Mhemberero Dzese Dzinopfadza Mwari Here?

Djehovha anoda kuti tipfadzwe ne upenyu, kunyazi kutopembererawo pa nguwa dzimweni. Asi Djehovha anopfadzwa ne mhemberero dzese here? Tingapangidza kudini kuti tinoda Djehovha pa nyaya ii?

1. Ngei mhemberero dzakawanda dzisikapfadzi Djehovha?

Zvingatoshamisa kuziya kuti mhemberero dzakawanda adzipfadzi Djehovha kana kuti dzakatangira mu cihedheni. Mhemberero dzakadaro pamweni dzakabatana ne kunamata ke kunyepa. Pamweni dzakabatana ne cidhimoni kana murangariro wekuti mwiya we munhu aufi. Mhemberero dzimweni dzakabva pakutenda maninji uye dzimweni dzakabva pakutenda kuti zviro zvainga zvakatarhwa na Mwari. (Isaya 65:11) Djehovha anobvunza anomunamata kuti: “Budai pakati pawo, mudziparadzanise . . . musabate ciro cisikazi kucena.”—2 Akorinti 6:17.a

2. Djehovha anozwa kudini panoizwa mhemberero dzekukudza anhu?

Djehovha anotibvunza kuti tingwaririre “kugonda munhuwo hake.” (Erengai Djeremiya 17:5.) Kupemberera kumweni nge ke kukudza atongi kana masurudado. Dzimweniwo nge dze kupemberera cinyamugano ce nyika kana zuwa re independesiya. (1 Juau 5:21) Dzimweni dzinokudza mapartidho e zvematongerhwe e nyika kana mibatanidzwa inorhwira zvitenderhwa zve anhu. Djehovha anozwa kudini kana tikapasa rureremedzo risikazi kusisira ku munhu umweni kana kuti sangano, zvisikaenderani ne cinangwa cake?

3. Ngazvipi zvinoizwa pa mapemberero amweni zvinoita kuti zvisapfadze Mwari?

Bhaibheri rinorambidza ’kuraradza, kuita mabiko akanyanyisa uye kumwisa doro’. (1 Pedru 4:3) Mhemberero dzimweni dzinoizwa, anhu anonga asikadzibati uye eciita uhure. Kana tecida kurumbwa tiri shamwari ya Mwari, tinodikana kusiyana ne zviro zvisikazi kucena.

FUNDAI ZVAKAWANDA

4. Rambai mhemberero dzisikapfadzi Djehovha

Erengai Aefeso 5:10, Pedzepo cedzai nge zve mibvunzo dzinoteera:

• Tisati tasanangura kuti tombemberera mhemberero kana kuti haiwa tinodikana kugara ne cokwadi cipi?

• Mhemberero dzipi dzinonyanya kuizwa kamunogareyo?

• Mhemberero idzona dzinopfadza Mwari here?

Makambodzibvunzisa kuti Mwari anoona kudini mazuwa e kubarhwa? Mu Bhaibheri apana munhu wainamata Djehovha unorekethwa kuti waipemberera zuwa rekubarhwa asi rinoreketa nge zve anhu airi ainga asikaseenzeri Mwari akapemberera mazuwa ekubarhwa. Erengai Genesi 40:20-22 uye Mateu 14:6-10. Pedzepo cedzai nge zve mibvunzo dzinoteera:

• Cinyi cakaitika pamamhemberero ese ari mairi?

• Mu nyaya dzetafunda mu Bhaibheri munoona kuti Djehovha anozwa kudini ne zve kupemberera mazuwa e kubarhwa?

Asi mungakwanisa kurumbwa muno mubvunzo unoti: ‘Djehovha ano basa nazvo here kana ndikapemberera zuwa rekubarhwa kana mhemberero dzimweni dzinopesana ne Bhaibheri?’ Erengai Ekisodho 32:1-8. Pedzepo, ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Mhemberero Dzisikapfadzi Mwari (5:07)

• Ngei tecidikana kugara necokwadi ce zviro zvinotenderhwa na Djehovha?

• Tingazviita kudini?

