Adhamu na Evha Aazi Kuzwira Mwari

Zuwa rimweni Evha wainga ari ega. Pedzepo, nyoka yakauya uye yakatanga kucedza naye yeciti: ‘Izvirokwazvo here kuti Mwari aamusii kuti murhye muti we mucero upi hawo?’ Evha wakadaira kuti: ‘Andizvopi. Isusu tingakwanisa kurhya micero yese. Asi Mwari akabhuya kuti atidikani kurhya mucero we muti umwe basi. Kana isusu tikarhya, ticafa.’ Nyoka yakati: ‘Kunyepa, imwimwi amufi. Zvezvirokwazvo, kana imwimwi mukarhya mucero uu, mucagara makaezana na Mwari.’ Kodi izvona zvainga zviri zvirokwazvo here? Haiwa, zvainga zviri zve kunyepa. Asi iyena wakatendera manyepo awona. Uvha paainyasa kuringira mucero uwona, cido cekuda kuurhya caibambirirawo kukura. Hino Evha wakarhya mucero uwona uye wakapasawo Adhamu kuti arhye, uye Adhamu wakarhyawo. Adhamu waizviziya kuti kana akatama kuzwira Mwari, awona aizofa. Asi kunyazi zvakadaro, iyena wakarhya mucero uwona.

Nokuhamba ke nguwa, Djehovha akabvunzisa Adhamu na Evha kuti ngei ainga arhya mucero uwona. Evha wakapasa ndaa nyoka, uye Adhamu wakapasawo ndaa Evha. Adhamu na Evha aazi kuzwira Mwari, ndiyo ndaa awona akadzingirhwa mu munda we Edheni. Djehovha akakanda ngirozi uye supada yaibaka muriro pa gwanza raipinda mu munda we Edheni. Ngokudaro, Adhamu na Evha ainga asikazopindizve mu munda we Edheni.

Hino nyoka iya kei? Hinga zvaunoziya, nyoka adzireketi. Zvezvirokwazvo, Sathani ndiye wakaita kuti nyoka irekete kuti icengedze Evha. Unoziya kuti Sathani ndiani? Sathani i ngirozi yakashata. Iyena unodainzwawo kuti Dhiyabhurosi. Djehovha akabvunza Sathani kuti iyena waizotambirawo muphanico. Mune ramangwana, Djehovha acatsakatisa Sathani. Ngokudaro, Sathani aazocengedzizve anhu kuti aite zviro zvakashata.