Sanangurai Kunamata Mwari

1, 2. Mubvunzo upi wamunodikana kudziita, uye ngei wecidikanwa maningi?

NGOKUFUNDA kamuri kuita Bhaibheri, maakuziya kuti anhu akawanda anorangarira kuti anonamata Mwari, asi ngo dii rimweni anofundisa kana kuita zviro zvaanozonda. (2 Akorinti 6:17) Ndiyo ndaa Djehovha anotibvunza kuti tibude mu magereja ekunyepa, “Bhabhironi Guru.” (Zvakapangidzwa 18:2, 4) Hino mucaitei? Umwe no umwe wedu anodikana kusanangura zvokuita, uye tinodikana kudzibvunzisa kuti, ‘Ndinoda kunamata Mwari ngo mushobo waanoda here, kana kuti ndinoda kumunamata ngo mushobo wandakadjaira?’

² Kana makatobuda kare mu gereja rekunyepa, makaita zvakanaka. Asi mungadaro mucine maitiro ne tsika dze magereja ekunyepa dzamuciri kupfarira. Ngatimborekete dzimweni dzakhona toona kuti ngei zvakanaka maningi kudziona ngo mushobo unodziita Djehovha.

KUNAMATA MIFANIKISO NO MADZITSEKURU

3. (a) Ngei zvecishupha kune anhu amweni kusiya kuseenzesa mifanikiso pakunamata Mwari? (b) Bhaibheri rinobhuyei nge ndaa yekuseenzesa mifanikiso pakunamata Mwari?

³ Anhu amweni aane makore eciseenzesa mifanikiso kana kuti mbuto dzokudira pa nyumba pawo kuti anamate Mwari. Kudai kuti mainga mecizviitawo, pamweni mungaona hingana azvina musoro kana zvisikaiti kunamata Mwari musikaseenzesi zviro izvona. Asi edzurirai kuti Djehovha ndiye anotifundisa manamatirhwe aanoda. Uye Bhaibheri rinopangidza pamhene kuti Djehovha aadi kuti tiseenzese mifanikiso pakumunamata.—Erengai Ekisodho 20:4, 5; Pisarema 115:4-8; Isaya 42:8; 1 Juau 5:21.

4. (a) Ngei atidikani kunamata Adzimu? (b) Ngei Djehovha akarambidza aIsraeri kuedza kureketa no akafa?

⁴ Anhu amweni anopedza mare yakawanda ne simba rawo eciedza kupfadza adzimu. Anotoguma pakuanamata. Asi takafunda kuti akafa aakwanisi kutibetsera kana kutikuwadza. Akuna kaaciri kurarama. Zvino ngozi kuedza kureketa nawo ngokuti masoko ese anoita hingana ari kubva kaari zve zvirokwazvo anonga ecibva kuno madhimoni. Ndiyo ndaa Djehovha akabvunza aIsraeri kuti asaedze kureketa ne akafa kana kubatanidzwa mu zviro zvimweniwo zvino cokuita ne zvecidhimoni.—Dheuteronomiyo 18:10-12; onai pakazwi Nyasai Kuzwisisa n.º 24 no 29.

5. Cinyi cingamubetserai kuti musiye mifanikiso pakunamata Mwari kana kuti musiye kunamata adzimu?

⁵ Cinyi cingamubetserai kuti musiye mifanikiso pakunamata Mwari kana kuti musiye kunamata adzimu? Munodikana kuerenga Bhaibheri monyasa kurangarira kuti Djehovha anoona kudini zviro izvona. Djehovha anozviona hinga “zvinonyanyasa,” kana zvinonyangadza. (Dheuteronomiyo 27:15) Namatai kuna Djehovha mazuwa ese kuti amubetserei kuzviona hinga mushobo waanozviita uye kuti amubetserei kuti mumunamate ngo mushobo waanoda. (Isaya 55:9) Garai henyu no rugondo rokuti Djehovha acamupasai simba ramunoda kuti mubvise mu upenyu wenyu zviro zvese zvino cokuita no kunamata kokunyepa.