Tingaziya kudini mhemberero dzisikapfadzi Mwari

• Yakatangira pa fundiso isikazi kutorerhwa mu Bhaibheri here? Kuti mukwanise kuona mhinduro, kwarakwatisai matangire e yakaita.

• Inopasa rukudzo risikazi kusisira ku munhu, sangano, kana kuti bhandera here? Djehovha ndiyena basi watinodikana kukudza kupinda munhu upi hake uye ndiyena watinodikana kugonda kuti acagadzirisa matambudziko ese ari pa nyika pano.

• Tsika Dzinoizwa pa mhemberero iyona adzipesani no zvinorekethwa mu Bhaibheri here? Tinodikana kurumbwa tino tsika dzakacena.

5. Betserai amweni kuti areremedze zvamunotenda

VHIDHIYO: Ngwarirai Pamunonga Mecipanganidza Zvamunotenda (2:01)

Erengai Mateu 7:12, pedzepo cedzai ngezve mibvunzo dzinoteera:

• Maererano no vhersikuro ii, munodikana kurambidza hama dzenyu kuti dzisapemberere maferiyadho asi idzona dzecida kuwapemberera here?

• Kunyazi musikapembereri maferiyadho pamwepo no mhuri yenyu, mungaitei kuti muapangidze kuti munoada uye kuti aciri kukosha kamuri?

6. Djehovha anoda kuti isusu tipfare

Djehovha anoda kuti isusu tigare no nguwa yekumbopfara no hama uye ne shamwari dzedu. Erengai Muparidzi 8:15, pedzepo cedzai nge zve mubvunzo unoteera:

• Vhersikuro ii, inopangidza kudini kuti Djehovha anoda kuti isusu tipfare?

Djehovha anoda kuti anhu anomunamata ambopfarewo ari pamwepo. Ridzai VHIDHIYO inopangidza izvona zveciitika pa magungano e nyika dzakawanda.

VHIDHIYO: Kutambira Arendo pa Magungano e Nyika Dzakawanda (5:40)

Erengai Agaratiya 6:10, pedzepo cedzai nge zve mibvunzo dzinoteera:

• Kuti ‘tiitire amweni zvakanaka’ tinodikana kupemberera maferiyadho ano mbiri here?

• Kupasa kupi kunomuitisai kuti mupfare —kupasa ngekuti i feriyadho kana kuti kupasa zvecibva mu mwoyo?

• Apupuri a Djehovha anotengerawo ana awo cipo asikakariri kana kutopfarawo nawo. Kana mune mwana, ngazvipi zvinopfadza zvamungakwanisa kumuitirawo?

MUCIGWAGWA

Djehovha anoda kuti isusu tipfare no hama uye ne shamwari dzedu. Asi anodawo kuti tisapemberere mhemberero dzisikamupfadzi.

Mibvunzo yekuhwirinzira

• Mibvunzo dzipi dzamungadziita kuti muziye kuti feriyadho ii inopfadza Djehovha here kana kuti haiwa?

• Tingabetsera kudini hama no shamwari kuti dzizwisise kuti ngei tisikapembereri maferiyadho amweni?

• Munoziya kudini kuti Djehovha anoda kuti isusu tipfarewo?

ZIYAI ZVAKAWANDA

Erengai nge zve maferiyadho asikapembererhwi nge Akristu.

“Ngei Apupuri a Djehovha Asikapembereri Maferiyadho Amweni?” (Fundo ye mu saite)

Onai zvikonzero zvirongomuna zvinoita kuti tibhuye kuti Djehovha aapfadzwi nge kupemberera mazuwa ekubarhwa.

“Nei Zvapupu zvaJehovha Zvisingapembereri Mazuva Okuberekwa?” (Fundo ye mu saite, mu ciShona)

Onai kuti mudjaha umweni wakaita kudini paakasekwa ne aanofunda nawo kucikora ngekuti aapembereri Khisimisi.

Imwimwi Munokosha Kuna Djehovha (11:35)

Mamiriyonji e Akristu akasanangura kuti asapemberere Khisimisi. Imwimwi munorangarireiwo nge zve cisananguro cakaizwa nge Akristu aya?

“Awona Akaona Ciro Ciri Nane Kudarika Khisimusi” (Murindiri wa 1 ya Dezembro wa 2012)