Dhavhidhi na Goriyati

Mumasure me kacinguwa, Djehovha akabvunza Samueri kuti aende kumba ke mwanarume umweni waizwi Djesee. Umwe we mwana wake waizogara mambo unoteera we Aisraeri. Samueri paakaguma ikona, iyena wakaona mwana wekutanga wa Djesee uye wakarangarira kuti iyena ndiye waizogara mambo unoteera we Aisraeri. Asi Djehovha akati kuna Samueri: ‘Andiepi wandasanangura. Inini andina basa no ciimo ce munhu. Kandiri cinokosha i kugara no mwoyo wakanaka.’

Hino Djesee wakaunzisa ana ake amweni atanhatu. Asi Djehovha aazi kusanangura kunyazi umwe hake. Samueri wakabvunzisa Djesee kuti wainga ano amweni here. Djesee wakati: ‘Inini ndino mwana umweni wekupedzesera unozwi Dhavhidhi. Iyena uri kucengeta mabira.’ Ipona, Djesee wakakumbira kuti Dhavhidhi aende kootorhwa. Dhavhidhi paakaguma, Djehovha akabvunza Samueri kuti: ‘Uu ndiena kamare.’ Samueri wakatora zvimafuta padoko uye oadururira mu musoro ma Dhavhidhi, zvecipangidza kuti iyena ndiye waizogara mambo unoteera we Israeri.

Mumasure me kacinguwa, Afiristiya akauya koorhwa no Aisraeri. Awona ainga ano musudado wainga akareba maningi uye waithyisa. Zina rake waizwi Goriyati. Mazuwa ese iyena waishora Aisraeri uye waiabvunza kuti: ‘Ndipasai munhu anoda kurhwisana na inini. Kana iyena akawina, isusu ticagara aranda enyu. Asi kana inini ndikawina, imwimwi mucagara aranda edu.’

Zuwa rimweni, Dhavhidhi wakaenda kootora zvokurhya kuti apase hama dzake pakati pe masurudado. Ari ipona Dhavhidhi wakazwa Goriyati eciambira Aisraeri uye Dhavhidhi wakabhuya kuti iyena waizorhwa na Goriyati. Asi Sauri wakabhuya kuti izvona zvainga zvisikazobudiriri ngokuti Dhavhidhi wainga ari kamudjaha. Dhavhidhi wakadaira kuti: ‘Azvina basa. Djehovha acandibetsera.’

Sauri wakapasa Dhavhidhi zvekurhwa nazvo kuti aseenzese. Asi Dhavhidhi wakazvihwirinza ngekuti izvona zvaimupingaidza. Hino, Dhavhidhi wakabata mapuwe mashanu uye wakaakanda mu ka cisaku. Wakabatawo ciro cekukhandira naco mapuwe uye wakagogoma ecienda kuna Goriyati. Goriyati wakabhuya kuti: ‘Uya kuno cimurumbwanewe, inini ndicakuuraya, ndopasa zvinyama zve mushangu kuti zvikurhye nyama yako.’ Asi Dhavhidhi aazi kuthya, iyena wakadaira eciti: ‘Iwewe urikuuya koorhwa na inini wecigonda supada uye simba rako, asi inini ndiri kuuya kauri ndecigonda Djehovha. Iwewe unorangarira kuti urikurhwa na inini, asi iwewe urikurhwa na Djehovha. Anhu ese pano acaona kuti Djehovha ano simba kudarika ciro cipi haco cokurhwa naco. Iyena acatibetsera kuti timutsakatisei.’

Dhavhidhi wakakanda buwe pakati pe ciro cekukhandira naco mapuwe uye wakakhandira no simba rese. Djehovha akaita kuti buwe irona riende koofura pa huma ya Goriyati. Goriyati wakambwera pasi no simba uye ofirepo. Afiristiya akatiza. Waona here kuti Dhavhidhi wakagonda kudini Djehovha? Iwewe ungakwanisawo kugonda na Djehovha here?