Anyahondo Ano Simba a Djehovha

Bheni-adhadhi mambo we Asiriya, wakaedza kakawanda kurhwisa Aisraeri. Asi muphorofita Erizeu, wairumbwa ecingwadza mambo we Israeri zvaida kuizwa na mambo Bheni-adhadhi. Ndiyo ndaa, zvairongwa na Bheni-adhadhi zvainga zvisikabudiriri. Hino, iyena wakasanangura kutuma masurudado e Siriya kuti aende ku thaundi re Dhotani kuti asunge Erizeu.

Masurudado e Siriya akaguma ku Dhotani co usiku. Pa zuwa rakazoteera, mubetseri wa Erizeu wakaona kuti thaundi rese rainga rakatenderedzwa no masurudado akawanda. Iyena wakathya maningi, zvekuti wakakhuwa ecibhuya kuti: ‘Erizeu, ticaitei pari zvino?’ Erizeu wamukadaira eciti: ‘Usanetseke, ngokuti ari kudii redu akawanda kupinda ari ku dii rawo.’ Pa nguwa iyona, Djehovha akaita kuti mubetseri wa Erizeu aone zviro zvinoshamisa. Iyena wakaona kuti matunhu ese ainga akatenderedza thaundi, ainga akadzara no makavharo uye no ngoro dze muriro dze hondo.

Masurudado e Siriya, paainga eciedza kusunga Erizeu, iyena wakaita munamato eciti: ‘Ndapota Djehovha, itai kuti anarume aya agare mapofu.’ Ciriporipoco, kunyazi hazvo masurudado ainga eciona, awona ainga asikazii kaainga ari. Erizeu wakaabvunza kuti: ‘Imwimwi mapsveteka, nditeerei. Ndicamuendesai ku munhu wamuri kupsvaka.’ Masurudado akateera Erizeu dakara ku Samariya, ku thaundi rimwe-rimwero raigara mambo we Israeri.

Masurudado e Siriya paakaziya kaainga ari, zvainga zvisikacaiti kuhwirira sure. Mambo we ku Israeri wakabvunzisa Erizeu kuti: ‘Ndinodikana kuuraya masurudado aya here?’ Erizeu ungadai akaseenzesa mukana uu kuti atsiye. Asi unozviziya kuti wakaitei? Iyena wakati: ‘Musauraye anarume aya. Apasei zvekurhya uye asiyei aende.’ Ngokudaro, mambo we Israeri wakaita kuti pabikwe zviro zvakawanda kuti zvipaswe masurudado e ku Siriya. Pedzepo, akaasiya kuti ahwirire kumba kawo.