Djoshuwa no Adjibhiyoni

Kanani yese yakaziya zvainga zvaitika no Djeriko. Hino madzimambo anganani e ku Kanani akasanangura koorhwisa Aisraeri. Asi anhu e thaundi re Kanani aidainzwa kuti Adjibhiyoni akasanangura kuita hingana ainga asiripi Akanani. Kuti zvibudirire, awona akatuma anarume anganani kuti apfeke macira akatsakara uye aende koobhuya na Djoshuwa kuti: ‘Isusu tinogara kure. Takazwa zvamakaizirhwa na Djehovha ku Edjipitu uye ku Moabhi. Kana imwimwi mukagondesa kusama kutsakatisa thaundi redu, isusu ticamuseenzerai hinga aranda.’

Djoshuwa wakatendera zvakabhuiwa uye wakagondesa kuti wainga asikazowatsakatisi. Asi mumasure me mazuwa matatu, Djoshuwa wakazoziya kuti awona ainga asiripi e kure. Awona ainga ari Akanani. Djoshuwa wakabvunzisa Adjibhiyoni kuti: ‘Ngei imwimwi makanyepa?’ Awona akadaira kuti: ‘Ngekuti isusu takathya! Isusu tinoziya kuti Djehovha ari kumubetserai kuti muwine nyika ye Kanani. Tapota, musauraye anhu edu.’ Hino Djoshuwa wakadzadzisa mhiko yaainga akagondesa uye wakasiya Adjibhiyoni ecirarama.

Mumasure me kacinguwa, madzimambo 5 e Kanani akaenda koorhwisa Adjibhiyoni. Asi Djoshuwa no masurudado ake akaenda koobetsera Adjibhiyoni. Awona akahamba usiku wese kuti aende koobetsera Adjibhiyoni uye pa zuwa rakazoteera hondo yakatanga. Akanani akatanga kutizira ku mbuto dzese. Apona Djehovha akaita kuti masanza akakura ambwere pamusoro pe azondi awo. Hino Djoshuwa wakakumbira Djehovha kuti zuwa riime. Asi Djoshuwa wainga asati akamboona zuwa reciima kareko. Hino ngei iyena wakagara no marangariro e kukumbira izvona? Ngokuti Djoshuwa waigonda maningi Djehovha. Zuwa rakazodoka mumasure mekuti Aisraeri akunda madzimambo e ku Kanani uye no azondi awo.