Djakobo na Izau Anoita Runyararo

Djakobo wakaenda koogara ku mbuto inodainzwa kuti Harani. Pa rhwendo rake, Djehovha akagondesa Djakobo kuti aizomucengeta hinga macengetero aakaita Abrahamu na Izaki uye ndizvona zvakazoitika. Ku Harani, Djakobo wakawaka, wakagara no ana akawanda uye wakagara no zviro zvakawanda.

Papera nguwa yakareba, Djehovha akabvunza Djakobo kuti: ‘Hwirira ku nyika ye madzibaba ako.’ Hino, Djakobo ne mhuri yake akatangisa kuita rhwendo rakakura ecihwirira. Paainga ari mu gwanza, Djakobo wakaziya kuti Izau waiuya koosongana naye uye wainga ano anarume anokwana kuita 400. Djakobo wakathya maningi ecithyira kuti Izau waizomukuwadza pamwepo no mhuri yake. Hino Djakobo wakaita munamato eciti: ‘Ndapota Djehovha, ndiponesei kuti ndisarhwiswe ndi mukoma angu.’ Pa zuwa rakazoteera, Djakobo wakatumira Izau mabira akawanda, mbudzi, n’ombe, makamero no madhongi hingana cipo.

Pa usiku iwona, pa nguwa yekuti Djakobo wainga ari ega, iyena wakaona ngirozi. Awona akatanga kupondana. Awona ari airi akapondana usiku wese uye Djakobo wakapedzesera akuwara. Kunyanzi zvakadaro, Djakobo aazi kutiza. Iyena waida kuti ngirozi ii imukomborere yecibhuya kuti Djehovha ainga asikazosii zviro zvakashata zveciitika naye. Ngirozi iyona yakamubvunza kuti: ‘ Ndisiye ndiende.’ Djakobo wakadaira kuti: ‘Haiwa, andimusii dakara mandikomborera.’

Pakupedzesera ngirozi iyona yakakomborera Djakobo. Hino, iyena wakagara no rugondo rekuti wainga asikadikani kuthya mukoma ake Izau.

Macibesi awona, Djakobo wakaaringira uye wakakwanisa kuona nge kure Izau no anarume anokwana kuita 400 eciuya. Djakobo wakaenda koosongana na Izau uye paainga a dhuze naye, Djakobo wakahwarara ka 7. Izau wakagogoma dakara pana Djakobo uye awona akakhumbatirana. Ari airi akatanga kucema maningi, pedzepo akaita runyararo. Zvingaita kuti Djehovha akapfara maningi nge kuona mushobo wekuti Djakobo wakagadzirisa nyaya iyona, andizvopi?

Mumasure mazvo, Izau wakahwirira kumba uye Djakobo wakarumbwa eciita rhwendo rake dakara ku nyika ye abereki ake. Djakobo wakagara no ana anokwana kuita 12 aidainzwa kuti: Rubheni, Simioni, Revhi, Djudha, Dhani, Nafitari, Gadhi, Azeri, Isakaari, Zebhuroni, Zuzee, uye Bhenjamii. Umwe we ana aya wakaseenzeswa ndi Djehovha kuti aponese mhuri ii inokosha. Iyena ndiani uye wakazviita kudini? Ngationei.