TINODIKANA KURHYA KHISIMISI HERE?

6. Ngei tsiku ye 25 ye mwedzi wa Mbudzi yakasanangurhwa kuti igare tsiku yekucengeta kubarhwa ka Djesu?

⁶ Mu nyika yese, Khisimisi izuwa rokuzorora rinozikanwa maningi, uye anhu akawanda anorangarira kuti i zuwa rokuita mabiko kuitira kubarhwa ka Djesu. Asi Khisimisi yakabatana no kunamata kokunyepa. Bhuku rimweni re Encyclopedia rinopanganidza kuti mu tsiku ye 25 ye mwedzi wa Mbudzi, mahedheni e Roma aiita mabiko e kubarhwa ke zuwa. Atungamiriri e magereja aida kuti mahedeni akawanda agare maKristu, ndiyo ndaa kuti kunyazi hazvo Djesu aazi kubarhwa mu tsiku ye 25 ye mwedzi wa Mbudzi, akasanangura kucengeta zuwa irona hinga zuwa rakabarhwa Djesu. (Ruka 2:8-12) Afundi a Djesu ainga asikacengeti Khisimisi. Bhuku rimweni rinopanganidza kuti masure me makore 200 Djesu abarhwa kare, “apana aiziya tsiku yakabarhwa Djesu kamare uye anhu padoko basi ainga ano basa nayo.” (Sacred Origins of Profound Things) Kurhya Khisimisi kakazotanga mumasure me makore akawanda Djesu asisipo pa nyika.

7. Ngei maKristu e zvirokwazvo asikarhyi Khisimisi?

⁷ Anhu akawanda anoziya matangire akaita Khisimisi no zvese zvinoizwa pa zuwa irona zvakadai hingana mabiko no kupasana zvipo. Ngo muezaniso, ku Inglaterra no mbuto dzimweni dze America, pano makore amweni zvairambidzwa kurhya Khisimisi nge ndaa yekuti yakatangwa ne mahedheni. Munhu wese aiicengeta aiphanicwa. Asi no kuhamba ke nguwa anhu akazotangazve kurhya Khisimisi. Ngei maKristu e zvirokwazvo asikarhyi Khisimisi? Ngokuti anoda kupfadza Djehovha pa zviro zvese zvaanoita.

TINODIKANA KUITA MABIKO E MAZUWA EKUBARHWA HERE?

8, 9. Ngei maKristu okutanga ainga asikacengeti mazuwa okubarhwa?

⁸ Zuwa rimweni rinonyanya kucengethwa no anhu akawanda izuwa rokubarhwa kawo. MaKristu anodikana kucengeta mazuwa okubarhwa here? Mabiko e mazuwa okubarhwa anorekethwa mu Bhaibheri akaizwa ngo anhu ainga asikanamati Djehovha. (Genesi 40:20; Marko 6:21) Kucengeta mazuwa okubarhwa kaiitirhwa kureremedza madzimwari ekunyepa. Ndiyo ndaa maKristu okutanga “aiona kucengeta mazuwa okubarhwa hinga tsika yecihedheni.”—The World Book Encyclopedia.

⁹ Aroma no Magedegu okare aitenda kuti panobarhwa munhu panonga pane mwiya uripo uye kuti ndiwo unozocengeta munhuwo ko upenyu wake wese. Bhuku rimweni rinozwi The Lore of Birthdays rinoti: “Mwiya uwona wainga uno ushamwari usikazwisisiki na mwari ane zuwa rekubarhwa rakatodzana ne rakabarhwa munhuwo.”

10. Ngei maKristu e mazuwa ano asikadikani kucengeta mazuwa okubarhwa?

¹⁰ Munorangarira kuti Djehovha anotendera kamare mabiko akabatana no kunamata kokunyepa? (Isaya 65:11, 12) Haiwa, aamboatenderi. Ndiyo ndaa, tisikacengeti mazuwa okubarhwa kana kuzorora kwese kwakabatana no kunamata kokunyepa.

