Umambo Ucarumbwa Uripo Nokusikaperi

Pa usiku umweni, Mambo Nabhukodhonozori wakarota hope dzinoshupha kupanganidza. Hope idzona dzakabata-bata maningi mambo, zvekuti aazi kuzokwanisazve kuwata. Hino, Nabhukodhonozori wakadainza aya anoita zvemasarapita uye wakaabvunza kuti: ‘Ndipanganidzirei zvandarota.’ Awona akadaira eciti: ‘Honde mambo, asi tapota tangai kutipanganidzira zvamarota.’ Asi Mambo Nabhukodhonozori akaadaira eciti: ‘Haiwa! Imwimwi ndimwi munodikana kutanga kundipanganidzira, kana mukatama kuita kudaro ndinomuurayai mwese.’ Awona akadairazve eciti: ‘Haiwa mambo, tapota tipanganidzirei zvamarota uye isusu ticamupanganidzirai zvazvinoreya.’ Mambo wakabhuya kuti: ‘Imwimwi mwese murikuda kundicengedzera nee! Ndipanganidzirei hope dzandarota!’ Awona akati kuna mambo: ‘Akuna munhu anokwanisa kuita izvona. Zvamuri kuda kuti tiite azviitiki.’

Nabhukodhonozori wakanyangadzwa maningi, zvekuti wakabhuya kuti anarume ese ano uzii e mu Bhabhironi auraiwe. Izvi zvakakanda pa ngozi upenyu wa Dhanyeri, Shadreki, Misheki uye Abhidhinego. Dhanyeri wakaenda koobhuya na mambo Nabhukodhonozori uye wakakumbira cinguwa padoko. Hino, Dhanyeri no shamwari dzake akaita munamato kuna Djehovha ecikumbira rubetso. Kodi Djehovha akaitei?

Djehovha akapanganidzira Dhanyeri hope dzainga dzarothwa na Nabhukodhonozori uye zvadzaireya. Pedzepo, pa zuwa rakazoteera, Dhanyeri wakabvunza umwe we aseenzi a mambo kuti: ‘Musauraye henyu kana umwe we anarume aya ano uzii. Inini ndingakwanisa kupanganidza hope dzarothwa na mambo.’ Museenzi wakatora Dhanyeri oenda naye kuna mambo Nabhukodhonozori. Hino, Dhanyeri wakapanganidzira mambo hope eciti: ‘Mwari ari kumupanganidzirai zvicaitika mune ramangwana. Zvamarota ndi izvi: Mambo wangu, imwimwi makaona mufanikiso wakakura maningi une musoro we oro, diti uye muoko zve prata, ndani uye mutezu zve kobre, murenje dze simbi uye no tsoka dze simbi dzakavhenganidzwa no dongo. Hino pakabva buwe rakagurhwa pamusoro pe dunhu uye rakaponda tsoka dze mufanikiso uye mufanikisowo wakatsakatiswa wogara mavhu. Uye kakauya dutu rikapeperusa mavhu ese. Mumasure mazvo buwe riya rakagara dunhu rakakura uye rakafukidza nyika yese.’

Pedzepo, Dhanyeri wakapanganidzira Nabhukodhonozori kuti: ‘Musoro we oro we mufanikiso wamarota ndi umambo wenyu. Prata ndi umambo ucauya mumasure menyu. Hino kucauya umambo umweni ucagara hingana kobre uye ucatonga nyika yese. Pedzepo, ucauya umambo umweni ucabamba hingana simbi. Uye pakupedzesera kucauya umambo usikazi kubatana, dii rimwe ro umambo uu ricabamba hingana simbi, asi dii rimweni ricaremba hingana dongo. Buwe rinocinja kuita dunhu, ndiwo Umambo wa Mwari. Umambo uwona ucatsakatisa madzimambo ese e nyika uye ucagara nokusikaperi.’

Paakazwa izvona, Nabhukodhonozori wakagodama uye wakabvunza Dhanyeri kuti: ‘Ndi Mwari wako wakupanganidzira hope idzi. Akuna Mwari umweni akaita hinga iyena.’ Pane kuti mambo auraye Dhanyeri, iyena wakaita kuti Dhanyeri agare mutungamiriri pa azii ese uye Dhanyeri wakagara govhernadhori we Bhabhironi. Waona here kuti Djehovha akadaira kudini munamato wa Dhanyeri no we shamwari dzake?