Manyambiri Akasiyana

Izaki paainga ano makore 40, wakaziya Rabheka uye wakacata naye. Izaki waida maningi Rabheka. Mumasure me kudarika kacinguwa, Rabheka wakabata pamwiri pe manyambiri.

Izau ndiyena wakatanga kubarhwa uye wakazoteera waizwi Djakobo. Izau waipedza nguwa yakawanda asiripi pa nyumba uye waipfarira zvekubata zvinyama. Asi Djakobo waipfarira zvekubetsa mabasa e pa nyumba.

Izau ndiyena wainga ari dangwe. Ndiyo ndaa, iyena wainga ano citenderhwa cekupaswa nhaka yakakura kudarika ya Djakobo. Unoziya kuti cinyi cinozwi nhaka? I zviro zvinosiiwa na baba ku ana, babewo paanofa. Zvakaita hingana munda kana kuti mare. Uye ku mhuri ya Izaki, zvipikirhwa zvainga zvaita Djehovha kuna Abrahamu, zvaibatanidzwawo pa nhaka iyona. Izau wainga asina basa no zvipikirhwa izvona, asi kuna Djakobo zvainga zviri zviro zvinokosha maningi.

Zuwa rimweni, Izau wakabuda koobata zvinyama uye wakahwirira akaremba maningi. Hino, iyena wakazwa kunuhwirira ke zvekurhya zvaibikwa na Djakobo. Izau wakati: ‘Ndiri kufa no nzara! Ndipaseiwo padoko zvekurhya!’ Djakobo wakati: ‘Ndicakupasa, asi kana ukapika kuti ucandipasa nhaka yako.’ Izau wakati: ‘Inini andina basa no nhaka ii! Tora hako zvese. Inini ndiri kuda kurhya basi.’ Kodi Izau wakarangarira zvakanaka paakaita cisananguro ici? Haiwa, aazi. Izau wakacinjanisa zviro zvinokosha maningi no tijera ye zvekurhya.

Izaki paainga acembera maningi, iyena wakaona kuti yainga yaguma nguwa ye kukoborera mwana wake we dangwe. Asi Djakobo wainga atenga citenderhwa ce kugara mwana we dangwe. Rabheka wakabetsera Djakobo kuti atambire makomborero aya. Izau paakaziya izvona, iyena wakagara no shungu zvekuti wakaguma pakuda kuuraya hama yake Djakobo. Izaki na Rabheka aida kudziirira Djakobo, ndiyo ndaa akabvunza Djakobo kuti: ‘Enda koogara na Rabhani, mukoma a Rabheka dakara shungu dza Izau dzadarika.’ Djakobo wakapurutana mazano aakapaswa no abereki ake uye wakaenda koorarama na Rabhani.