ZVINO BASA HERE KUZIYA PAZVAKATANGIRA?

11. Ngei anhu amweni anondorumbwa ecicengeta mazororo? Cinyi camunodikana kunyasa kureremedza?

¹¹ Anhu amweni anoziya kuti Khisimisi no mazororo amweni zvakatangira mu magereja ecihedheni, kunyazi zvakadaro anondorumbwa ecizvicengeta. Anoona mazororo hinga mukana wakanaka okumbopfarawo no mhuri yawo. Ndizvo zvamunorangarirawo here? Azvizi kushata kutora nguwa mecimbopfara ne mhuri yenyu. Djehovha musiki we mhuri anoda kuti mhuri ipfare uye ibatane. (Aefeso 3:14, 15) Asi tinodikana kunyasa kureremedza ushamwari wedu na Djehovha pane kuda kupfadza hama dzedu ngo kucengeta mazororo akabva ku magereja ekunyepa. Ndiyo ndaa mu aphostori Pauro akati: “Garai mecipsvaka kuziya zvinodiwa na Tenzi.”—Aefeso 5:10.

12. Mazororo api asikatenderhwi na Djehovha?

¹² Anhu akawanda aana basa no matangire akaita mazororo, asi andiopi maonero anoita Djehovha. Aatenderi mazororo akabva ku magereja ekunyepa, anokudza anhu kana nyika. Ngo muezaniso, maEdjipitu ainga ano mabiko akawanda aiitirhwa madzimwari awo emanyepo. AIsraeri paakakwanisa kubuda mu Edjipitu, akateedzera mabiko amweni wociEdjipitu kakuti ‘mabiko anoitirhwa Djehovha.’ Asi Djehovha aakaphanica nge ndaa ye zvaakaita. (Ekisodho 32:2-10) Hingana zvakareketa muphorofiti Isaya, atidikani kubata “ciro cisikazi kucena!”—Erengai Isaya 52:11.

REREMEDZAI AMWENI PAMUNOAPANGANIDZIRA ZVAMUNOTENDA

13. Mibvunzo dzipi dzinokwanisa kubuda kana mukasanangura kusiya kucengeta mazororo?

¹³ Pamunosanangura kusiya kucengeta mazororo, mungakwanisa kugara no mubvunzo dzakawanda. Ngo muezaniso: Ndinodikana kuitei kana andinosenza nawo akandibvunzisa kuti ngei andicarhyi Khisimisi nawo? Ndinodikana kuitei kana munhu akandipasa cipo ce Khisimisi? Ndinodikana kuitei kana wandakawakana naye ecida kuti ndicengete zuwa re kuzorora? Ndingaitei kuti ndibetsere ana angu kuti asagare akatsukwara ngokuti atiiti mabiko kuitira zuwa re kuzorora kana zuwa re kubarhwa kawo?

14, 15. Mungaitei kana munhu akamubvunzai bofesta kana kumupasai cipo?

¹⁴ Zvakanaka maningi kungwarira zvamunoda kureketa kana zvokuita pamagarire akasiyana-siyana. Ngo muezaniso, kana munhu akamubvunzai bofesta, amudikani henyu kumunguza. Mungamudaira basi kuti, “Maita basa.” Asi kana munhu ecida kuziya zvakawanda, mungamupanganidzira henyu kuti ngei amucengeti mazuwa okuzorora. Asi zviitei nguwa dzese no upfawi, ungwaru uye rureremedzo. Bhaibheri rinoti: “Masoko enyu ngaagare akanaka nguwa dzese, akarungwa ne munyu, kuti muziye madairire amunodikana kuita munhu umwe na umwe.” (Akorosi 4:6) Pamweni mungaapanganidzira kuti munopfarira kutora nguwa kuti mudakadzwe no amweni kana kupasa zvipo, asi kuti amudi henyu kuzviita nge ndaa e mazuwa okuzorora.

