kodi muno mudjaha wakaora mwoyo pamweni nge ndaa ye kubambidzirhwa kaari kusongana nako ku cikora here? Pane hama kana kuti hanzvadzi yamunoziya iri kupeta masimba pakurera ana iri yoga ‘yeciafundisa maererano no zvinodiwa na Djehovha’ here? (Aef. 6:4) Kana mukagara anoongorora, imwimwi mucakwanisa kupangidzira usisi amweni uye izvona zvicamuitisai kuti muitire munamato munhu umwe na umwe.b—Aro. 12:15.

13. Cinyi cinotibetsera kuti tibhuye mazina e anhu aya atisikazii hope no hope paya patinoita munamato?

¹³ Itirai munamato hama mecibhuya zina rayo. Tingakwanisa kuita izvona kunyazi no hama kana hanzvadzi dzatisikazii hope no hope. Ngo muezaniso, hama no hanzvadzi dzakawanda dze ku Cingapura, ku Crimeia, Eritreia uye ku Rússia dzakasungwa. Mu saiti jw.org, tinokwanisa kugumira mundandanda we mazina e hama no hanzvadzi idzi.c Muonereri umweni we nharaunda unozwi Brian unoti: “Ndakazwisisa kuti kutara zina re hama yakasungwa uye mumasure mazvo kureketa zina rayo no izwi rinozika, kunondibetsera kuti ndiedzurire ngezve hama iyona uye ndiibatanidzewo mu minamato yangu.”

14-15. Cinyi cinotibetsera kuti tiite cikumbiro cakananga patinoita minamato yedu?

¹⁴ Itai munamato wakananga. Michael wambopanganidzwa unopasa zano rinoteera, iyena unoti: “Pandinoerenga maesperiensiya e hama no hanzvadzi dzakasungwa mu jw.org ndinoedza kurangaridza kuti ndaizozwa kudini kudai ndini ndiri pa mbuto pawo. Zvezvirokwazvo, inini ndaizonetseka ngo ndaa ye mukadzi wangu uye ndaizoda kuti paoneke munhu unomucengeta. Izvona zvinondibetsera kureketa zviro zvakananga paya pandinoita munamato ngezve hama kana hanzvadzi dzakawaka uye kuwakwa dziri mukadheya.”—Aheb. 13:3, masoko e masi.

¹⁵ Kuedza kurangaridza kuti hama dzedu dzakasungwa dzinoswera kudini zuwa no zuwa, zvingakwanisa kutibetsera kuti tirekete zviro zvakananga pa minamato yedu. Ngo muezaniso, tingakwanisa kukumbira kuti aya anocengeta hama dzedu dzakasungwa adzibate zvakanaka uyewo tingakumbira kuti anyautongi atendere kuti hama dzedu dzinamate Djehovha dzakasudzunuka. (1 Ti. 2:1, 2) Uyewo tingaita munamato kuti muezaniso we hama idzi dzakatendeka ubambise ungano iri dhuze no kaanogara uye kuti anhu asikaseenzeri Djehovha aone muezaniso wadzo wakanaka uye asanangure kuzwa masoko awo. (1 Ped. 2:12) Zviri pamhene kuti mazano awona anoseenzawo paya patinoita munamato ku hama no hanzvadzi dziri kusonganawo no matambudziko amweni. Kana tikagara anhu anoongorora, tobhuya zina ro hama uye toita cikumbiro cakananga, tinopangidza kuti mwoyo wedu wakadzara no “rudo ku umwe na umwe” wedu. —1 Ate. 3:12.

GARAI NO MAONERO ARI PAKATI NO PAKATI NGEZVE MINAMATO YENYU

16. Maonero api ari pakati no pakati atinodikana kugara nawo ngezve minamato yedu? (Mateu 6:8)

¹⁶ Hingana zvataona, minamato yedu inokwanisa kucinja zvicazoitika ku munhu. Asi tinodikana kugara no maonero ari pakati no pakati ngezve minamato yedu. Patinoita minamato, atiripi kupanganidzira Djehovha zviro zvekuti iyena aazvizii uye iyenawo aadi mazano edu kuti asanangure mushobo wakanaka we kugadzirisa nyaya. Munhu asati aakutoziya kamare zviya zvaanoda kana kuti isusu tisati tazviziya, Djehovha anonga aakutoziya zviro zvinodikanwa no munhu iyena. (Erengai Mateu 6:8.) Hino, ngei tecidikana kuitira munamato amweni? Kusiya zvikonzero zvataona, kuitira munamato amweni i mushobo we kupangidza rudo. Uye Djehovha anopfara paanoona aseenzi ake ecimuteedzera pakupangidzira rudo.

17-18. Muezaniso upi unotibetsera kugara no maonero ari pakati no pakati ngezve minamato yedu?

¹⁷ Pamweni paya, zvingaita hingana kuti minamato yedu airipi kucinja ciro. Kunyazi zvakadaro, iyona inopangidza rudo ratinaro ku hama no hanzvadzi dzedu uye Djehovha anonyasa kuona izvona. Kuti tiezanisire: Rangaridzai ngezve mhuri ino ana airi, murumbwana no musikana. Murumbwanewo uri kurhwara maningi. Asi musikanewo unodeketerera baba akhona eciti: “Ndapota, itai ciito kuti mubetsere hama yangu. Iyona iri kurhwara maningi!” Babewo aakuonerera zvese uye awona anoda mwana wawo we murumbwa. Uye ari kuita zvese kuti amucengete, asi rangaridzai kuti babewo anopfara kudini nge kuona kuti mwana wawo we musikana uri kupangidza kuti unokoshesa maningi hama yake, dakara pa kuguma pa danho re kudeketerera kuti baba amubetsere.

¹⁸ Djehovha anotikohomedzesa kuti tiitewo izvona. Iyena anoda kuti tirangaridzewo amweni uye tiaitirewo munamato. Patinoita izvona, atipangidziri kuti tinondodzirangarira basi, asi tinoda hama no hanzvadzi dzedu zvinobva pa mwoyo. Djehovha anoona zvatinoita. (2 Ate. 1:3; Aheb. 6:10) Hingana zvataona, pa migariro imweni, minamato yedu ingacinja zviya zvaizoitika mu upenyu we munhu umweni. Hino, ngatisambokanganwe kuitira amweni munamato.