Mwana Wakapikirhwa na Djehovha

Abrahamu na Sara ainga aano makore akawanda awakana. Uye awona akasiya nyumba yakanaka ku Uri oenda koorarama mu matenda. Sara waiziya kuti kuzwira Djehovha cainga ciri ciro cakanaka. Ndiyo ndaa, wainga asikagari ecigurunguta.

Asi Sara waida maningi kugara no mwana. Ndiyo ndaa, wakabvunza Abrahamu kuti: ‘Kana imwimwi mukabara mwana no museenzi wangu Agari, iyena unozogara hinga mwana wangu.’ Mumasure me ka nguwa, Agari wakazobara mwana na Abrahamu. Iyena waizwi Ismaeri.

Paa padarika nguwa, Abrahamu paainga ano makore 99 uye Sara makore 89, awona akavhakacirhwa no anarume atatu. Abrahamu akaapika kuti agare pasi pe muti kuti amborhye padoko. Unoziya kuti anarume atatu aya ainga ari ani? Dzainga dziri ngirozi! Imwe yakhona yakabvunza Abrahamu kuti: ‘Gore rinouya pa nguwa yakaita hingana ino, iwewe no mukadzi wako mucazogara no mwana.’ Sara wainga ari mutenda ecizvizwa. Ngirozi payakabhuya izvona, iyena wakatanga kuseka uye wakarangarira kuti: ‘Inini ndacembera! Ndingagara kudini no mwana?’

Mumasure me kudarika gore rimwe, hinga zvakabhuiwa no ngirozi ya Djehovha, Sara wakazobara mwana. Abrahamu wakapasa mwanewo zina rekuti Izaki, zvinoreya “Kuseka.”

Izaki paainga ano makore 5, Sara wakaona Ismaeri ecibata Izaki ngo mushobo wakashata. Hino, iyena wakaenda koocedza na Abrahamu uye wakakumbira kuti iyena adzingirise Agari uye Ismaeri. Pakutanga Abrahamu wainga asikadi kuita izvona. Asi ngekuda kudziirira Izaki, Djehovha akabvunza Abrahamu kuti: ‘Ita zvawakumbirhwa na Sara. Usanetseke, inini ndicariritira Ismaeri. Asi zvipikirhwa zvandakakugondesa zvicadzadzika na Izaki.’