Kutsakatiswa ke Mambokadzi Waiita Zvakashata

Ari pa janera ro nyumba yake ku Djezreri, Mambo Akabhi waikwanisa kuona munda we mwanarume waizwi Nabhoti. Akabhi waida maningi mundawo uye wakaedza kuutenga. Asi Nabhoti wakaramba kutengesa mundewo ngekuti mutemo wairambidza kutengesa munda we nhaka. Nabhoti wakaita zvakanaka. Asi Akabhi wakarangarirei nge zvazvo? Iyena wakanyangadzwa maningi zvekuti wakaramba kubuda mu kwartu uye wakaramba kurhya.

Djezabheri mukadzi waiita zvakashata wa Akabhi, wakabvunza Akabhi kuti: ‘Ndiwe mambo we Israeri. Iwewe ungakwanisa kugara no zviro zvipi hazvo zvaunoda. Zvisiye mu nyara dzangu, ndicaita kuti ukwanise kutora mundewo.’ Iyena wakatuma anarume e thaundiro kuti aende koopumha Nabhoti kuti wainga atuka Mwari, ndiyo ndaa Nabhoti wakauraiwa. Ngokudaro, Djezabheri wakati kuna Akabhi: ‘Nabhoti wafa, ungakwanisa kutora no munda wake.’

Nabhoti andiepi ega waiita zvakanaka wakauraiwa na Djezabheri. Iyena wakauraisawo anhu akawanda aida Djehovha. Djezabheri wainamata anamwari e kunyepa uye waiita zviro zvakawanda zvakashata. Asi Djehovha aiona zvese zvaiitika. Hino Djehovha aizosiya zvakadaro here?

Mumasure me cinguwa, Akabhi wakazofa uye umwe we ana ake waizwi Djeoramu wakagadzwa kuti agare mambo. Pa nguwa iyona, Djehovha akatuma mwanarume umweni waizwi Jeuu kuti auraye Djezabheri ne mhuri yake.

Jeuu wakakwira ngoro yake ye hondo uye wakaenda ku Djezreri. Djeoramu wakakwirawo ngoro yake ye hondo oenda koosongana naye uye wakamubvunzisa kuti: ‘Jeuu, iwewe uri kuuya mu runyararo here?’ Iyena wakati: ‘Andizogari mu runyararo na iwewe kana mai ako Djezabheri akarumbwa eciita zvakashata.’ Ngokudaro, Djeoramu wakaedza kukhonesa ngoro yake ye hondo kuti atize. Asi Jeuu wakamufura ne mupasha uye iyena wakafa.

Hino, Jeuu wakaenda kumba ka mambokadzi Djezabheri. Djezabheri paakaziya kuti Jeuu wainga eciguma, iyena wakadzimakiyari, ogadzirisa tsitsi rake uye oetsera ari pa janera ro nyumba ye padenga. Jeuu paakaguma, Djezabheri wakamubata zvisina unatsi. Pedzepo, Jeeu wakabvunza aseenzi a Djezabheri ainga ari padhuze naye kuti: “Khandirai mwanakadzi uu ngo pa janera!” Aseenzi akakhandira Djezabheri ngo pa janera, wombwera uye wakafa.

Pedzepo, Jeuu wakauraya ana anokwana kuita 70 a Akabhi. Iyena wakapedza kunamathwa ka Bhaari ku Israeri. Izvi zvinotifundisei? Tinofunda kuti Djehovha anoona zvese zviri kuitika uye kuti pa nguwa yakasisira anophanica aya anoita zvakashata.