Juau Unogadzirira Djesu Gwanza

Juau, mwana wa Zakariya uye na Erizabheti, wakakura uye wakagara muphorofita. Djehovha akasanangura Juau kuti abvunze anhu kuti Mesiya ainga eciuya. Juau wainga asikafundisi mu masinagoga, kana kuti padhuze no nyumba dzo anhu, iyena waifundisa kure no mathaundi. Anhu eku Djerusarema no eku Djudhiya aimupsvaka kuti afundiswe naye. Iyena waifundisa kuti kana anhu ecida kupfadza Mwari, awona aidikana kusiya kuita zviro zvakashata. Hino anhu akawanda aicinyuka uye aibhabhatidzwa na Juau mu Murambo we Djorodhani.

Juau wairarama upenyu usina zvakawanda. Waipfeka matehwe e kamero uye wairhya makwiza no uci. Anhu akawanda aida kumuziya. Afarisi uye Asadhusi ekuti ainga ari anhu aidzikudza maningi, aitoendawo kooreketa na Juau. Asi Juau wakaabvunza kuti: ‘Musarangarire kuti Mwari anomuonai hinga anhu anokosha kupinda anhu amweni, ngokuti munoti muri ana a Abrahamu, asi izvona azvirei kuti muri ana a Mwari. Munodikana kucinja maitiro enyu akashata uye mocinyuka.’

Anhu akawanda aibvunzisa Juau kuti aidikana kuitei kuti apfadze Mwari. Juau waiadaira kuti: ‘Kana imwimwi muno hanzu mbiri, pasai aya asina.’ Unoziya kuti ngei Juau waibhuya izvona? Iyena waida kufundisa fundo rekuti, kuti tipfadze Mwari, tinodikana kuda anhu amweni.

Ku arongosi e musoho, Juau waiabvunza kuti: ‘Garai makagondeka uye musatsotse anhu.’ Kumasurudado, Juau wakabhuya kuti: ‘Musanyepe uye musaedze kutora mare dzo anhu amweni.’

Apristi uye arevhi paakabvunzisa Juau kuti: ‘Ndiwe ani? Anhu ese anoda kuziya.’ Juau wakaadaira kuti: ‘Inini ndini uya unoita kuti anhu aende kuna Djehovha, muphorofita Isaya wakareketa nge zvangu.’

Anhu akawanda aipfarira zvaifundiswa na Juau. Zvekuti anhu akawanda aitobvunzisa kuti Juau ndiyena here wainga ari Mesiya. Asi Juau waibhuya kuti: ‘Munhu unokosha maningi kudarika inini ari kuuya. Inini andizi kusisira kuti ndikhumure masandarya ake. Inini ndinobhabhatidza no mvura, asi iyena unobhabhatidza no mwiya mucena.’