Djosiya Waida Mitemo ya Djehovha

Djosiya wakagara mambo we Djudha paainga ano makore 8. Pa nguwa iyona, anhu aiita zviro zvainga zvisikapfarirhwi na Djehovha. Awona aiita zvemasarapita uye ainamata anamwari e kunyepa. Paainga aano makore 16, Djosiya wakapsvaka mushobo wakanaka we kunamata Djehovha. Paainga aano makore 20, iyena wakatsakatisa mifanikiso yese uye artari dze anamwari e kunyepa ainga ari mu Djudha. Uye paainga aano makore 26, Djosiya wakaita kuti tempro igadziriswezve.

Pa nguwa yekugadziriswa ko tempro, mupristi mukuru Irikiya, wakagumira mupumburu we Mitemo ya Djehovha—pamweni mupumburu uu ndiwo wakatarhwa na Mozesi. Safani mutari wa mambo, wakatora mupumburu uu ouendesa kuna Djosiya uye wakatanga kuerenga Mitemo ii no izwi guru. Paakazwa kuerengwa ke Mitemo, Djosiya wakatsukwara maningi ngokuti anhu ainga asikaiti maererano no Mitemo ya Djehovha. Hino Djosiya wakabvunza Irikiya kuti: ‘Djehovha akatitsamwira maningi. Enda kooreketa naye. Djehovha acatibvunza zvatinodikana kuita.’ Djehovha akadaira eciti: ‘Ngokuti anhu e Djudha andisiya, awona acaphanicwa. Asi izvona zvicaitika basi mumasure mekuti Djosiya wafa, ngokuti iyena waerenga Mitemo yangu uye wadzidodosa.’

Paakaziya ngezve mhinduro ya Djehovha, Mambo Djosiya wakaenda ku tempro uye wakaunganidza anhu ese e Djudha. Ikona, iyena wakaerengera anhu ese Mitemo ya Djehovha no izwi guru. Djosiya pamwepo no anhu, akagondesa kuzwira Djehovha no mwoyo wese.

Djosiya wakaona kuti mu Mitemo, Djehovha aibvunza anhu kuti apemberere Paskwa makore ese. Asi anhu akapedza makore akawanda asikaiti izvona. Hino, Djosiya wakasanangura kugadzirira Paskwa kuitira Djehovha. Iyena wakapasa zvinyama zvakawanda kuitira kuti zvipaswe hinga zvibairo uye wakaita kuti pa tempro paoneke aembi. Mumasure me Paskwa, anhu akaita mabiko amweni akapedza mazuwa manomwe. Mabiko awona, anodainzwa kuti Mutambo we Pau Dzisina Mbiriso. Anhu ainga akapedzesera kuita Paskwa hingana ii mumazuwa a Samueri. Djosiya waipfarira maningi kufunda ngezva Djehovha uye waida maningi Mitemo yake. Iwewe unodawo kufunda ngezva Djehovha here?