Munamato wa Ana

Mwanarume umweni waidainzwa kuti Erikana waiita rhwendo makore ese no mhuri yake kuti aende koonamata Djehovha ku thaundi re Siro kainga kuno tabhernakuro. Iyena wainga ano akadzi airi Ana uye Penina, asi iyena waida maningi Ana. Penina wainga ano ana akawanda, asi Ana wainga asina kana umwe hake uye Penina waibata Ana nge mushobo usikazi kunaka nge ndaa yazvo. Zuwa rimweni paainga ari ku Siro Erikana wakaona kuti Ana wainga akatsukwara maningi, iyena wakanetseka nge ndaa yazvo uye wakaenda koocedza naye, asi izvona azvizi kubetsera ciro.

Mumasure me cinguwa, Ana wakabuda kuti aende kooita munamato. Ecicema maningi iyena wakati: ‘Djehovha, kana imwimwi mukandipasa mwana, inini ndinomugondesai kuti ndicamutora kuti aseenze ku tabhernakuro uye iyena acamuseenzerai ke upenyu wese.’

Mupristi Mukuru Eri, aazi kurangarira kuti Ana wainga eciita munamato, iyena wakarangarira kuti Ana wainga akararadza. Iyena wakabvunza Eri kuti: ‘Haiwa tenzi wangu, inini andizi kuraradza. Ndiri kunetseka maningi, ndiyo ndaa ndauya koobhuya na Djehovha.’ Eri paakaona kuti zvaairangarira zvainga zvisirizvopi, iyena wakabhuya kuti Djehovha aizopasa Ana zvaaida. Hino, iyena wakaenda ecipfara. Asi apazi kupera nguwa yakareba, Ana wakagara no mwana unozwi Samueri. Iyena pamweni wakapfara maningi andizvopi?

Kodi Ana wakakanganwa gondeso yaakaita kuna Djehovha here? Haiwa. Samueri paakarumurhwa, Ana wakamutora oenda koomusiya ku tabhernakuro. Ana wakabvunza Eri kuti: ‘Munoedzurira kuti inini ndakaita cikumbiro kuna Djehovha? Iyena wazwa cikumbiro cangu uye wandipasa mwana umwe. Iyena acaseenzera Djehovha ke upenyu wake wese.’ Makore ese Ana na Erikana aienda koona mwana wawo uye aimuendesera macira mapsva. Mumasure mazvo, Djehovha akamupasazve ana e anarume atatu uye e anakadzi airi.