Ngano ya Djobo

Kodi munhu unoita zviro zvakanaka aasongani ne zvinetso here? Onai zvakaitika na Djobo. Iyena wairaramira ku mbuto yaizwi Uzi. Iyena wainga akapfuma maningi uye wainga ano mhuri yakakura. Djobo wainga ari mwanarume wakanaka uye shamwari ya Mwari. Iyena waibetsera arombo, afirhwakadzi uye nherera.

Djobo wainga asikazvizii kuti Sathani wainga eciona zvese zvaaiita. Djehovha akabvunzisa Sathani kuti: ‘Waona here museenzi wangu Djobo? Apana wakaezana naye pa nyika. Iyena nguwa dzese unondizwira uye unoita zvakanaka.’ Sathani wakati: ‘Ngokuti imwimwi amusii kuti ciro cipi haco cakashata ciitike naye uye munomupasa zviro zvakawanda zvakanaka, zvakaita hingana minda uye zvinyama. Asi bvisai zvese zvaanazvo uye tione kuti iyena ucarumbwa here ari shamwari yenyu.’ Djehovha akati: ‘Zvakanaka, ndinosiya kuti iwewe uite zvaunoda kuna Djobo. Asi usaduse upenyu wake.’ Ngei Djehovha akatendera kuti Sathani aedze Djobo? Ngokuti iyena aigonda maningi Djobo. Djehovha aiziya kuti Djobo waizorumbwa ari shamwari yake, kunyanzi pa mugariro unoshupha maningi.

Hino, Sathani wakatanga kuita zviro zvakashata kuna Djobo. Cokutanga wakaita kuti zvipfuyo zva Djobo zvipiswe kana kuti zvibiwe uye wakaita kuti aseenzi ake aicengeta zvinyama auraiwe. Asi pedzepo, Sathani wakaita ciro cakashata maningi. Iyena wakaita kuti ana a Djobo afe. Awona ainga ari pamwepo mu nyumba eciita mabiko uye nyumbeyo yakaambwerera. Djobo wakatsukwara maningi no zvese izvi, asi wakarumbwa ari shamwari ya Djehovha.

Sathani waida kuti Djobo ashuphikezve kupinda izvi. Hino iyena wakaita kuti mwiri wa Djobo ugare no maronda. Djobo wairhwadziwa maningi, asi wainga asikazii kuti ngei izvona zvaiitika. Kunyanzi zvakadaro, iyena aazi kusiya kugara shamwari ya Djehovha. Ndiyo ndaa, Djehovha akapfara maningi.

Mumasure mazvo, Sathani wakaita kuti shamwari nhatu dza Djobo dziende kooreketa manyepo. Shamwari idzona dza Djobo, dzakamubvunza kuti: ‘Pamweni iwewe wakaita zviro zvakashata uye Mwari ari kumuphanica nge ndaa yazvo.’ Djobo wakabhuya kuti: ‘Andizi kuita ciro cakashata.’ Asi iyena wakatanga kurangarira kuti Djehovha ndiye aiitisa kuti zviro zvakashata zviitike kaari. Djobo wakatobhuya kuti Mwari ainga asikamubati no unatsi.

Mwanarume umweni unozwi Eriu wainga aripo akanyarara ecizwa zviro zvaaireketa. Hino iyena wakatanga kureketa eciti: ‘Zvese zvamuri kureketa azvirokwazvopi. Djehovha akakura kudarika zviya zvatinorangarira. Aamboiti zviro zvakashata. Iyena anoona zviro zvese zvinoitika uye anobetsera anhu paanobatana no matambudziko.’

Mumasure mazvo, Djehovha akareketa na Djobo. Iyena akati: ‘Ngei iwewe uri kurangarira kuti ndini ndino ndaa? Iwewe auzwisisi masikire andakaita denga uye nyika, hino ungazwisisa kudini kuti ngei izvi zviri kuitika?’ Djobo wakati: ‘Djehovha Tenzi wangu, imwimwi amuna ndaa. Ndinoziya kuti imwimwi muno simba kudarika anhu ese. Nditoriwo munhu basi asikazii ciro, ndirekerereiwo no zvandareketa.’

Mumasure mazvo, Djehovha akaporesa nhenda yainga ina Djobo uye akamupasa zviro zvakawanda kupinda zviya zvaainga anazvo. Djobo wakararama makore akawanda ecipfara maningi. Djehovha akaita izvona ngokuti Djobo waimuzwira nguwa dzese, kunyazi pazvaishupa. Kuzoti iwewe, unodawo kupfadza Djehovha hingana Djobo here? Hino, rumbwa wecigara shamwari ya Djehovha pasinei no zvicaitika.