Paskwa ya Djesu ye Kupedzesera

Makore ese, Adjudha aipemberera Paskwa mu zuwa 14 ya Nisani. Awona aiita izvona kuti aedzurire mushobo wakaizwa na Djehovha kuti aduse Aisraeri ku Edjipitu. Mu gore ra 33 K.A., Djesu no aphostori aipemberera Paskwa. Mumasure mekuti awona apedza kurhya, Djesu akabvunza aphostori ake kuti: ‘Ndinomubvunzai zvirokwazvo kuti umwe wenyu ucanditengesa.’ Aphostori akashamisika maningi uye akabvunzisa Djesu kuti: ‘Ndiani iyena.’ Djesu akadaira kuti: ‘Uya unoseya na inini mu parato ndiye ucanditengesa.’ Hino, Djesu akapasa Djudhasi Iskariyoti cidimbo co pau. Ipona, Djudhasi wakapurumuka uye oenda.

Mumasure mekuti Djudhasi wabuda, Djesu akaita munamato, akagura-gura pau kuti igare zvidimbu, uye muphostori umwe na umwe waitora dimbu rimwe. Pedzepo, Djesu akabhuya kuti: ‘Irhyai pau ii. Iyona inoimirira mwiri wangu wandicapasa hinga cibairo kamuri.’ Ipona, Djesu akaitazve munamato uye akabata kopo yo vhinyu oipasa aphostori. Djesu akabhuya kuti: ‘Imwai vhinyu ii. Iyona inoimirira ngazi yangu yandicapasa kuti anhu arekererhwe zvitema. Ndinomugondesai kuti mucagara madzimambo pamwepo na inini kudenga. Gore no gore rumbwai meciita izvi kuti mundirangarire.’ Makore ese, ateeri a Djesu anoungana kuti aedzurire zvaakaizirhwa na Djesu. Musangano uu unodainzwa kuti Kurarira ka Tenzi.

Mumasure mekuti apedza kurhya, aphostori akatanga kureketedzana ecibhuya kuti ndiani wainyanya kukosha pakati pawo. Asi Djesu akaabvunza kuti: ‘Munhu unonyanya kukosha ndi uya unodziona hinga mudoko kana kuti usikadzioni hinga unokosha kupinda amweni.’

Djesu akabhuyazve kuti: ‘Imwimwi muri shamwari dzangu. Ndinomubvunzai zvese zvandinobvunzwa na Baba angu kuti ndimubvunzei. Mbai-mbai pano, ndicaendazve kudenga kuna Baba angu uye imwimwi mucasara pa nyika pano. Kuti anhu ese aziye kuti muri ateeri angu, dananai hinga mushobo wandakamudai.’

Pakupedzesera, Djesu akaitazve munamato ecikumbira kuti Djehovha adziirire afundi ake uye aabetsere kuti aseenze pamwepo mu runyararo. Djesu akanamatazve ecikumbira kuti zina ra Djehovha riceneswe. Hino, Djesu no aphostori ake akaembera Djehovha ngoma uye akaenda. Yainga yaakuguma nguwa yekuti Djesu asungwe.