Djehovha Akasanangura Djoshuwa

Mozesi wakatungamirira Aisraeri ke makore akawanda. Paainga aadhuze no kufa, Djehovha akati: ‘Iwewe auzotori Aisraeri kuti aende ku Kanani, Nyika Yandakapikira kupasa awona. Asi ndicakusiya kuti uone nyikeyo ngece kure.’ Hino Mozesi wakakumbira Djehovha kuti asanangure mwanarume umweni kuti acengetedze Aisraeri uye Djehovha akasanangura Djoshuwa.

Ngokudaro, Mozesi wakabvunza Aisraeri kuti wainga aadhuze no kufa uye wakabhuyawo kuti Djehovha asanangura Djoshuwa kuti aatore dakara ku Kanani. Pedzepo, Mozesi wakabvunza Djoshuwa kuti: ‘Usathye, Djehovha acakubetsera.’ Mumasure mazvo, Mozesi wakakwira mu Dunhu rinozwi Nebho. Ipona, Djehovha akasiya kuti Mozesi aone Nyika Yaakapikira Abrahamu, Izaki uye Djakobo. Hino Mozesi wakafa ano makore 120.

Djehovha akabvunza Djoshuwa kuti: ‘Bira Murambo we Djorodhani uye pinda mu nyika ye Kanani. Inini ndicakubetsera hinga mushobo wandakabetsera Mozesi. Erenga mazuwa ese Mutemo yandakapasa Aisraeri. Usathye. Shinga. Enda uye ita zvese zvandakakubvunza.’

Ngokudaro, Djoshuwa wakatuma avhevhi airi kuti aende ku thaundi re Djeriko. Mu ngano inoteera, ticafunda zvakawanda zvakazoitika ikona. Avhevhi aya paakazohwirira, awona akabhuya kuti yakwana nguwa yekuti tipinde mu nyika ye Kanani. Hino Djoshuwa wakabvunza Aisraeri kuti agadzirire ngokuti yazoguma nguwa yekuti tibire Murambo we Djorodhani. Iyena wakatuma apristi aithwara areka ye citenderano kuti aende mberi. Awona paakaguma mu Murambo we Djorodhani, awona akaona kuti murambowo wainga wakadzara uye kuti adarike zvainga zvino ngozi. Asi apristi paakakanda murenje dzawo mu mvura, iyona yakaima kuerera uye murambo wakaoma! Apristi akarumbwa akaima pakati pe murambo ecietsera kuti Aisraeri ese adarike. Zvezvirokwazo, izvona zvakaita kuti Aisraeri aedzurire zvakaizwa na Djehovha ku Bahari re Kupsvuka.

Pari zvino, mumasure me makore akawanda, Aisraeri akazoguma ku nyika yaainga akapikirhwa na Djehovha kare. Awona aizokwanisa kuwaka nyumba uye mathaundi. Uye aizokwanisa kusima zvese zvaaiida. Yainga iri nyika yakanaka uye yakarungama maningi.