¹⁵ Hino munodikana kuitei kana munhu akamupasai cipo? Bhaibheri aripasi munda-nda-nda we zvokuita, asi rinotibvunza kuti tinodikana kugara tino hana yakacena. (1 Timoti 1:18, 19) Pamweni munhuwo ari kumupasai ngokuti ainga asikazii kuti amucengeti mazuwa okuzorora. Pamweni angati, “Ndinoziya kuti amucengeti mazuwa okuzorora, asi kunyazi zvakadaro ndinoda kumupasai cipo ici.” Pa zvese izvi, ndimwi munodikana kusanangura kutenda kana kuramba cipoco. Asi zvamunosanangura kuita zvinodikana kumusiyai no hana yakacena. Atingadi kuita ciro cinoshatisa ushamwari wedu na Djehovha.

IMWIMWI NE MHURI YENYU

16. Munodikana kuitei kana mhuri yenyu yecida kuita mabiko kuitira zuwa re kuzorora?

¹⁶ Munodikana kuitei kana mhuri yenyu yecida kuita mabiko kuitira zuwa re kuzorora? Amudikani kureketedzana nawo. Edzurirai kuti munhu wese akasununguka kusanangura zvaanoda kuita. Reketai nawo zvakanaka uye reremedzai zvaanosanangura kuita hingana zvamaida kuti amuitereiwo. (Erengai Mateu 7:12.) Asi kana mhuri yenyu yecida kuti mupinde mwese zuwa re kuzorora, munodikana kuitei? Musati masanangura zvokuita, kumbirai Djehovha kuti amubetserei kusanangura zvakanaka. Nyasai kurangarira zvese zvinonga zvecizoitikepo uye moerenga mabhuku anobhuya nge zvazvo. Edzurirai kuti munoda kupfadza Djehovha nguwa dzese.

17. Mungaitei kuti mubetsere ana enyu kuti asazwe hingana ari kuruza ciro paanoona amweni eciita mabiko kuitira zuwa re kuzorora?

¹⁷ Mungaitei kuti mubetsere ana enyu paanoona amweni eciita mabiko kuitira zuwa re kuzorora? Psvakai mazuwa amweni kuti muaitire ciro cakanaka. Mungaapasa cipo paanonga asikakariri. Uye apana cipo cimweni camungaapasa cinopinda kutora nguwa nawo uye kuapangidzira rudo.

TSIGIRAI KUNAMATA KE ZVIROKWAZVO

18. Ngei tinodikana kupinda misangano?

¹⁸ Kuti tipfadze Djehovha, tinodikana kusiyana no kunamata kokunyepa, tsika no mazororo akabatana nako. Asi tinodikanawo kutsigira kunamata ke zvirokwazvo. Tingazviita maitirei? Umwe mushobo wokuita izvona ndewekugara tecipinda misangano yeciKristu. (Erengai Ahebheru 10:24, 25.) Misangano yakabatana maningi no kunamata ke zvirokwazvo. (Pisarema 22:22; 122:1) Mu misangano tinokwanisa kubambisana.—Aroma 1:12.

19. Ngei zvakanaka maningi kureketa no amweni nge zve cokwadi ce Bhaibheri camuri kufunda?

¹⁹ Mushobo umweni okutsigira kunamata ke zvirokwazvo ndewekureketa no amweni zviro zvamunofunda mu Bhaibheri. Anhu akawanda ari kurhwadziwa ngo kuona zviro zvakashata zviri kuitika mu nyika. Pamweni munoziya munhu ari kuzwa zvakadaro. Reketai naye nge zve kariro yakanakisisa ye nguwa yo mberi. Ngo kupinda misangano yeciKristu uye kureketa no amweni nge zve cokwadi ce Bhaibheri, mucakwanisa kupedza cido cese camainga munaco no kunamata kokunyepa no tsika dzakhona. Garai henyu no rugondo rokuti mucapfara maningi uye rokuti Djehovha acakomborera zvese zvamuri kusanangura kuita kuti mumunamate ngo mushobo waanoda.—Marakiya 3:10.