Djehovha Anobhuya na Samueri

Mupristi Mukuru Eri wainga ano ana airi, umwe unodainzwa kuti Ofini umweni Fineya. Awona ainga asikazwiri Djehovha uye aibata anhu zvakashata. Aisraeri paaienda ku tabhernakuro koopasa Djehovha zvipo, Ofini uye Fineya aitora nyama yakanakisisa. Eri paakazviziya aazi kuita ciito. Asi zvakadini na Djehovha, iyena aizozvisiya zvakadaro here?

Samueri wainga ari mwana mudoko, uye ana adoko anopfarira kuteedzera anhu akuru. Asi Samueri aazi kuteedzera Ofini na Fineya. Djehovha paakaona izvona akapfara maningi. Pa zuwa rimweni, Samueri paainga eciwata wakazwa izwi recidainza zina rake. Iyena wakamuka, wakagogoma ecienda kuna Eri uye wakati: ‘Ndiri pano.’ Asi Eri wakabhuya kuti: ‘Andizi kukudainza. Hwirira koowata.’ Izvona zvakaitika katatu kese. Asi kecitatu Eri wakazviziya kuti Djehovha aiedza kureketa na Samueri. Iyena wakabvunza Samueri kuti kana ukazwa izwi iri recikudainzazve, iwewe unodikana kudaira kuti: ‘Djehovha bhuyai henyu, ndiri kumuzwai!’

Samueri pakahwirira koowata izwi riya rakadainzazve zina rake. Samueri wakadaira ngo mushubo waakabvunzwa na Eri kuti adaire. Hino, Djehovha akabvunza Samueri kuti: ‘Bvunza Eri no mhuri yake kuti aazopukunyuki pa dambudziko randicaunzisa. Ngekuti Eri waiziya kuti Ofini na Fineya aiita zviro zvakashata, asi aazi kuita ciro.’ Pa zuwa rakazoteera, Samueri wakamuka cemacibesi uye wakafunungura misuwo dze tabhernakuro hinga zvaaita mazuwa ese. Iyena waithya kubvunza Eri zvaainga abvunzwa na Djehovha. Asi Eri wakakumbira kuti amupanganidzire. Pedzepo, Samueri wakapanganidza zvese.

Samueri paaikura, Djehovha akarumbwa ecigara shamwari yake. Anhu ese e ku Israeri aiziya kuti Djehovha ainga asanangura Samueri kuti agare muphorofita uye mutongi.