Abrahamu na Sara Akazwira Djehovha

Dhuze no Bhabheri kainga kuno thaundi raidainzwa kuti Uri, anhu e ikona ainga asikanamati Djehovha. Awona ainamata anamwari akawanda e kunyepa. Asi ku Uri kainga kuno mwanarume wakasiyana no anhu aya waidainzwa kuti Abrahamu. Iyena wainamata Djehovha basi.

Djehovha akabvunza Abrahamu kuti: ‘Siya nyumba yako no hama dzako uye enda ku mbuto yandicakupangidzira.’ Asi Mwari akagondesa Abrahamu kuti: ‘Mhuri yako icawanda maningi uye icagara no mamiriyonji e anhu. Ndicaseenzesa iwewe uye mhuri yako kuti iite zvakanaka ku anhu e nyika yese.’

Abrahamu wainga asikazii kaaizoendeswa na Djehovha. Kunyazi zvakadaro, iyena wakagonda Djehovha uye wakamuzwira. Hino Abrahamu no mukadzi wake Sara, akarongedza zviro zvawo uye akatanga kuita rhwendo rakakura. Baba a Abrahamu no mwana wa mukoma ake akaendawo na Abrahamu. Baba a Abrahamu aidainzwa kuti Tera uye mwana wa mukoma a Abrahamu aidainzwa kuti Roti.

Abrahamu paainga ano makore 75 iyena no mhuri yake akaguma ku Kanani, ku mbuto yaida Djehovha kuti aende. Ikona, Djehovha akaita gondeso imweni kuna Abrahamu. Iyena akati: ‘Ndicapasa mbuto ii ku ana ako uye ku azukuru ako.’ Asi Abrahamu na Sara ainga akura uye ainga asina mwana. Hino Djehovha aizodzadzisa kudini zviya zvaakagondesa?