Esdra Wakafundisa Mitemo ya Mwari

Painga padarika makore anokwana 70 Aisraeri akawanda ahwirira ku Djerusarema. Asi anganani awo ainga aciri kugara mu mbuto dzakasiyana-siyana dze umambo we Persiya. Umwe we Aisraeri aya wainga ari mupristi waizwi Esdra. Nguwa dzese iyena waifundisa anhu Mitemo ya Djehovha. Esdra wakazwa kuti Aisraeri ainga ari ku Djerusarema, ainga asikatondowedzi Mitemo ya Djehovha. Hino iyena waida koobetsera anhu. Mambo we ku Persiya Atashershi wakabvunza Esdra kuti: ‘Mwari akakupasa uzii we kufundisa Mitemo yake. Hwirira ku Djerusarema uye kana pane munhu unoda kuhwirira newe, enda naye.’ Hino Esdra wakaungana no anhu ese aida kuhwirira ku Djerusarema. Awona akanamata kuna Djehovha kuti aadziirire pa rhwendo raaizoita uye awona akaenda.

Mumasure me mwedzi mirongomuna, awona akaguma ku Djerusarema. Macinda e kweneyo akabvunza Esdra kuti Aisraeri aiwaka anakadzi ainamata anamwari e kunyepa. Esdra paakazwa izvona, iyena wakagodama pamberi pe anhu uye wakanamata eciti: ‘Djehovha, makatiitira zviro zvakawanda zvakanaka, asi isusu tinorumbwa tecimuitirai zviro zvakashata zvekuti amutozvipfariri.’ Aisraeri akacinyuka, asi akarumbwa eciita zviro zvakashata. Ndiyo ndaa, Esdra wakasanangura akuru uye atongi kuti atonge nyaya idzona. Mu mwedzi mitatu dzakazoteera, anhu ainga asikanamati Djehovha akabudiswa mu Djerusarema.

Hino pakadarika makore 12. Pa nguwa ii, muru we Djerusarema wakawakwazve. Esdra wakaunganidza anhu kuti aerenge Mitemo ya Mwari. Iyena paakafunungura bhuku, anhu ese akaima. Esdra wakakudza Djehovha uye anhu aitenderana naye. Esdra paaierenga uye ecipanganidza Mitemo, anhu ainyasa kuipurutana. Aisraeri akatendera kuti ainga asikazizve kuzwira Djehovha uye awona akacema. Pa zuwa rakazoteera, Esdra wakaerengerazve anhu Mitemo. Aisraeri akaona kuti kaishota nguwa doko kuti igume nguwa ye Mutambo we Zvitumba. Awona aazi kutora nguwa yakareba kuti agadzirire mutambo uu unokosha.

Mu mazuwa manomwe e mutambo, Aisraeri akapfara maningi uye akatenda Djehovha nge kukomborera zvirimwa zvawo. Aisraeri akapedzesera kuita Mutambo we Zvitumba mu mazuwa a Djoshuwa. Mumasure me mutambo, anhu akaungana uye akanamata eciti: ‘Djehovha, makatibvisa ku Edjipitu, makatipasa zvekurhya ku renje uye matipasa mbuto ii yakarungama maningi. Asi taiita zviro zvakashata nguwa dzese. Imwimwi maituma aphorofita enyu kuti atingwadze, asi tainga tisikaazwiri. Kunyazi zvakadaro, imwimwi makarumbwa muno mwoyo unononoka kutsamwa. Uye makaita zvamakapikira Abrahamu. Zvino tiri kumugondesai kuti ticamuzwirai.’ Ipona awona akatara zvese zvaakagondesa. Uye kuti apangidze kuti anhu aizoita zvaakagondesa, macinda, Arevhi uye apristi akakanda zvidhindo zvawo.