Muru dze Djerusarema

Kareko ku Persiya kainga kuno Muisraeri umweni waizwi Neemiya, waiseenzera Mambo Atashershe. Zuwa rimweni, hama yake yakauya yecibva ku Djudha no masoko akashata okuti: ‘Anhu akahwirira ku Djerusarema ari pa ngozi. Dakara nyamasi apana wakagadzirisa muru uye misuwo mikuru ye thaundi zvakatsakatiswa ne Abhabhironi.’ Izvona zvakatsukwarisa maningi Neemiya. Iyena waida maningi kuenda ku Djerusarema kuti abetsere anhu, asi wainga asikazvizii kuti mambo waizomutendera here kuti aende. Hino iyena wakanamata kuna Djehovha ecikumbira kuti amubetsere.

Zuwa rimweni, mambo wakaona kuti Neemiya wainga akatsukwara uye wakamubvunzisa kuti: ‘Andisati ndakambokuona wakadai, cinyi ciri kuitika?’ Hino Neemiya wakadaira kuti: ‘Ndakatsukwara nge ndaa ye muru dze thaundi rangu Djerusarema dziri kutsakatiswa.’ Mambo wakamubvunzisa kuti pano zvaaidikanawo kuita kuti amubetsere here. Pa nguwa iyona kamare, Neemiya wakaita munamato mucinyararire uye wakati kuna Mambo: ‘Inini ndaida maningi kuenda ku Djerusarema koowaka muru. Munonditenderawo here?’ Hino Mambo Atashershe wakamutendera kuti aende uye wakaita zviri zvese kuti aite rhwendo rakanaka. Mambo wakatenderawo kuti Neemiya agare govhernadhori we Djudha uye wakamupasa matabwa kuti aite misuwo mikuru ye Djerusarema.

Neemiya paakaguma ku Djerusarema, iyena wakaenda koona kuti muru dze thaundi yainga yakagara kudini. Pedzepo, wakaungana no anarume anokosha e mu Djerusarema uye wakati: ‘Zviro azvizi kugara zvakanaka. Tinodikana kuzvigadzirisa.’ Ese akatenderana nazvo uye akatanga kuwaka muru.

Asi azondi amweni e Aisraeri akatanga kuaseka, eciti: ‘Muru uu auzi kubamba kunyazi imbwa ye mushango inokwanisa kuumbwedza.’ Asi Aisraeri aazi kuzvibhara uye awona akarumbwa eciseenza. Nokuhamba ke nguwa, muru wakanyasa kureba uye wakabamba.

Hino azondi akasanangura kurhwisa Djerusarema anhu asikazvizii. Adjudha paakazvizwa akathya maningi. Asi Neemiya wakati: ‘Musathye. Djehovha anesu.’ Hino, Neemiya wakakanda arindiri kuti acengete aya aiwaka muru. Ngokudaro, azondi aazi kukwanisa kurhwisa Djerusarema.

Mu mazuwa 52 basi, muru uye misuwo mikuru yakapera kugadzirhwa. Neemiya wakaunzisa Arevhi ese ku Djerusarema kuti apemberere uye wakaapatsanura ke zvikwata zviiri. Neemiya wakagara ne cikwata cimwe uye Esdra wakagara no cimweni. Zvikwata zviiri izvi zvakakwidza no pamasikada ecitenderera muru uye cikwata cimweni cakaenda ku dii rimwe, uye cimweni cakaendawo ku dii rimweni. Awona aihamba ecitenderera thaundi eciridza uye eciembera Djehovha ngoma dakara zvikwata zviiri izvi zvasongana mu tempro. Anarume ese, no anakadzi uye ana e mu Djerusarema, akapasa zvibairo kuna Djehovha uye akapemberera. Awona ainga ecipfara maningi zvokuti nge cekure zvaiita kuzwa izwi rawo.