Djehovha Akapangidza Mwoyo Unononoka Kutsamwa kuna Djona

Ninivhi rainga riri thaundi re ku Siriya uye anhu e ikona ainga akashata maningi mwoyo. Ngokudaro, Djehovha akatuma Djona kuti aende ikona uye aabvunze kuti awona aidikana kucinyuka. Asi pane kuti Djona aende ikona, iyena wakapakira bharko otizira ku thaundi ro Tarshishi, rainga riri kure no Ninivhi.

Paainga eciita rhwendo ari mu bharko, kakatanga kuitika dutu rakakura maningi uye ahambisi e bharko akatanga kuthya maningi. Awona akatanga kuita munamato kuna anamwari awo kuti aziye kuti ngei dutu irona rainga reciitika. Hino, Djona wakabvunza ahambisi e bharko kuti: ‘Ndaa nge yangu. Djehovha andibvunza kuita ciro uye ndatiza. Kana imwimwi mukandikhandira mu bahari, dutu ricaima.’ Ahambisi e bharko ainga asikadi kuita izvona, asi Djona wakaabambidzira. Ahambisi e bharko paakamukhandira mu bahari, dutu rakaima.

Djona wakatanga kundondomera uye wakarangarira kuti waizofa. Hino, wakanamata kuna Djehovha. Pa nguwa iyona, Djehovha akatuma howe yakakura maningi. Howe yakamedza Djona, asi iyena aazi kufa. Ari mukati me ndani ye howe, Djona wakanamata eciti: ‘Djehovha ndinomugondesai kuti kubvira zvino kuenda mberi, ndicamuzwirai.’ Djona wakagara mundani me howe mazuwa matatu. Mumasure mazvo, Djehovha akaita kuti howe irutse Djona pasi pakaoma.

Sezvo Djehovha ainga aponesa Djona, zvinoda kureya kuti iyena wainga asikacatumwizve kuenda ku Ninivhi here? Haiwa. Djehovha akamutumazve kecipiri kuti aende ku Ninivhi. Asi apa, Djona wakazwira. Paakaguma ikona, Djona wakabvunza anhu aya ainga akashata mwoyo kuti: ‘Mu mazuwa 40, Ninivhi icatsakatiswa.’ Asi pakaitika ciro cainga cisikaetserhwi—Aninivhi akacinyuka. Mambo we Ninivhi wakati: ‘Ngatikumbire Mwari kuti atirekerere. Pamweni acasanangura kutama kutiuraya.’ Djehovha paakaona kuti Aninivhi ainga acinyuka, iyena akasanangura kutama kutsakatisa thaundiro.

Ngokudaro, Djona wakanyangadzwa maningi ndizvo. Iyena aazi kugara no mwoyo unononoka kutsamwa no anhu e ku Ninivhi, hinga zvaakaizirhwa na Djehovha. Kusiya izvona, iyena wakabuda muthaundiro wakanyangadzwa uye wakaenda koogara pa bvute ro mutanga. Asi mutiwo wakaoma uye izvona zvakaita kuti Djona atsamwe maningi. Djehovha akabvunza Djona kuti: ‘Iwewe wazwira muti usisi kudarika anhu e ku Ninivhi. Ndakaazwira usisi, ndiyo ndaa awona aazi kutsakatiswa.’ Ngei Djehovha akamubvunza kudaro? Ngokuti aida kumufundisa kuti anhu e ku Ninivi anokosha kudarika muti.